ການເມືອງໄທຮ້ອນແຮງ ເມື່ອເຈົ້າຍິງອຸບົນຣັດຕະນະ ມະຫິດົນ ລົງສະໝັກເລືອກຕັ້ງນາຍົກ

(Photo by Martin BUREAU / AFP)

ສຳນັກຂ່າວຕ່າງປະເທດລາຍງານ 8 ກຸມພາ 2019 ວ່າ: ການເລືອກຕັ້ງທົ່ວໄປຂອງໄທທີ່ຈະຈັດຂຶ້ນໃນວັນທີ 24 ມີນານີ້ ໄດ້ດຳເນີນໄປຢ່າງຂຸ້ນຂ້ຽວ ໂດຍມີບັນດາພັກການເມືອງຕ່າງສະເໜີຊື່ຕົວແທນພັກ ເພື່ອເຂົ້າຊິງຕຳແໜ່ງນາຍົກລັດຖະມົນຕີ, ຫຼ້າສຸດຄະນະກຳມະການບໍລິຫານພັກໄທຣັກສາຊາດ ນຳໂດຍທ່ານ ປຣີຊາພົນ ພົງພານິສ ໄດ້ເຂົ້າຍື່ນລາຍຊື່ນາຍົກໃນບັນຊີລາຍຊື່ ຕໍ່ຄະນະກຳມະການເລືອກຕັ້ງແຫ່ງຊາດໄທ ໂດຍແມ່ນເຈົ້າຍິງອຸບົນຣັດຕະນະ ມະຫິດົນ ເປັນຕົນແທນພັກ.

(Photo by Krit Phromsakla Na SAKOLNAKORN / THAI NEWS PIX / AFP)

ເຈົ້າຍິງອຸບົນຣັດຕະນະ ມະຫິດົນ ເປັນພະລາຊະທິດາອົງໃຫຍ່ ໃນພະບາດສົມເດັດພູມິພົນອະດຸນຍະເດດ ເຈົ້າມະຫາຊີວິດໄທ ລາຊະການທີ 9 ກັບ ສົມເດັດພະລາຊິນີສິຣິກິດ, ເຊິ່ງເມື່ອປີ 1972 ເຈົ້າຍິງອຸບົນຣັດຕະນະ ໄດ້ລາອອກຈາກຖານັນດອນສັກແຫ່ງລາຊະວົງໄທ ເພື່ອສົມລົດກັບສາມັນຊົນຊາວອາເມຣິກາ, ຕໍ່ມາປີ 1998 ເຈົ້າຍິງອຸບົນຣັດຕະນະ ໄດ້ຢ່າຮ້າງກັບຄູ່ສົມລົດ ແລະ ໃນປີ 2001 ໄດ້ກັບມາຍັງປະເທດໄທເປັນການຖາວອນ ເຊິ່ງນັບແຕ່ນັ້ນມາກໍ່ໄດ້ປະຕິບັດໜ້າທີ່ໃນຖານະຕົວແທນລາຊະວົງໄທປະຕິບັດໜ້າທີ່ຕ່າງໆພາຍໃນປະເທດຕະຫຼອດມາ.