ປີ 2019 ເປັນປີທີ່ຮ້ອນທີ່ສຸດໃນປະຫວັດສາດຂອງມວນມະນຸດ, ອາຊີໄດ້ຮັບຜົນກະທົບສູງສຸດ

ພາວະໂລກຮ້ອນທີ່ທົ່ວໂລກກຳລັງປະສົບຢູ່ໃນເວລານີ້ ໄດ້ເພີ່ມທະວີຄວາມຮຸນແຮງຂຶ້ນຕື່ມ ຈາກປາກົດການເອວນີໂຢ (El Nino) ແລະ ການປ່ຽນແປງຂອງສະພາບດິນຟ້າອາກາດ (Climate Change) ທີ່ສົ່ງຜົນໃຫ້ປີ 2019 ນີ້ ເປັນປີທີ່ອາກາດຮ້ອນທີ່ສຸດໃນປະຫວັດສາດຂອງມະນຸດ, ຈາກທີ່ມີປີທີ່ຮ້ອນທີ່ສຸດມາແລ້ວ 4 ປີໃນໄລຍະປີ 2015-2018 ທີ່ຜ່ານມາ ໂດຍມີການຄາດຄະເນວ່າ ອຸນຫະພູມໃນຫຼາຍພື້ນທີ່ຈະເພີ່ມສູງຂຶ້ນ.

ຈາກລາຍງານຂອງ Global Climate Risk Index 2019 ທີ່ກອງປະຊຸມ COP 24 ຫຼື ກອງປະຊຸມພາຄີແຫ່ງສະຫະປະຊາຊາດ ວ່າດ້ວຍການປ່ຽນແປງສະພາບດິນຟ້າອາກາດ ຄັ້ງທີ 24 ທີ່ເມືອງຄາໂຕວິດເຊ ໂປໂລຍ ເມື່ອທ້າຍປີ 2018 ລະບຸວ່າ: ອາຊີຈະເປັນພູມມິພາກທີ່ໄດ້ຮັບຜົນກະທົບຮຸນແຮງທີ່ສຸດ ໂດຍມີປະເທດໃນອາຊີເຖິງ 5 ປະເທດທີ່ຕິດ 10 ອັນດັບທຳອິດຂອງປະເທດທີ່ໄດ້ຮັບຜົນກະທົບຫຼາຍທີ່ສຸດຈາກຜົນຂອງການປ່ຽນແປງສະພາບດິນຟ້າອາກາດໃນໄລຍະຫຼາຍປີທີ່ຜ່ານມາ.

ລາຍງານຂອງ Global Climate Risk Index 2019 ໄດ້ຮວບຮວມຜົນກະທົບຂອງແຕ່ລະປະເທດ ແລະ ພູມມິພາກທີ່ໄດ້ຮັບຜົນກະທົບຈາກຜົນຂອງການປ່ຽນແປງສະພາບດິນຟ້າອາກາດໃນປີ 2017 ເຊັ່ນ: ນ້ຳຖ້ວມ, ພາຍຸ, ຄື້ນຄວາມຮ້ອນ ແລະ ໄລຍະປີ 1998-2017, ເຊິ່ງໄດ້ນຳຜົນມາຈັດອັນດັບໂດຍໃຊ້ຈຳນວນຜູ້ເສຍຊີິວິດ ແລະ ການສູນເສຍທີ່ເປັນເງິນ.

ທົ່ວໂລກມີຜູ້ເສຍຊີວິດຈາກໄພພິບັດຫຼາຍກວ່າ 526,000 ຄົນ ຈາກຜົນຂອງການປ່ຽນແປງສະພາບດິນຟ້າອາກາດຢ່າງຮຸນແຮງຫຼາຍກວ່າ 11,500 ເຫດການ ອັນໄດ້ສ້າງຄວາມເສຍຫາຍທາງເສດຖະກິດໃນໄລຍະປີ 1998-2017 ມູນຄ່າ 3.47 ພັນຕື້ໂດລາສະຫະລັດ.

ໃນປີ 2017 ປະເທດເປີໂຕ ຣິໂກ ໄດ້ຮັບຜົກະທົບຮຸນແຮງທີ່ສຸດ ຮອງລົງມາຄືສີລັງກາ, ສ່ວນອັນດັບ 3. ປະເທດໂດມີນິກ, 4. ເນປານ, 5 ເປຣູ, 6. ຫວຽດນາມ, 7 ມາດາກາສະກາ,​ 8. ເຊຍຣາເລອອນ,​ 9. ບັງກະລາເທດ ແລະ 10. ໄທ.

ສ່ວນປະເທດທີ່ໄດ້ຮັບຜົນກະທົບຫຼາຍທີ່ສຸດແຕ່ໄລຍະປີ 1998-2017 ປະເທດເປີໂຕ ຣິໂກ ຍັງເປັນປະເທດທີ່ໄດ້ຮັບຜົນກະທົບຮຸນແຮງທີ່ສຸດ ຮອງລົງມາຄື: ຮົງດູຣັດ, ອັນດັບ 3. ມຽນມາ, 4. ໄຮຕິ, 5. ຟິລິບປິນ, 6. ນິກາຣາກວາ,​ 7. ບັງກະລາເທດ, 8. ປາກິດສະຖານ, 9. ຫວຽດນາມ ແລະ 10. ໂດມີນິກ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube