ສຳນັກຂ່າວ CNN ຟ້ອງທຳນຽບຂາວ ວ່າລະເມີດສິດທິເສລີພາບສື່

ສຳນັກຂ່າວຕ່າງປະເທດລາຍງານເມື່ອວັນທີ 13 ພະຈິກ 2018 ທີ່ຜ່ານມາວ່າ: ສະຖານີໂທລະພາບ CNN ໄດ້ອອກຖະແຫຼງການວ່າ ໄດ້ມີການຍື່ນຄຳຮ້ອງຕໍ່ສານລັດຖະບານກາງໃນນະຄອນຫຼວງວໍຊິງຕັນ ເພື່ອໃຫ້ມີການສືບສວນຢ່າງເປັນທາງການ ກໍລະນີທຳນຽບຂາວລະເມີດສິດທິຕາມລັດຖະທຳມະນູນຂອງທ່ານ ຈິມ ອາຄອສຕາ ຫົວໜ້າຜູ້ສື່ຂ່າວຂອງ CNN ປະຈຳທຳນຽບຂາວ ດ້ວຍການລະງັບບັດສື່ມວນຊົນຂອງທ່ານ ຈິມ ອາຄອສຕາ ແບບບໍ່ມີກຳນົດ ພາຍຫຼັງມີປາກສຽງກັບທ່ານ ໂດໂນ ທຣຳ ລະຫວ່າງການຖະແຫຼງຂ່າວເມື່ອອາທິດທີ່ຜ່ານມາ.

(Photo by Jim WATSON / AFP)

ເຊິ່ງ CNN ກ່າວຫາລັດຖະບານສະຫະລັດ ອາເມຣິກາພາຍໃຕ້ການນຳພາຂອງທ່ານ ໂດໂນ ທຣຳ ວ່າລະເມີດບົດບັນຍັດລັດຖະທຳມະນູນ ສະບັບແກ້ໄຂເພີ່ມເຕີມຄັ້ງທີ 1 ທີ່ບັງຄັບໃຊ້ມາຕັ້ງແຕ່ປີ 1791 ວ່າດ້ວຍການທີ່ລັດຖະບານຕ້ອງເຄົາລົບ ແລະ ໃຫ້ເສລີພາບແກ້ປະຊາຊົນໃນການນັບຖືສາສະໜາ,​ ເສລີພາບໃນການສະແດງຄວາມຄິດເຫັນ, ສິດໃນການໂຮມຊຸມນຸມຢ່າງສັນຕິ ແລະ ການປົກປ້ອງເສລີພາບຂອງສື່ມວນຊົນ.

ຂະນະທີ່ສະມາຄົມນັກຂ່າວປະຈຳທຳນຽບຂ່າວ ອອກຖະແຫຼງການສະໜັບສະໜູນ CNN ເນື່ອງຈາກການຖອດຖອນບັດປະຈຳຕົວສື່ມວນຊົນເປັນການກະທຳທີ່ບໍ່ສົມຄວນຢ່າງຍິ່ງຂອງທຳນຽບຂາວ ແລະ ປະທານປະເທດສະຫະລັດ ອາເມຣິກາບໍ່ຄວນແຊກແຊງ ຫຼື ກຳນົດກົດເກນຂອງສື່ມວນຊົນໃນການລາຍງານຂ່າວ ຫຼື ການເລືອກປະຕິບັດຕໍ່ຜູ້ສື່ຂ່າວດ້ວຍການເຈາະຈົງວ່າໃຜສາມາດເຂົ້າສູ່ຫ້ອງຖະແຫຼງໄດ້ແນ່.

ໃນດ້ານຂອງທ່ານ ນາງ ຊາຣາ ແຊນເດີ ໂຄສົກປະຈຳທຳນຽບຂາວ ກ່າວເຖິງການຮ້ອງຟ້ອງຂອງ CNN ພຽງວ່າ ລັດຖະບານຈະຕໍ່ສູ້ກັບຂະບວນການຈົນເຖິງທີ່ສຸດ ແລະ ທຳນຽບຂາວຍັງອະນຸຍາດໃຫ້ CNN ສົ່ງຜູ້ສື່ຂ່າວເຂົ້າຮ່ວມຮັບຟັງການຖະແຫຼງໃນອະນາຄົດໄດ້ ພຽງແຕ່ບໍ່ແມ່ນທ່ານ ຈິມ ອາຄອສຕາເທົ່ານັ້ນ, ອີກຢ່າງໜຶ່ງ ທ່ານ ໂດໂນ ທຣຳ ແລະ CNN ເປັນຄູ່ງັດກັນມາຕັ້ງແຕ່ເຂົ້າຮັບຕຳແໜ່ງຜູ້ນຳສະຫະລັດ ອາເມຣິກາ ໂດຍທ່ານ ໂດໂນ ທຣຳ ຂະໜານນາມ CNN ວ່າເປັນສຳນັກຂ່າວປອມ ແລະ ເປັນສັດຕູຂອງປະຊາຊົນ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube