ສອງເກົາຫຼີ ຟື້ນຟູເສັ້ນທາງຂ້າມເຂດປອດທະຫານ ທີ່ເປັນຊາຍແດນລະຫວ່າງກັນ

ສຳນັກຂ່າວຕ່າງປະເທດລາຍງານ 23 ພະຈິກ 2018 ວ່າ: ກະຊວງປ້ອງກັນປະເທດເກົາຫຼີໃຕ້ ອອກຖະແຫຼງການເມື່ອວັນພະຫັດ ທີ່ຜ່ານມາ ເລື່ອງການປົວແປງເສັ້ນທາງຂ້າມຊາຍແດນ ບໍລິເວນຈຸດເຄິ່ງກາງຂອງເຂດປອດທະຫານ (DMZ) ແຫຼມເກົາຫຼີ ເປັນຄັ້ງທຳອິດນັບຕັ້ງແຕ່ປີ 2004 ເສັ້ນທາງດັ່ງກ່າວມີຄວາມກວ້າງ 12 ແມັດ ຕັ້ງຢູ່ເມືອງແຊວອນ ໃນຝັ່ງຂອງເກົາຫຼີໃຕ້ ແລະ ເປັນໄປຕາມໜຶ່ງໃນຂໍ້ຕົກລົງ “ປ່ຽນແປງ” ເຂດປອດທະຫານໃຫ້ເປັນພື້ນທີ່ແຫ່ງສັນຕິພາບ ຕາມການປະຊຸມຮ່ວມລະຫວ່າງທ່ານ ມູນ ແຈ-ອິນ ປະທານປະເທດເກົາຫຼີໃຕ້ ກັບ ທ່ານ ຄິມ ຈອງ-ອຶນ ຜູ້ນຳສູງສຸດຂອງເກົາຫຼີເໜືອ ເມື່ອດືອນກັນຍາ ທີ່ຜ່ານມາ.

(Photo by Kim Min-Hee / POOL / AFP)

ຂະນະດຽວກັນ, ລັດຖະບານເກົາຫຼີໃຕ້ເຜີຍແຜ່ພາບຖ່າຍການຈັບມືຂ້າມເສັ້ນແບ່ງເຂດແດນຂອງທະຫານທັງສອງປະເທດ ເພື່ອເປັນສັນຍາລັກຂອງການຮ່ວມມື ໂດຍເສັ້ນທາງສາຍນີ້ຈະໃຊ້ເປັນເສັ້ນທາງຄົມມະນາຄົມຫຼັກສຳລັບໂຄງການຮ່ວມສອງຝ່າຍ ໃນການສຳຫຼວດ ແລະ ຄົ້ນຫາໂຄງກະດູກຂອງທະຫານເກົາຫຼີທີ່ຍັງຫາຍສາບສູນແຕ່ປາງສົງຄາມ ເຊິ່ງມີກຳນົດເລີ່ມຕົ້ນປີໜ້າ, ນອກຈາກນີ້ ການເຄື່ອນໄຫວດັ່ງກ່າວເກີດຂຶ້ນພາຍຫຼັງທີ່ທັງສອງປະເທດໄດ້ລະເບີດ ແລະ ຮື້ຖອນປ້ອມສັງເກດການ ລວມເຖິງສິ່ງກຳບັງຕາມແນວຊາຍແດນຝ່າຍລະຢ່າງໜ້ອຍ 10 ແຫ່ງ ເມື່ອກາງອາທິດນີ້ອີກດ້ວຍ.

(Photo by Jung Yeon-je / pool / AFP)