ສ.ອາເມຣິກາ ບອກໃຫ້ອາຊຽນຕ້ອງເລືອກລະຫວ່າງ ສ.ອາເມຣິກາ ກັບ ຈີນ

ສຳນັກຂ່າວຕ່າງປະເທດລາຍງານ ເມື່ອວັນທີ 22 ມິຖຸນາ 2019 ທີ່ຜ່ານມາວ່າ: ທ່ານ ແຣນດໍ ຊະໄຣເວີ (Randall Schriver) ເລຂານຸການລັດຖະມົນຕີກະຊວງປ້ອງກັນປະເທດສະຫະລັດ ອາເມຣິກາ ຜູ້ຮັບຜິດຊອບວຽກງານອິນໂດ-ປາຊີຟິກ ກ່າວໃນລະຫວ່າງເຂົ້າຮ່ວມງານເສວະນາຂອງສະພາການຄ້າອາຊຽນ-ສະຫະລັດ ອາເມຣິກາ ເມື່ອກາງອາທິດທີ່ຜ່ານມາວ່າ ຈາກສະຖານະການໃນປັດຈຸບັນ ສະມາຊິກອາຊຽນທັງ 10 ປະເທດຢູ່ໃນພາວະທີ່ຈຳເປັນຕ້ອງຕັດສິນໃຈ ແລະ ທົບທວນຢ່າງຮອບຄອບລະຫວ່າງຂໍ້ສະເໜີຈາກສະຫະລັດ ອາເມຣິກາ ຫຼື ຈີນ ເຊິ່ງທັງສອງປະເທດຕ່າງກໍ່ກຳລັງແຂ່ງຂັນກັນຂະຫຍາຍອິດທິພົນທັງໃນດ້ານການເມືອງ ແລະ ເສດຖະກິດໃນພູມມິພາກອາຊຽນ.

ເຖິງຢ່າງໃດກໍ່ຕາມ, ທ່ານ ແຣນດໍ ຊະໄຣເວີ ກ່າວວ່າແນວທາງດັ່ງກ່າວບໍ່ໄດ້ໝາຍຄວາມວ່າເປັນຈຸດຢືນ, ຫຼັກການ ຫຼື ຄ່ານິຍົມ ຂອງສະຫະລັດ ອາເມຣິກາທີ່ມີຕໍ່ອາຊຽນ ຫຼື ພູມມິພາກອິນໂດ-ປາຊີຟິກ ເຊິ່ງລັດຖະບານສະຫະລັດ ອາເມຣິກາໃຫ້ຄວາມສຳຄັນເປັນຢ່າງຍິ່ງ ແຕ່ເປັນພຽງຄຳແນະນຳທີ່ອ້າງອີງຕາມສະຖານະການທົ່ວໄປທີ່ກຳລັງເກີດຂຶ້ນວ່າ ອາຊຽນຈະເລືອກຄວາມສະຫງົບສຸກທີ່ເຄົາລົບອະທິປະໄຕລະຫວ່າງກັນ ຫຼື ການມີຂໍ້ຂັດແຍ່ງຕະຫຼອດເວລາ, ຈະເລືອກປະເທດຄູ່ຄ້າຕາມຂໍ້ຕົກລົງທີ່ເປັນທຳທັງສອງຝ່າຍ ແລະ ການສະໜັບສະໜູນບັນທັດຖານລະຫວ່າງປະເທດກ່ຽວກັບເສລີພາບໃນການລາດຕະເວັນທັງທາງທະເລ ແລະ ທາງອາກາດ.

ຂະນະດຽວກັນ, ທ່ານ ແຣນດໍ ຊະໄຣເວີ ວິຈານແຜນຍຸດທະສາດການຄ້າ ແລະ ພັດທະນາລະບົບພື້ນຖານໂຄງລ່າງ “ໜຶ່ງແລວ ໜຶ່ງເສັ້ນທາງ” ວ່າເຕັມໄປດ້ວຍຄວາມສ່ຽງຂອງພາລະໜີ້ສິນ, ການລໍ້ລາດບັງຫຼວງໃນເຈົ້າໜ້າທີ່ລັດ, ບັນຫາສິ່ງແວດລ້ອມ ແລະ ບັນຫາສັງຄົມ ໂດຍອ້າງອີງຈາກລາຍງານຂອງທະນາຄານໂລກ.

ປັດຈຸບັນອາຊຽນທັງ 10 ປະເທດ ມີປະຊາຊົນລວມກັນປະມານ 630 ລ້ານຄົນ ແລະ ຜະລິດຕະພັນລວມຍອດພາຍໃນລວມກັນມີມູນຄ່າເຖິງ 2.4 ລ້ານລ້ານໂດລາສະຫະລັດ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube