ເກົາຫຼີເໜືອຮຽກຮ້ອງໃຫ້ ສ.ອາເມຣິກາ ຍົກເລີກການຂວໍ້າບາດຈິງ ແຕ່ ສ.ອາເມຣິກາຍັງຮັບບໍ່ໄດ້

North Korean Foreign Minister Ri Yong Ho (R) speaks as vice-minister of Foreign Affairs Choe Son Hui looks on during a press conference in Hanoi early on March 1, 2019, following the US-North Korea summit. (Photo by Huy PHONG / AFP)

ສຳນັກຂ່າວຕ່າງປະເທດລາຍງານ 1 ມີນາ 2019 ວ່າ: ທ່ານ ຣີ ຢອງ-ໂຮ ລັດຖະມົນຕີກະຊວງການຕ່າງປະເທດເກົາຫຼີເໜືອຖະແຫຼງວ່າ ເກົາຫຼີເໜືອໄດ້ຍື່ນຂໍ້ສະເໜີໃຫ້ສະຫະລັດ ອາເມຣິກາຍົກເລີກມາດຕະການຂວໍ້າບາດຈິງ ໃນລະຫວ່າງກອງປະຊຸມສຸດຍອດ ຄັ້ງທີ II ລະຫວ່າງທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ແລະ ທ່ານ ຄິມ ຈອງ-ອຶນ ຜູ້ນຳສູງສຸດຂອງເກົາຫຼີເໜືອ, ທີ່ນະຄອນຫຼວງຮ່າໂນ້ຍ ເມື່ອວັນທີ 28 ກຸມພາທີ່ຜ່ານມາ. ເຊິ່ງກອງປະຊຸມດັ່ງກ່າວໄດ້ຈົບລົງໂດຍບໍ່ມີການລົງນາມໃນຂໍ້ຕົກລົງໃດໆ ແຕ່ທ່ານ ໂດໂນ ທຣຳ ໄດ້ຍອມຮັບວ່າ ເກົາຫຼີເໜືອໄດ້ກ້າວໄປອີກຂັ້ນໜຶ່ງແລ້ວ ໃນການທຳລາຍໂຮງງານນິວເຄຼຍໃນເມືອງຢອງບະຢອນ.

ລັດຖະມົນຕີກະຊວງການຕຂ່າງປະເທດເກົາຫຼີເໜືອກ່າວອີກວ່າ ເກົາຫຼີເໜືອໄດ້ສະເໜີທີ່ຈະທຳລາຍຖິ້ມຢ່າງຖາວອນສຳລັບພູໂຕນຽມ ແລະ ຢູເຣນຽມທີ່ໃຊ້ໃນການຜະລິດນິວເຄຼຍ ເຊິ່ງຜູ້ຊ່ຽວຊານສະຫະລັດ ອາເມຣິກາໄດ້ກວດພົບ, ນອກຈາກນັ້ນເກົາຫຼີເໜືອຍັງໄດ້ສະເໜີໃຫ້ສະຫະລັດ ອາເມຣິກາຍົກເລີກມາດຕະການຂວໍ້າບາດເກົາຫຼີເໜືອໃນບາງສ່ວນ ແຕ່ບໍ່ແມ່ນທັງໝົດ, ເຊິ່ງຂັດກັບຄຳກ່າວຂອງທ່ານ ໂດໂນ ທຣຳ ທີ່ຖະແຫຼງກ່ອນໜ້ານັ້ນວ່າ ຕົນໄດ້ຍ່າງອອກຈາກກອງປະຊຸມເລື່ອງຂໍ້ຕົກລົງນິວເຄຼຍ ທີ່ນະຄອນຫຼວງຮ່າໂນ້ຍ ເມື່ອວັນທີ 28 ກຸມພາທີ່ຜ່ານມາ ເພາະຮັບບໍ່ໄດ້ກັບຂໍ້ຮຽກຮ້ອງຂອງຜູ້ນຳເກົາຫຼີເໜືອ ທີ່ຈະໃຫ້ຍົກເລີກມາດຕະການຂວໍ້າບາດທີ່ມີສະຫະລັດ ອາເມຣິກາເປັນແກນນຳ.