ປ.ທຣຳ ຢືນຢັນ ມີແຜນຈະໃຊ້ກຳລັງທະຫານ ຕໍ່ເວເນຊູເອລາ

(FILES) US President Donald Trump (Photo by Jim WATSON / AFP)

ສຳນັກຂ່າວຕ່າງປະເທດລາຍງານເມື່ອວັນທີ 3 ກຸມພາ 2019 ທີ່ຜ່ານມາວ່າ: ທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ກ່າວໃນຕອນໜຶ່ງຂອງລາຍການ “Face the Nation” ທີ່ອອກອາກາດທາງສະຖານີໂທລະພາບ CBSN ກ່ຽວກັບສະຖານະການໃນເວເນຊູເອລາ ວ່າທ່ານໄດ້ຮັບການຕິດຕໍ່ຈາກທ່ານ ນິໂຄລັສ ມາດູໂຣ ປະທານປະເທດເວເນຊູເອລາ ເມື່ອ 2 ເດືອນທີ່ຜ່ານມາ ແຕ່ໄດ້ປະຕິເສດໄປເນື່ອງຈາກຄະນະຂອງທ່ານ ໂດໂນ ທຣຳ ໄດ້ກຽມການໄປໄກແລ້ວ ລວມເຖິງການໃຊ້ມາດຕະການທາງທະຫານທີ່ຖືເປັນໜຶ່ງໃນທາງເລືອກ.

ເຊິ່ງທຳນຽບຂາວປະກາດຍອມຮັບເອົາທ່ານ ຮວນ ກວຍໂດ ຜູ້ນຳຝ່າຍຄ້ານ ແລະ ທັງເປັນປະທານສະພາແຫ່ງຊາດຂອງເວເນຊູເອລາ ທີ່ຕັ້ງຕົນເອງຂຶ້ນມາເປັນຜູ້ນຳ ໃນຖານະ “ຜູ້ນຳຮັກສາການ” ເມື່ອວັນທີ 23 ມັງກອນ ທີ່ຜ່ານມາ, ຂະນະທີ່ເມື່ອອາທິດທີ່ຜ່ານມາ ກໍ່ໄດ້ເພີ່ມມາດຕະການຂວໍ້າບາດຕໍ່ບໍລິສັດ PDVSA ເຊິ່ງເປັນລັດວິສາຫະກິດພະລັງງານຂອງເວເນຊູເອລາ ໂດຍຫ້າມພົນລະເມືອງສະຫະລັດ ອາເມຣິກາເຮັດທຸລະກິດຮ່ວມກັບ PDVSA ແລະ ອາຍັດຊັບສິນຂອງ PDVSA ທີ່ມີຢູ່ໃນສະຫະລັດ ອາເມຣິກາ ແຕ່ຍັງບໍ່ຫ້າມບໍລິສັດຂອງສະຫະລັດ ອາເມຣິກາຊື້ນ້ຳມັນຈາກ PDVSA ແລະ ກ່າວວ່າມາດຕະການຂວໍ້າບາດທັງໝົດຈະຖືກຍົກເລີກທັນທີທີ່ PDVSA ໃຫ້ການຍອມຮັບເອົາທ່ານ ຮວນ ກວຍໂດ ເປັນຜູ້ນຳ.

ຂະນະທີ່ທ່ານ ຈອນ ໂບຕັ້ນ ທີ່ປຶກສາດ້ານຄວາມໝັ້ນຄົງແຫ່ງຊາດປະຈຳທຳນຽບຂາວ ກ່າວວ່າສະຫະລັດ ອາເມຣິກາໄດ້ຈັດສົ່ງວັດຖຸສິ່ງຂອງບັນເທົາທຸກ ໄປຍັງເວເນຊູເອລາ ຕາມຄຳຮ້ອງຂໍຂອງທ່ານ ຮວນ ກວຍໂດ ເຊິ່ງເປັນ “ຮັກສາການປະທານປະເທດ” ແຕ່ການທີ່ຜູ້ນຳຝ່າຍຄ້ານ ແລະ ທັງເປັນປະທານສະພາແຫ່ງຊາດ ອາຍຸພຽງ 35 ປີ ບໍ່ໄດ້ມີອຳນາດໃນການຄຸ້ມຄອງບັນດາກະຊວງ ແລະ ພື້ນທີ່ເຂດໃດຢ່າງເປັນທາງການ, ທ່ານ ຮວນ ກວຍໂດ ເປີດເຜີຍວ່າໄດ້ໃຊ້ວິທີປະສານງານໄປຍັງປະເທດເພື່ອນບ້ານ ທີ່ມີປະຊາຊົນເວເນຊູເອລາລີ້ໄພຢູ່ ໃນການຂໍຕັ້ງສູນຊົ່ວຄາວເພື່ອເປັນສະຖານທີ່ຈັດເກັບ ແລະ ກະຈາຍວັດຖຸສິ່ງຂອງ ລວມທັງກ່ອມໃຫ້ກອງທັບເວເນຊູເອລາມາຢູ່ຂ້າງຕົນ.

ໃນດ້ານຂອງທ່ານ ນິໂຄລັສ ມາດູໂຣ ກໍ່ໄດ້ປະນາມການເຄື່ອນໄຫວດັ່ງກ່າວ ວ່າເປັນແຜນການບັງໜ້າຂອງສະຫະລັດ ອາເມຣິກາ ໃນການແຊກແຊງທາງທະຫານຕໍ່ເວເນຊູເອລາໃນອະນາຄົດ ແລະ ປະກາດຢ່າງເປັນທາງການປະຕິເສດເສັ້ນຕາຍຂອງສະຫະພາບເອີຣົບ  (EU) ເຊິ່ງມີປະເທດຂະໜາດໃຫຍ່ເປັນແກນນຳລວມເຖິງເຢຍລະມັນ, ຝຣັ່ງ ແລະ ແອັດສະປາຍ ໃນການບັງຄັບໃຫ້ເວເນຊູເອລາຈັດການເລືອກຕັ້ງໃໝ່ພາຍໃນ 8 ວັນ ນັບຕັ້ງແຕ່ວັນທີ 26 ມັງກອນ ທີ່ຜ່ານມາ ພ້ອມທັງໄດ້ສັ່ງໃຫ້ກອງທັບເຝິກຊ້ອມຮົບ ບໍລິເວນຝັ່ງເບື້ອງຕາເວັນອອກສຽງເໜືອຂອງປະເທດອີກດ້ວຍ.