ລັດເຊຍປະສົບຄວາມສຳເລັດໃນການທົດລອງຂີປະນາວຸດໄຮເປີໂຊນິກ ຄວາມໄວເໜືອສຽງ

Screenshot from Russian Ministry of defense video

ສຳນັກຂ່າວຕ່າງປະເທດລາຍງານ 27 ທັນວາ 2018 ວ່າ: ທ່ານ ວະລາດິເມຍ ປູຕິນ ປະທານປະເທດລັດເຊຍ ໄດ້ຮ່ວມສັງເກດການການທົດສອບປະສິດທິພາບຂອງຕົ້ນແບບຂີປະນາວຸດໄຮເປີໂຊນິກ ຫຼື ຂີປະນາວຸດຄວາມໄວເໜືອສຽງໃນຊື່ Avangard ຫຼື YU-71 ແລະ Yu-74 ໂດຍຂີປະນາວຸດໄດ້ລອຍຂຶ້ນສູ່ອາກາດຈາກຖານຍິງດອມບາຣັອບສະກີ ຕັ້ງຢູ່ທາງທິດໃຕ້ຂອງສາຍພູຢູຣັນ ທີ່ແກ່ຍາວໄປຕາມຊາຍແດນເບື້ອງຕາເວັນຕົກຈາກພາກເໜືອສູ່ພາກໃຕ້ຂອງປະເທດ ແລະ ສາມາດທຳລາຍເປົ້າໝາຍທີ່ຢູ່ຫ່າງອອກໄປທາງພາກຕາເວັນອອກໄກອີກ 6,000 ກິໂລແມັດໄດ້ຢ່າງແມ້ນຢຳ.

ເຊິ່ງກອງທັບລັດເຊຍທົດລອງປະສິດທິພາບຂອງຂີປະນາວຸດຄວາມໄວເໜືອສຽງຊື່ Kinzhal ເມື່ອເດືອນມີນາ ທີ່ຜ່ານມາ ໂດຍການພັດທະນາຂີປະນາວຸດຄວາມໄວເໜືອສຽງ ຫຼື ຂີປະນາວຸດໄຮເປີໂຊນິກເປັນໜຶ່ງໃນອາວຸດຕາມໂຄງການຍົກລະດັບຂີດຄວາມສາມາດດ້ານວຽກງານປ້ອງກັນປະເທດ ທີ່ທ່ານ ປູຕິນ ປະກາດເມື່ອເດືອນມີນາ ທີ່ຜ່ານມາ ເຊິ່ງໃນສ່ວນຂອງຂີປະນາວຸດ Avangard ຄາດວ່າຈະເຂົ້າປະຈຳການໃນປີໜ້າ.

(Photo by Mikhail KLIMENTYEV / SPUTNIK / AFP)

ເຖິງຢ່າງໃດກໍ່ຕາມ, ການເຄື່ອນໄຫວທາງທະຫານດັ່ງກ່າວຂອງລັດເຊຍ ເກີດຂຶ້ນໃນໄລຍະທີ່ຄວາມຂັດແຍ່ງກັບສະຫະລັດ ອາເມຣິກາ ໃນປະເດັນທີ່ສະຫະລັດ ອາເມຣິກາສະແດງທ່າທີຂົ່ມຂູ່ວ່າຈະຖອນຕົວອອກຈາກການເປັນພາຄີຂອງສົນທິສັນຍາອາວຸດນິວເຄຼຍພິໄສກາງ (INF) ເຊິ່ງເປັນຂໍ້ຕົກລົງສອງຝ່າຍ ທີ່ລົງນາມຮ່ວມກັນເມືື່ອເດືອນທັນວາ 1987 ໂດຍເປັນໄລຍະທ້າຍຂອງສົງຄາມເຢັນ.