ລັດຖະບານ ສ.ອາເມຣິກາ ຟ້ອງຫົວເຫວີ່ຍ 23 ຂໍ້ຫາ ແລະ ພ້ອມຂໍຕົວຜູ້ບໍລິຫານຫົວເຫວີ່ຍຈາກການາດາ

ສຳນັກຂ່າວຕ່າງປະເທດລາຍງານເມື່ອວັນທີ 28 ມັງກອນ 2019 ທີ່ຜ່ານມາວ່າ: ທ່ານ ແມັດທິວ ວິເທັກເກີ ຮັກສາການລັດຖະມົນຕີກະຊວງຍຸຕິທຳສະຫະລັດ ອາເມຣິກາ ຖະແຫຼງເລື່ອງການຮ້ອງຟ້ອງຄະດີອາຍາ 13 ຂໍ້ຫາຕໍ່ບໍລິສັດຫົວເຫວີ່ຍ ເຕັກໂນໂລຊີ ຜູ້ຜະລິດອຸປະກອນສື່ສານ ແລະ ໂທລະຄົມມະນາຄົມລາຍໃຫຍ່ທີ່ສຸດຂອງໂລກຈາກປະເທດຈີນ ຕາມທີ່ລັດຖະບານກາງສະຫະລັດ ອາເມຣິກາໄດ້ຍື່ນຟ້ອງຕໍ່ສານເຂດນິວຢອກຕາເວັນອອກ ໃນຂໍ້ຫາເຈດຕະນາຊັກນຳໃຫ້ສະຖາບັນການເງິນທັງໃນສະຫະລັດ ອາເມຣິກາ ແລະ ຕ່າງປະເທດທີ່ມີສຳນັກງານໃນສະຫະລັດ ອາເມຣິກາເຂົ້າໃຈຜິດກ່ຽວກັບສາຍພົວພັນລະຫວ່າງສຳນັກງານໃຫຍ່ຂອງຫົວເຫວີ່ຍ ທີ່ເມືອງເຊິນເຈິ້ນ ກັບບໍລິສັດໃນເຄືອ 2 ແຫ່ງຄື: Huawei Device USA ກັບ Skycom ໃນການລັກລອບເຮັດທຸລະກຳກັບອີຣານ.

A Huawei logo (Photo by Josep LAGO / AFP)

ຂະນະດຽວກັນ, ລັດຖະບານສະຫະລັດ ອາເມຣິກາຍັງໄດ້ຟ້ອງ Huawei Device USA  ແລະ Skycom ໃນຂໍ້ຫາເຈດຕະນາຈາລະກຳຂໍ້ມູນລັບດ້ານເຕັກໂນໂລຊີຈາກສຳນັກງານໃນສະຫະລັດ ອາເມຣິກາຂອງບໍລິສັດ T-Mobile ຈາກເຢຍລະມັນ, ການສໍ້ໂກງຜ່ານລະບົບທະນາຄານ ແລະ ຂັດຂວາງຂະບວນການຍຸຕິທຳລວມ 10 ຂໍ້ຫາ ໂດຍຂໍ້ຫາທັງໝົດໃນສ່ວນນີ້ ໄດ້ຍື່ນຟ້ອງຕໍ່ສານໃນນະຄອນຫຼວງວໍຊິງຕັນ, ເຊິ່ງສຳນວນຂອງໄອຍະການລະບຸວ່າ ຫົວເຫວີ່ຍຈາລະກຳຂໍ້ມູນຂອງ T-Mobile ທີ່ຮຽກວ່າ Tappy ເຊິ່ງເປັນລະບົບສຳຜັດດ້ວຍນິ້ວມືຈຳລອງໃນການທົດລອງປະສິດທິພາບຂອງ Smart Phone.

Huawei Technologies Chief Financial Officer Meng Wanzhou (Photo by – / CTV / AFP) / – Canada OUT

ເຊິ່ງແນ່ນອນວ່າ ຈຳເລີຍຄົນສຳຄັນມີພຽງຄົນດຽວຄື: ທ່ານ ນາງ ເມິ້ງ ຫວ່ານໂຈ ປະທານຄະນະບໍລິຫານດ້ານການເງິນຂອງຫົວເຫວີ່ຍ ເຊິ່ງເປັນລູກສາວຂອງທ່ານ ເຫຼິນ ເຈິ້ງເຟີຍ ຜູ້ສ້າງຕັ້ງບໍລິສັດຫົວເຫວີ່ຍອີກດ້ວຍ, ໂດຍທ່ານ ຄຼິສໂຕເຟີ ເຣ ຜູ້ອຳນວຍການສຳນັກງານສອບສວນກາງ (FBI) ກ່າວວ່າລັດຖະບານສະຫະລັດ ອາເມຣິກາຈະຍື່ນຄຳຮ້ອງຕໍ່ການາດາໃຫ້ທັນພາຍໃນກຳນົດ 60 ວັນຕາມກົດໝາຍຂອງການາດາຄື ພາຍໃນວັນທີ 30 ມັງກອນ ນີ້ ເພື່ອຂໍໃຫ້ລັດຖະບານການາດາເນລະເທດທ່ານ ນາງ ເມິ້ງ ຫວ່ານໂຈມາດຳເນີນຄະດີດໃນສະຫະລັດ ອາເມຣິກາ ໃນຖານະຄົນຜູ້ຮ້າຍຂ້າມແດນ ໂດຍທາງການການາດາໄດ້ຈັບກຸມຕົວທ່ານ ນາງ ເມິ້ງ ຫວ່ານໂຈ ເມື່ອວັນທີ 1 ທັນວາ ປີທີ່ຜ່ານມາ ຕາມໝາຍຈັບຂອງສະຫະລັດ ອາເມຣິກາ ແລະ ທ່ານ ນາງ ມີກຳນົດຂຶ້ນສານທີ່ເມືອງແວນດູເວີ ໃນວັນທີ 6 ກຸມພາ ນີ້.

ໃນດ້ານຂອງລັດຖະບານຈີນ ແລະ ສະຖານເອກອັກຄະລັດຖະທູດຈີນທັງໃນສະຫະລັດ ອາເມຣິກາ ແລະ ການາດາຍັງບໍ່ສະແດງທ່າທີຕໍ່ບັນຫາດັ່ງກ່າວ, ຂະນະທີ່ ທ່ານ ນາງ ຄຼິສເທຍ ຟຣີແລນ ລັດຖະມົນຕີກະຊວງການຕ່າງປະເທດການາດາ ກ່າວເຖິງການທີ່ທ່ານ ຈັສຕິນ ທຣູໂດ ນາຍົກລັດຖະມົນຕີການາດາປົດທ່ານ ຈອນ ແມັກຄໍລຳ ອອກຈາກຕຳແໜ່ງເອກອັກຄະລັດຖະທູດການາດາ ປະຈຳນະຄອນຫຼວງປັກກິ່ງ ເມື່ອທ້າຍອາທິດທີ່ຜ່ານມາ ວ່າເປັນເພາະທັດສະນະຂອງນັກການທູດອາວຸໂສຕໍ່ຄະດີຫົວເຫວີ່ຍຈະຍິ່ງເຮັດໃຫ້ການດຳເນີນການຕໍ່ບັນຫາດັ່ງກ່າວ ພົບກັບຄວາມຫຍຸ້ງຍາກຂຶ້ນຕື່ມ.

ການາດາປົດທູດປະຈຳປະເທດຈີນ ທ່າມກາງຄວາມເຄັ່ງຕຶງເລື່ອງຜູ້ບໍລິຫານຫົວເຫວີ່ຍ


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube