ເປັນຕາຢ້ານຫຼາຍ ພາຍຸທໍນາໂດພັດໃສ່ມົນທົນຫຼຽວໜິງ ເຮັດໃຫ້ມີຜູ້ເສຍຊີວິດແລ້ວ 6 ຄົນ (ວິດີໂອ)

ສຳນັກຂ່າວຕ່າງປະເທດລາຍງານ 4 ກໍລະກົດ 2019 ວ່າ: ສະຖານທີ່ໂທລະພາບ CCTV ຂອງຈີນລາຍງານວ່າ ພາຍຸທໍນາໂດພັດໃສ່ເມືອງໄຄຢວນ ໃນມົນທົນຫຼຽວໜິງ ທາງພາກຕາເວັນອອກສຽງເໜືອຂອງຈີນ ເມື່ອວັນພຸດ ທີ່ຜ່ານມາ ໄດ້ສ້າງຄວາມເສຍຫາຍໃຫ້ກັບເມືອງໄຄຢວນ ທີ່ມີປະຊາກອນ 500,000​ ຄົນ, ມີຜູ້ເສຍຊີວິດແລ້ວ 6 ຄົນ, ບາດເຈັບ 190 ຄົນ, ບ້ານເຮືອນໄດ້ຮັບຄວາມເສຍຫາຍ 3,600 ຫຼັງຄາເຮືອນ ແລະ ປະຊາຊົນອີກ 9,900 ຄົນໄດ້ຮັບຜົນກະທົບຈາກອິດທິພົນຂອງພາຍຸທໍນາໂດ, ຂະນະທີ່ໜັງສືພິມ Global Times ຂອງທາງການຈີນລາຍງານວ່າ ພາຍຸທໍນາໂດເກີດຂຶ້ນໄດ້ຍາກໃນພື້ນທີ່ແຖບນີ້.

ສຳນັກງານອຸຕິນິຍົມວິທະຍາຂອງຈີນລາຍງານວ່າ: ພາວະໂລກຮ້ອນອາດເປັນສາເຫດສຳຄັນທີ່ເຮັດໃຫ້ສະພາບອາກາດຜັນແປຂັ້ນຮຸນແຮງ ເພາະມີທັງນ້ຳຖ້ວມ, ໄພແລ້ງ ແລະ ອາກາດຮ້ອນຈັດໃນບາງພື້ນທີ່ໃນປີນີ້ເຊັ່ນ: ຝົນຕົກໜັກຈົນມີປະລິມານນ້ຳຫຼາຍເປັນປະຫວັດສາດ ແລະ ສະຖານີອຸຕຸນິຍົມວິທະຍາ 40 ແຫ່ງວັດແທກອຸນຫະພູມໄດ້ສູງສຸດເປັນປະຫວັດສາດໃນປີນີ້ເຊັ່ນກັນ.