ລັດເຊຍ ພ້ອມທີ່ຈະເພີ່ມການຜະລິດຂີປະນາວຸດ ຫາກ ສ.ອາເມຣິກາ ຖອນຕົວຈາກ INF

ສຳນັກຂ່າວຕ່າງປະເທດລາຍງານ 19 ທັນວາ 2018 ວ່າ: ທ່ານ ວະລາດີເມຍ ປູຕິນ ປະທານປະເທດລັດເຊຍ ກ່າວເມື່ອວັນອັງຄານ ທີ່ຜ່ານມາວ່າ: ເຖິງແມ່ນວ່າສະຫະລັດ ອາເມຣິກາຈະຍັງສະແດງທ່າທີ່ຂົ່ມຂູ່ທີ່ຈະຖອນຕົວອອກຈາກການເປັນພາຄີຂອງສົນທິສັນຍາອາວຸດນິວເຄຼຍພິໄສກາງ (INF) ທີ່ລົງນາມຮ່ວມກັນເມື່ອປີ 1987 ເຊິ່ງເປັນໄລຍະທ້າຍຂອງຍຸກສົງຄາມເຢັນ, ໂດຍທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາກ່າວເມື່ອເດືອນຕຸລາ ທີ່ຜ່ານມາ ແລະ ເມື່ອຕົ້ນເດືອນນີ້ທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດສະຫະລັດ ອາເມຣິກາກ່າວວ່າຫາກລັດເຊຍບໍ່ຢຸດຕິໂຄງການພັດທະນາອາວຸດນຳວິຖີຈາກພື້ນສູ່ພື້ນ ພາຍໃຕ້ລະຫັດ SSC-8 ຫຼື 9M729 ເຊິ່ງເປັນໂຄງການພັດທະນາອາວຸດລຸ້ນໃໝ່ຂອງລັດເຊຍທີ່ລັດສະໝີການຍິງເກີນວ່າທີ່ລະບຸໄວໃນ INF ພາຍໃນ 60 ວັນ ສະຫະລັດ ອາເມຣິກາຈະຖອນຕົວອອກຈາກຂໍ້ຕົກລົງ ແລະ ຈະໄປຜະລິດຂີປະນາວຸດເພີ່ມຂຶ້ນເຊັ່ນກັນ.

(Photo by Mikhail KLIMENTYEV / SPUTNIK / AFP)

ທ່ານ ປູຕິນ ຍອມຮັບວ່າ INF ເປັນຂໍ້ຕົກລົງທີ່ບໍ່ມີຄວາມສອດຄ່ອງ ເນື່ອງຈາກເນື້ອໃນຂອງຂໍ້ຕົກລົງບໍ່ແທດເໝາະອີກຕໍ່ໄປ ໂດຍປັດຈຸບັນມີປະເທດທີ່ພັດທະນາຂີປະນາວຸດ ເຊິ່ງມີໄລຍະການຍິງເກີນກວ່າທີ່ລະບຸໄວ້ຕາມຂໍ້ຕົກລົງຄືລະຫວ່າງ 500-5,500 ກິໂມແມັດ ແຕ່ບໍ່ໄດ້ຮ່ວມລົງນາມໃນຂໍ້ຕົກລົງດັ່ງກ່າວຕັ້ງແຕ່ຕົ້ນ ດ້ວຍຂໍ້ຈຳກັດຫຼາຍຢ່າງໃນໄລຍະນັ້ນ.

ເຖິງຢ່າງໃດກໍ່ຕາມ, ຜູ້ນຳລັດເຊຍກ່າວວ່າ ປັດຈຸບັນລັດເຊຍມີຂີປະນາວຸດພຽງພໍຢູ່ແລ້ວ ແລະ ລ້ວນແຕ່ເປັນອາວຸດທີ່ມີໄລຍະການຍິງຢູ່ພາຍໃຕ້ກອບຂອງ INF ໂດຍເມື່ອບໍ່ດົນມານີ້ກໍ່ປະສົບຄວາມສຳເລັດໃນການທົດລອງຂີປະນາວຸດລຸ້ນ “ຄາລິເບີ” ທີ່ຍິງອອກຈາກເຮືອດຳນ້ຳ, ຂີປະນາວຸດນຳວິຖີ KH-101 ແລະ ຂີປະນາວຸດໄຮເປີໂຊນິກຄິນຊັນລຸ້ນໃໝ່ ທີ່ມີຄວາມໄວເໜືອສຽງ 10 ເທົ່າ ແລະ ກອງທັບລັດເຊຍພ້ອມນຳອາວຸດທັງໝົດອອກມາໃຊ້ ແລະ ຜະລິດເພີ່ມອີກ ລວມທັງເພີ່ມປະສິດທິພາບຂຶ້ນຕື່ມ ຫາກເມື່ອໃດກໍ່ຕາມທີ່ສະຫະລັດ ອາເມຣິກາຖອນຕົວອອກຈາກ INF ທີ່ລັດເຊຍຍັງຄົງເຊື່ອໝັ້ນວ່າເປັນຂໍ້ຕົກລົງທີ່ສາມາດເຈລະຈາໃໝ່ໄດ້ ດ້ວຍການເພີ່ມປະເທດຄູ່ເຈລະຈາເຊັ່ນ: ຈີນ ເຊິ່ງເສັ້ນຕາຍຕາມກຳນົດຂອງທ່ານ ໄມ ພອມແພວ ຄືກາງເດືອນກຸມພາ 2019.

- Advertisement -