ສປປ.ລາວ-ລັດເຊຍ ຈະປຶກສາຫາລືກ່ຽວກັບວຽກງານດ້ານຄວາມໝັ້ນຄົງຮ່ວມກັນ

ລາຍງານ 24 ເມສາ 2019, ທາງການລັດເຊຍຖະແຫຼງວ່າ: ທ່ານ ນິໂກລາຍ ປາຕຣູເຊບ ເລຂາທິການສະພາຄວາມໝັ້ນຄົງແຫ່ງລັດເຊຍ ຈະເດີນທາງຢ້ຽມຢາມ ແລະ ເຮັດວຽກຢູ່ ສປປ.ລາວ ໃນລະຫວ່າງວັນທີ 25-26 ເມສາ 2019 ເພື່ອປຶກສາຫາລືກ່ຽວກັບບັນຫາວຽກງານດ້ານຄວາມປອດໄພ.

Russian Security Council Secretary Nikolay Patrushev

ໃນຂະນະດຽວກັນ, ທ່ານ ພົນເອກ ຈັນສະໝອນ ຈັນຍາລາດ ລັດຖະມົນຕີກະຊວງປ້ອງກັນປະເທດຂອງລາວ ກໍ່ໄດ້ເຂົ້າຮ່ວມກອງປະຊຸມຄວາມໝັ້ນຄົງສາກົນມົດສະກູ ຄັ້ງທີ 8 ທີ່ຈັດຂຶ້ນໃນລະຫວ່າງວັນທີ 23-25 ເມສານີ້ ທີ່ລັດເຊຍ ແລະ ໄດ້ພົບປະກັບທ່ານ ເຊີເກ ຊອຍກູ ລັດຖະມົນຕີກະຊວງປ້ອງກັນປະເທດລັດເຊຍ.

ເຊິ່ງທ່ານ ເຊີເກ ຊອຍກູ ໄດ້ສະແດງຄວາມຂອບອົກຂອບໃຈເປັນພິເສດແກ່ຝ່າຍລາວ ທີ່ໄດ້ມອບລົດຕັງ T-34 ຈຳນວນ 30 ຄັນໃຫ້ແກ່ກະຊວງປ້ອງກັນປະເທດລັດເຊຍ ພ້ອມທັງກ່າວວ່າ ລັດເຊຍ ແລະ ສປປ.ລາວ ມີສາຍພົວພັນກັນມາຢ່າງຍາວນານ ແລະ ເປັນພັນທະມິດທີ່ເຊື່ອຖືໄດ້ໃນອາຊີຕາເວັນອອກສຽງໃຕ້.

ໃນດ້ານຂອງລັດເຊຍເອງກໍ່ໄດ້ໃຫ້ການຊ່ວຍເຫຼືອດ້ານມະນຸດສະທຳແກ່ ສປປ.ລາວ ໃນການເກັບກູ້ລະເບີດບໍ່ທັນແຕກ ຢູ່ແຂວງບໍລິຄຳໄຊ ໂດຍລະເບີດດັ່ງກ່າວເປັນລະເບີດທີ່ຕົກຄ້າງມາແຕ່ປາງສົງຄາມ ທີ່ສະຫະລັດ ອາເມຣິກາ ນຳມາຖິ້ມໃສ່ ສປປ.ລາວ ລະຫວ່າງປີ 1964-1973.

ນອກຈາກນີ້, ໃນປີໜ້າທີ່ຈະມາເຖິງນີ້ ຈະເປັນປີຄົບຮອບສາຍພົວພັນການທູດລະຫວ່າງລາວ-ລັດເຊຍ ຄົບຮອບ 60 ປີອີກດ້ວຍ.