ຜູ້ນຳເວເນຊູເອລາ ປຸກໃຈໃຫ້ທະຫານກຽມພ້ອມຮັບມື ຈາກການຮຸກຮານຂອງສັດຕູພາຍນອກ

ສຳນັກຂ່າວຕ່າງປະເທດລາຍງານ 5 ພຶດສະພາ 2019 ວ່າ: ທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດສະຫະລັດ ອາເມຣິກາ ເຜີຍແຜ່ວິດີໂອເມື່ອວັນເສົາທີ່ຜ່ານມາ ເຊິ່ງເປັນການຖະແຫຼງຮຽກຮ້ອງເຖິງປະຊາຊົນເວເນຊູເອລາວ່າ: ເຖິງເວລາແລ້ວສຳລັບການປ່ຽນແປງ ພ້ອມທັງກ່າວຢ້ຳຄືນວ່າ ປະຊາຊົນເວເນຊູເອລາເປັນເຈົ້າຂອງອຳນາດອະທິປະໄຕຢ່າງແທ້ຈິງ ແລະ ບັດນີ້ໄດ້ເວລາອັນສົມຄວນທີ່ສຸດໃນການຮຽກຄືນອຳນາດດັ່ງກ່າວ ແລະ ປິດທ້າຍວ່າ ລັດຖະບານສະຫະລັດ ອາເມຣິກາຈະຢືນຄຽງຂ້າງໄຊຊະນະຂອງປະຊາຊົນເວເນຊູເອລາ.

ການຖະແຫຼງດັ່ງກ່າວຂອງລັດຖະມົນຕີກະຊວງການຕ່າງປະເທດສະຫະລັດ ອາເມຣິກາ ເກີດຂຶ້ນໃນເວລາດຽວກັນກັບທີ່ທ່ານ ຮວນ ກວຍໂດ ຜູ້ນຳຝ່າຍຄ້ານ ແລະ ທັງເປັນປະທານສະພາແຫ່ງຊາດຂອງເວເນຊູເອລາ ທີ່ປະສະຖາປະນາຕົນເອງຂຶ້ນມາເປັນຜູ້ນຳຄູ່ຂະໜານ ກັບທ່ານ ນິໂຄລັສ ມາດູໂຣ ປະທານປະເທດເວເນຊູເອລາ ເມື່ອເດືອນມັງກອນ ທີ່ຜ່ານມາ ແລະ ກ່າວອ້າງວ່າໄດ້ຮັບການສະໜັບສະໜູນຈາກຫຼາຍກວ່າ 50 ປະເທດນຳໂດຍສະຫະລັດ ອາເມຣິກາ ປະລາໄຊຈາກການປຸກລະດົມປະຊາຊົນໃຫ້ລຸກຮືຂຶ້ນຄັ້ງໃຫຍ່ ເພື່ອຕໍ່ຕ້ານອຳນາດລັດຖະບານ ພາຍໃຕ້ການນຳຂອງທ່ານ ນິໂຄລັສ ມາດູໂຣ ທີ່ໂຮມຊຸມນຸມກັນເມື່ອວັນກຳມະກອນທີ່ຜ່ານມາບໍ່ປະສົບຄວາມສຳເລັດ.

ຂະນະທີ່ທ່ານ ນິໂຄລັສ ມາດູໂຣ ໄດ້ເດີນທາງໄປຍັງລັດໂກເຮເດສ ພາກກາງຂອງປະເທດ ເພື່ອຢ້ຽມຢາມທະຫານທີ່ປະຈຳການຢູ່ຖານທັບແຫ່ງດັ່ງກ່າວ ໂດຍທ່ານ ນິໂຄລັສ ມາດູໂຣ ເດີນທາງໄປພ້ອມກັບທ່ານ ພົນເອກ ວະລາດິເມຍ ປາດຼິໂນ ໂລເປສ ລັດຖະມົນຕີກະຊວງປ້ອງກັນປະເທດ ພ້ອມທັງກ່າວປຸກໃຈທ່າມກາງທະຫານຫຼາຍກວ່າ 5,000 ຄົນ ໃຫ້ມີຄວາມໄວ້ວາງໃຈເຊິ່ງກັນ ແລະ ກັນ ແລະ ຮັກສາອະທິປະໄຕຂອງຊາດໃຫ້ຫຼຸດພົ້ນອອກຈາກການຮຸກຮານຂອງສັດຕູພາຍນອກ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube