ການາດາຈັບຜູ້ບໍລິຫານລະດັບສູງຂອງ Huawei (ຫົວເວ່ຍ) ຕາມຄຳສັ່ງ ສ.ອາເມຣິກາ

ສຳນັກຂ່າວຕ່າງປະເທດລາຍງານເມື່ອວັນທີ 5 ທັນວາ 2018 ທີ່ຜ່ານມາວ່າ: ກະຊວງຍຸຕິທຳຂອງການາດາ ອອກຖະແຫຼງການເມື່ອວັນພຸດ ທີ່ຜ່ານມາວ່າ: ເຈົ້າໜ້າທີ່ໄດ້ຈັບກຸມຕົວທ່ານ ນາງ ເມັ່ງ ຫວານໂຈວ ປະທານຄະນະເຈົ້າໜ້າທີ່ບໍລິຫານດ້ານການເງິນ ແລະ ບັນຊີ (CFO) ຂອງບໍລິສັດ Huawei (ຫົວເວ່ຍ) ທີ່ເມືອງແວນຄູເວີ ປະເທດກາດານາ ເມື່ອວັນເສົາທີ່ຜ່ານມາ ແລະ ກຽມເນລະເທດໄປຍັງສະຫະລັດ ອາເມຣິກາ ເພື່ອເຂົ້າຮັບການດຳເນີນຄະດີ ແລະ ສືບສວນຕາມຂະບວນການທາງກົດໝາຍຂອງລັດຖະບານສະຫະລັດ ອາເມຣິກາ ຈາກການທີ່ຫົວເວ່ຍລະເມີດມາດຕະການຂວໍ້າບາດອິຣານ, ເຖິງຢ່າງໃດກໍ່ຕາມ ມີຄວາມເປັນໄປໄດ້ເຊັນກັນທີ່ການເນລະເທດທ່ານ ນາງ ເມັງ ໄປຍັງສະຫະລັດ ອາເມຣິກາອາດຍັງບໍ່ເກີດຂຶ້ນພາຍໃນອະນາຄົດອັນໃກ້ນີ້ ເນື່ອງຈາກທະນາຍຄວາມຂອງທ່ານ ນາງ ເມັ່ງ ຍື່ນຄຳຮ້ອງ ເພື່ອຂໍປະກັນຕົວແລ້ວ.

ຂະນະທີ່ສະຖານເອກອັກຄະລັດຖະທູດຈີນ ປະຈຳນະຄອນຫຼວງວໍຊິງຕັນ ແລະ ສະຖານເອກອັກຄະລັດຖະທູດຈີນປະຈຳນະຄອນຫຼວງອັອດຕາວາ ຕ່າງກໍ່ອອກຖະແຫຼງການສະແດງຄວາມບໍ່ພໍໃຈຢ່າງຍິ່ງຕໍ່ສະຖານະການທີ່ເກີດຂຶ້ນກັບທ່ານ ນາງ ເມັ່ງ ແລະ ຮຽກຮ້ອງໃຫ້ມີການປ່ອຍຕົວໂດຍໄວທີ່ສຸດ, ໃນດ້ານຂອງຖະະແຫຼງການຂອງບໍລິສັດຫົວເວ່ຍລະບຸວ່າ ລັດຖະບານການາດາຈັບທ່ານ ນາງ ເມັ່ງ ຕາມຄຳສັ່ງຂອງສະຫະລັດ ອາເມຣິກາ ດ້ວຍຂໍ້ກ່າວຫາທີ່ບໍ່ມີຫຼັກຖານຢືນຢັນຢ່າງຊັດເຈນ ພ້ອມທັງເປີດເຜີຍວ່າທ່ານ ນາງ ເມັ່ງຢູ່ທີ່ສະໜາມບິນໃນເມືອງແວນຄູເວີພຽງຊົ່ວຄາວ ເພື່ອລໍຖ້າປ່ຽນຖ້ຽວບິນຕາມກຳນົດການເທົ່ານັ້ນ.

ໃນເວລາດຽວກັນ, ໜັງສືພິມ The Wall Street Journal ລາຍງານໂດຍອ້າງແຫຼ່ງຂ່າວວ່າ ໜ່ວຍງານດ້ານຄວາມໝັ້ນຄົງຂອງສະຫະລັດ ອາເມຣິກາເຊື່ອວ່າຫົວເວ່ຍ ເຊິ່ງປັດຈຸບັນຖືເປັນໜຶ່ງໃນບໍລິສັດດ້ານເຕັກໂນໂລຊີລາຍໃຫຍ່ຂອງໂລກ ໂດຍມີສຳນັກງານໃຫຍ່ຢູ່ທີ່ເມືອງເຊິນເຈິ້ນ ປະເທດຈີນ ໃຫ້ການສະໜັບສະໜູນດ້ານອຸປະກອນ ແລະ ການວາງລະບົບເຄືອຂ່າຍການສື່ສານແກ່ລັດຖະບານອິຣານ ແລະ ທ່ານ ເມັ່ງເປັນລູກສາວຂອງທ່ານ ເຫຼິນ ເຈິ້ງເຟີຍ ຜູ້ສ້າງຕັ້ງບໍລິສັດ ທີ່ໜ່ວຍຂ່າວກອງສະຫະລັດ ອາເມຣິກາເຊື່ອວ່າ ເຄີຍເປັນນັກວິເຄາະດ້ານເຕັກໂນໂລຊີຂອງກອງທັບປົດປ່ອຍປະຊາຊົນຈີນ.

ນອກຈາກນີ້, ສະຖານະການດັ່ງກ່າວເກີດຂຶ້ນພຽງ 1 ອາທິດ ພາຍຫຼັງນິວຊີແລນປະກາດຢຸດຕິການໃຊ້ງານລະບົບ ແລະ ອຸປະກອນໂທລະຄົມມະນາຄົມຂອງຫົວເວ່ຍ ລວມທັງການຍົກເລີກການຮ່ວມມືໃນອະນາຄົດກັບຫົວເວ່ຍ ກ່ຽວກັບໂຄງການເຄືອຂ່າຍ 5G ເນື່ອງຈາກມີຄວາມສ່ຽງຕໍ່ຄວາມໝັ້ນຄົງຂອງຊາດ ສ່ວນອົດສະຕຣາລີປະກາດແບບດຽວກັນນີ້ເມື່ອເດືອນສິງຫາ ທີ່ຜ່ານມາ.

- Advertisement -