ເກີດເຫດໂຈມຕີໂຮງແຮມໃຈກາງນະຄອນຫຼວງປະເທດເຄນຢາ ເສຍຊີວິດຈຳນວນຫຼາຍ (ວິດີໂອ)

(Photo by SIMON MAINA / AFP)

ສຳນັກຂ່າວຕ່າງປະເທດລາຍງານ 16 ມັງກອນ 2019: ຈາກຄຳບອກເລົ່າຂອງພະຍານລະບຸວ່າ ເມື່ອເວລາປະມານ 15:00 ໂມງຂອງວັນອັງຄານ 15 ມັງກອນ ທີ່ຜ່ານມາ ຕາມເວລາທ້ອງຖິ່ນ (ກົງກັບເວລາ 19:00 ໂມງ ໃນປະເທດລາວ) ມີສຽງປືນດັງຂຶ້ນ ແລະ ລະເບີດຂ້າຕົວຕາຍຈາກການໂຈມຕີເປົ້າໝາຍໂຮງແຮມ DusitD2 ໃນເຂດທຸລະກິດຂອງນະຄອນຫຼວງໄນໂຣບີ  ປະເທດເຄນຢາ.

(Photo by KABIR DHANJI / AFP)

ກຸ່ມຫົວຮຸນແຮງໃນປະເທດໂຊມາລີ ອັນ-ຊາບັບ ເຊິ່ງເຄີຍຢູ່ເບື້ອງຫຼັງການໂຈມຕີສູນການຄ້າເວສເກດ ໃນນະຄອນຫຼວງໄນໂຣບີ ເມື່ອປີ 2013 ໄດ້ອອກມາປະກາດວ່າຢູ່ເບື້ອງຫຼັງການໂຈມຕີຄັ້ງນີ້ ແລະ ຍັງຖືເປັນການໂຈມຕີຕັ້ງອຳທິດໃນຮອບ 5 ປີ, ທ່ານ ໂຈເຊັບ ໂບອິນເນດ ຜູ້ບັນຊາການຕຳຫຼວດເຄນຢາຖະແຫຼງວ່າ ຕຳຫຼວດຢືນຢັນໄດ້ວ່າມີການກໍ່ເຫດຮ້າຍຂຶ້ນເມື່ອເວລາປະມານ 15:00 ໂມງ ໃນເຂດທຸລະກິດຂອງນະຄອນຫຼວງໄນໂຣບີ ເລີ່ມຈາກທະນາຄານ I&M ດ້ວຍການລະເບີດເຮັດໃຫ້ລົດ 3 ຄັນທີ່ລານຈອດລົດໄດ້ຮັບຄວາມເສຍຫາຍ ຈາກນັ້ນຕໍ່ດ້ວຍການລະເບີດຂ້າຕົວຕາຍທີ່ຫ້ອງໂຖງຂອງໂຮງແຮມ DusitD2 ມີແຂກທີ່ມາໃຊ້ບໍລິການໄດ້ຮັບບາດເຈັບສາຫັດ ແຕ່ຍັງເປີດເຜີຍຕົວເລກບໍ່ໄດ້.

(Photo by KABIR DHANJI / AFP)

ແຕ່ຊ່າງພາບຂອງສຳນັກຂ່າວ AFP ລາຍງານວ່າ: ເຫັນສົບຜູ້ເສຍຊີວິດຢ່າງໜ້ອຍ 5 ຄົນ ຢູ່ບໍລິເວນໂຕະອາຫານ ໃນຮ້ານອາຫານລະບຽງຂອງໂຮງແຮມ, ຂະນະທີ່ແຫຼ່ງຂ່າວຕຳຫຼວດກ່າວວ່າ ເຫັນພົບຜູ້ເສຍຊີວິດຫຼາຍເຖິງ 14 ຄົນ, ນອກຈາກນີ້, ຕຳຫຼວດໜ່ວຍປະຕິບັດການພິເສດຂອງເຄນຢາ ກໍ່ໄດ້ໃຫ້ການຊ່ວຍເຫຼືອໃນການອົບພະຍົບຄົນອອກຈາກອາຄານ ພາຍຫຼັງເກີດເຫດ.