ສ.ອາເມຣິກາ, ຍີ່ປຸ່ນ, ອິນເດຍ ແລະ ຟິລິບປິນ ຊ້ອມຮົບໃນທະເລຈີນໃຕ້

ສຳນັກຂ່າວຕ່າງປະເທດລາຍງານ 9 ພຶດສະພາ 2019 ວ່າ: ເຮືອຂອງກອງທັບເຮືອ 4 ປະເທດປະກອບມີ: ສະຫະລັດ ອາເມຣິກາ, ຍີ່ປຸ່ນ, ອິນເດຍ ແລະ ຟິລິບປິນ ເຂົ້າຮ່ວມການເຝິກຊ້ອມໃນທະເລຈີນໃຕ້ເປັນເວລາ 1 ​ອາທິດ (ສິ້ນສຸດເມື່ອວັນທີ 8 ພຶດສະພາທີ່ຜ່ານມາ ເລີ່ມເຝິກມາແຕ່ວັນທີ 2 ພຶດສະພາ) ໂດຍກອງທັບເຮືອສະຫະລັດ ອາເມຣິກາ ສົ່ງເຮືອຮົບຕິດຂີປະວຸດນຳວິຖີ USS William P.Lawrence ເຂົ້າຮ່ວມ, ກອງກຳລັງປ້ອງກັນຕົນເອງທາງທະເລຍີ່ປຸ່ນ ສົ່ງເຮືອບັນທຸກເຮລິຄັອບແຕອິຊຸໂມເຂົ້າຮ່ວມ, ກອງທັບເຮືອຟິລິບປິນສົ່ງເຮືອລາດຕະເວນ 1 ລຳເຂົ້າຮ່ວມ, ສ່ວນກອງເຮືອອິນເດຍສົ່ງເຮືອພິຄາດ INS Kolkata ແລະ ເຮືອເຕີມນ້ຳມັນ INS Shakti.

ການລວມກັນຊ້ອມຮົບທາງທະເລຂອງ 4 ປະເທດພັນທະມິດ ຖືເປັນການທ້າທ້າຍຄັ້ງໃໝ່ຕໍ່ຈີນ, ຂະນະທີ່ທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ຂູ່ວ່າຈະຂຶ້ນພາສີສິນຄ້າຈີນ ລວມມູນຄ່າ 200,000 ລ້ານໂດລາສະຫະລັດ.

ຖະແຫຼງການຂອງທ່ານ ແອນດຼູ ເຈ.ຄລັກ ຜູ້ບັງຄັບບັນຊາເຮືອພິຄາດ USS William P.Lawrence ກ່າວວ່າ ການພົວພັນຢ່າງມີອາຊີບຂອງພັນທະມິດ, ທີ່ເປັນຮຸ້ນສ່ວນ ແລະ ເພື່ອນມິດຂອງສະຫະລັດ ອາເມຣິກາໃນພູມມິພາກ ຖືເປັນໂອກາດທີ່ຈະເສີມສ້າງສາຍພົວພັນທີ່ມີຢູ່ໃຫ້ແໜ້ນແຟ້ນຂຶ້ນກວ່າເກົ່າ.

ການເຝິກປະສົມຄັ້ງນີ້ ເກີດຂຶ້ນໃນຂະນະທີ່ເຮືອຮົບອີກ 2 ລຳຂອງກອງທັບເຮືອສະຫະລັດ ອາເມຣິກາ ແລ່ນເຂົ້າໄປໃກ້ກັບກຸ່ມເກາະໃນທະເລຈີນໃຕ້ ທີ່ຈີນອ້າງກຳມະສິດ ເມື່ອວັນຈັນທີ່ຜ່ານມາ ເຮັດໃຫ້ເກີດການປະທ້ວງຈາກທາງການຈີນ ທີ່ລະບຸວ່າເປັນການລະເມີດອະທິປະໄຕຂອງຈີນ.

ແຕ່ກອງທັບເຮືອສະຫະລັດ ອາເມຣິກາຖະແຫຼງກວ່າ ເປັນການທົດສອບເສລີພາບການເດີນເຮືອໃນເຂດນ່ານນ້ຳສາກົນທົ່ວໂລກ, ສະຫະລັດ ອາເມຣິກາປະຕິບັດແບບດຽວກັນໃນທະເລຫຼາຍແຫ່ງທີ່ປະເທດພັນທະມິດອ້າງກຳມະສິດ ເປັນປະຕິບັດການທີ່ບໍ່ມີການເມືອງເຂົ້າມາກ່ຽວຂ້ອງ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube