ປີ 2019 ລັດຈະເລັ່ງໃສ່ຄຸ້ມຄອງສື່ສັງຄົມອອນລາຍ ແລະ ການຄ້າຂາຍ-ໂຄສະນາຜ່ານສື່ອອນລາຍ

ຫ້ອງວ່າການສຳນັກງານນາຍົກລັດຖະມົນຕີລາຍງານວ່າ: ​​​​ເມື່ອວັນທີ 11 ມັງກອນ 2019 ທີ່ຜ່ານມາ, ທີ່ສຳນັກງານນາຍົກລັດຖະມົນຕີ, ຄະນະກຳມະການຄຸ້ມຄອງອິນເຕີເນັດແຫ່ງຊາດ (ຄຄອຊ) ໄດ້ຈັດກອງປະຊຸມສະຫຼຸບການເຄື່ອນໄຫວວຽກງານ ປະຈຳປີ 2018 ແລະ ວາງທິດທາງປະຈໍາປີ 2019 ໂດຍການເປັນປະທານຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ປະທານຄະນະກຳມະການຄຸ້ມຄອງອິນເຕີເນັດແຫ່ງຊາດ, ມີບັນດາທ່ານໃນຄະນະນະຮັບຜິດຊອບວຽກງານດັ່ງກ່າວຈາກ ກະຊວງໄປສະນີ, ໂທລະຄົມມະນາຄົມ ແລະ ການສື່ສານ; ກະຊວງປ້ອງກັນປະເທດ; ກະຊວງປ້ອງກັນຄວາມສະຫງົບ; ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ກະຊວງການຕ່າງປະເທດ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.

ວຽກງານພົ້ນເດັ່ນ ທີ່ຄະນະກຳມະການຄຸ້ມຄອງອິນເຕີເນັດແຫ່ງຊາດ ໄດ້ຈັດຕັ້ງປະຕິບັດໃນຕະຫຼອດ 1 ປີ ທີ່ຜ່ານມາ ລວມມີວຽກງານການສ້າງ ແລະ ເຜີຍແຜ່ບັນດານິຕິກໍາ ທີ່ກ່ຽວຂ້ອງກັບການຄຸ້ມຄອງອິນເຕີເນັດ ໂດຍສະເພາະ ແມ່ນກົດໝາຍ ວ່າດ້ວຍລາຍເຊັນເອເລັກໂຕຣນິກ ທີ່ໄດ້ຜ່ານໃນກອງປະຊຸມສະພາແຫ່ງຊາດ ຄັ້ງທີ່ຜ່ານມາ ແລະ ປັດຈຸບັນ ຄະນະຮັບຜິດຊອບກໍ່ສຳເລັດການປັບປຸງ ເພື່ອສະເໜີອອກກົດໝາຍຕາມຂັ້ນຕອນ. ນອກນີ້ ກໍ່ຍັງມີການເຜີຍແຜ່ຕອບຕ້ານ ແລະ ຕິດຕາມກວດກາບັນຫາງສຽງທີ່ບໍ່ດີໃນສັງຄົມ ຜ່ານຊ່ອງທາງສື່ສັງຄົມອອນລາຍ, ໃນນັ້ນ ບັນດາຂະແໜງການທີ່ກ່ຽວຂ້ອງ ເປັນຕົ້ນ ກະຊວງໄປສະນີ, ໂທລະຄົມມະນາຄົມ ແລະ ການສື່ສານ ແລະ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ກໍ່ໄດ້ເຄື່ອນໄຫວປູກຈິດສຳນຶກ ໃຫ້ແກ່ພະນັກງານ ແລະ ສັງຄົມ ໂດຍມີການລົງໂຄສະນາເຜີຍແຜ່ ຜົນດີ-ຜົນຮ້າຍ ແລະ ໄພອັນຕະລາຍ ຂອງການນຳໃຊ້ ສື່ສັງຄົມອອນລາຍ ໃນທາງທີ່ບໍ່ຖືກຕ້ອງ. ສ່ວນວຽກງານດ້ານເຕັກນິກ ທີ່ຕິດພັນກັບການປ້ອງກັນຊາດ-ປ້ອງກັນຄວາມສະຫງົບ ລວມທັງ ວຽກງານກວດກາການນໍາໃຊ້ ຄື້ນຄວາມຖີ່ ແລະ ສັນຍານອິນເຕີເນັດທີ່ບໍ່ຖືກລະບຽບ, ວຽກງານການຂຶ້ນທະບຽນຊິມຄາດ ແລະ ວຽກງານການຄຸ້ມຄອງ ເອເລັກໂຕຣນິກຂອງລັດຖະບານ ທີ່ອໍານວຍຄວາມສະດວກໃຫ້ແກ່ການເຮັດວຽກ, ເກັບກໍາຂໍ້ມູນ ແລະ ການຕິດຕໍ່ສື່ສານ ພາຍໃນກົງຈັກລັດ ກໍ່ໄດ້ດຳເນີນໄປ ຢ່າງມີປະສິດທິພາບ ແລະ ໄດ້ປະສິດທິຜົນດີເປັນກ້າວໆ.

​​​ສຳລັບທິດທາງແຜນການໃນຕໍ່ໜ້າ, ຄະນະກຳມະການຄຸ້ມຄອງອິນເຕີເນັດແຫ່ງຊາດ ຈະສືບຕໍ່ສ້າງນິຕິກຳລຸ່ມກົດໝາຍ ກ່ຽວກັບເຕັກໂນໂລຊີການສື່ສານຂໍ້ມູນຂ່າວສານທີ່ຍັງເປັນຊ່ອງວ່າງ, ນິຕິກຳຄຸ້ມຄອງສື່ສັງຄົມອອນລາຍ, ອິນເຕີເນັດ, ການຄ້າຂາຍ-ໂຄສະນາຜ່ານສື່ອອນລາຍ ແລະ ອື່ນໆ ໃຫ້ຄົບຖ້ວນ-ສົມບູນກວ່າເກົ່າ ຕິດພັນກັບການສ້າງນິຕິກໍາທີ່ກ່ຽວຂ້ອງກັບການບໍລິຫານລັດດ້ວຍເອເລັກໂຕຣນິກ; ສືບຕໍ່ຊຸກຍູ້ສົ່ງເສີມ ແລະ ຜັກດັນວຽກງານສ້າງຈິດສຳນຶກ, ການເຜີຍແຜ່ຕອບຕ້ານ, ກວດກາຕິດຕາມ ຫາງສຽງສັງຄົມ ຜ່ານສື່ຕ່າງໆ ລວມທັງ ການພັດທະນາ ແລະ ຄຸ້ມຄອງດ້ານເຕັກນິກ ທີ່ຕິດພັນກັບວຽກງານປ້ອງກັນຊາດ-ປ້ອງກັນຄວາມສະຫງົບ ໃຫ້ຮັບປະກັບຄວາມປອດໄພ ແລະ ມີຜົນສຳເລັດເປັນຢ່າງດີ; ສືບຕໍ່ເຄື່ອນໄຫວຖອດຖອນບົດຮຽນ ແລະ ກໍ່ສ້າງບຸກຄະລາກອນ ໃຫ້ມີຄວາມຮູ້ຄວາມສາມາດ ແລະ ກາຍເປັນຊ່ຽວຊານຫຼາຍຂຶ້ນ.

​​​ໃນກອງປະຊຸມ ຍັງໄດ້ເຜີຍແຜ່ ດຳລັດ ວ່າດ້ວຍການຈັດຕັ້ງ ແລະ ເຄື່ອນໄຫວຂອງ ຄະນະກຳມະການຄຸ້ມຄອງອິນເຕີເນັດ ແຫ່ງຊາດ ສະບັບເລກທີ 559/ນຍ, ລົງວັນທີ 31 ທັນວາ 2018 ທີ່ເປັນບ່ອນອີງທີ່ສຳຄັນ ໃຫ້ແກ່ການເຄື່ອນໄຫວວຽກງານ ຂອງຄະນະ ຄຄອຊ. ພ້ອມນີ້ ກໍ່ໄດ້ຜ່ານຮ່າງ ດຳລັດ ວ່າດ້ວຍລະບົບສາຍສົ່ງໂທລະຄົມມະນາຄົມ ເພື່ອປັບປຸງ ແລະ ແກ້ໄຂຂໍ້ຫຍຸ້ງຍາກ ຂອງວຽກງານການຄຸ້ມຄອງໂຄງລ່າງພື້ນຖານ ລະບົບສາຍສົ່ງໂທລະຄົມມະນາຄົມ ແລະ ອິນເຕີເນັດ ໃຫ້ດີຂຶ້ນກວ່າເກົ່າ, ເຊິ່ງກອງປະຊຸມ ໄດ້ເຫັນດີດ້ານເນື້ອໃນ ແລະ ຊີ້ນຳໃຫ້ສືບຕໍ່ປະຕິບັດຕາມຂັ້ນຕອນ ຂອງການສ້າງນິຕິກໍາ ເພື່ອສະເໜີ ລັດຖະບານ ພິຈາລະນາ ໃນປີ 2019 ນີ້. ​