ລັດເຊຍເຕືອນ ສ.ອາເມຣິກາ ຢ່າອ້າງປະຊາທິປະໄຕ ແລະ ສິດທິມະນຸດ ເພື່ອກໍ່ສົງຄາມໃນເວເນຊູເອລາ

ສຳນັກຂ່າວຕ່າງປະເທດລາຍງານ 6 ພຶດສະພາ 2019 ວ່າ: ທ່ານ ເຊີເກ ລາວາຣົບ ລັດຖະມົນຕີກະຊວງການຕ່າງປະເທດລັດເຊຍ ກ່າວຖະແຫຼງພາຍຫຼັງປະຊຸມຮ່ວມກັບທ່ານ ໂຮເກ ອາເຣຍຊາ ລັດຖະມົນຕີກະຊວງການຕ່າງປະເທດເວເນຊູເອລາ ທີ່ນະຄອນຫຼວງມົດສະກູ ເມື່ອວັນອາທິດທີ່ຜ່ານມາວ່າ: ຄວາມພະຍາຍາມໃນການບີບບັງຄັບໃຫ້ເກີດການປ່ຽນແປງລັດຖະບານເວເນຊູເອລາ ທີ່ບໍ່ເປັນໄປຕາມຂະບວນການປະຊາທິປະໄຕ ຖືເປັນການທຳລາຍຂະບວນການແກ້ໄຂບັນຫາທາງການເມືອງຂອງເວເນຊູເອລາ, ໂດຍທ່ານ ເຊີເກ ລາວາຣົບອະທິລາຍວ່າ ການປຸກລະດົມຂອງສະຫະລັດ ອາເມຣິກາ ໃນແບບທີ່ບໍ່ເຄີຍມີມາກ່ອນ ເພື່ອທຳລາຍລັດຖະບານທີ່ມາຈາກການເລືອກຕັ້ງ ຖືເປັນການລະເມີດກົດໝາຍລະຫວ່າງປະເທດຢ່າງຮ້າຍແຮງ.

ນອກຈາກນີ້, ລັດຖະມົນຕີກະຊວງການຕ່າງປະເທດລັດເຊຍຍັງກ່າວອີກວ່າ: ການກະທຳດັ່ງກ່າວຖືເປັນເອກະລັກສະເພາະຂອງສະຫະລັດ ອາເມຣິກາ ທີ່ປະຕິບັດມາຫຼາຍທົດສະວັດ ໂດຍອ້າງວ່າເພື່ອປົກປ້ອງປະຊາທິປະໄຕ ແລະ ສິດທິມະນຸດໃນປະເທດທີ່ຕົນກຳລັງຈະກໍ່ສົງຄາມ, ພ້ອມທັງກ່າວວ່າ ຊະຕາກຳຂອງເວເນຊູເອລາ ຄວນເປັນໄປຕາມການຕັດສິນໃຈ ແລະ ການກະທຳຂອງປະຊາຊົນພາຍໃນປະເທດ.

ສ່ວນໃນດ້ານຂອງທ່ານ ໂຮເກ ອາເຣຍຊາ ໄດ້ກ່າວຂອບອົກຂອບໃຈລັດເຊຍ ທີ່ໃຫ້ການສະໜັບສະໜູນອຳນາດອະທິປະໄຕຂອງເວເນຊູເອລາ ຕາມແນວທາງກົດໝາຍລະຫວ່າງປະເທດ.

ເຊິ່ງການເຄື່ອນໄຫວດັ່ງກ່າວ ເກີດຂຶ້ນກ່ອນທີ່ທ່ານ ເຊີເກ ລາວາຣົບ ຈະເດີນທາງໄປປະຊຸມຮ່ວມກັບທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດສະຫະລັດ ອາເມຣິກາ ທີ່ແຟງລັງ ໃນວັນຈັນນີ້ ເພື່ອປຶກສາຫາລືກັນກ່ຽວກັບສະຖານະການໃນເວເນຊູເອລາ ແລະ ບັນຫາສຳຄັນອື່ນໆຂອງໂລກ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube