ເກົາຫຼີໃຕ້ລະດົມຍິງເຕືອນຍົນລັດເຊຍ-ຈີນ ທີ່ຊ້ອມຮົບເໜືອພື້ນທີ່ຄວາມຂັດແຍ່ງກັບຍີ່ປຸ່ນ, ສ່ວນຍີ່ປຸ່ນສົ່ງຍົນຂັບໄລ່ຂຶ້ນທຽບ

ສຳນັກຂ່າວຕ່າງປະເທດລາຍງານ 24 ກໍລະກົດ 2019 ວ່າ: ໄດ້ເກີດສະຖານະການວຸ້ນວາຍ ແລະ ເຄັ່ງຕຶງຂຶ້ນໃນເຂດພິສູດຝ່າຍປ້ອງກັນທາງອາກາດຂອງເກົາຫຼີໃຕ້ (KADIZ) ເມື່ອວັນອັງຄານ 23 ກໍລະກົດ ທີ່ຜ່ານມາ ທີ່ຄວບຄຸມເກາະດັອກໂດ ຫຼື ເກາະທາເຄຊິມະ ໃນທະເລຈີນຕາເວັນອອກ ເຊິ່ງເປັນພື້ນທີ່ຂັດແຍ່ງລະຫວ່າງເກົາຫຼີໃຕ້ ກັບ ຍີ່ປຸ່ນ ແລະ ທັງສອງປະເທດຕ່າງກໍ່ປະກາດອ້າງກຳມະສິດນ່ານຟ້າບໍລິເວນນັ້ນເຊັ່ນກັນ ໂດຍມີຍົນລາດຕະເວນ A-50 ຂອງລັດເຊຍ, ຍົນຖິ້ມລະເບີດທາງຍຸດທະສາດ  Tupolev Tu-95MS ຈຳນວນ 2 ລຳ ແລະ ຍົນຖິ້ມລະເບີດ Xian H-6 ຂອງກອງທັບຈີນ 2 ລຳ ຊ້ອມຮົບຮ່ວມກັນໃນບໍລິເວນດັ່ງກ່າວ ເຊິ່ງເກົາຫຼີໃຕ້ກ່າວຫາເປັນການລະເມີດ KADIZ ຂອງເກົາຫຼີໃຕ້ ແລະ ໄດ້ລະດົມຍິງປືນເຕືອນຫຼາຍກວ່າ 400 ນັດ ລວມທັງຍັງມີການຍິງແສງເລເຊີເພື່ອຂັບໄລ່ຍົນທັງໝົດໃຫ້ອອກໄປຈາກເຂດປ້ອງກັນທາງອາກາດ.

ໃນດ້ານຂອງຍີ່ປຸ່ນ ເຊິ່ງກໍ່ອ້າງກຳມະສິດເກາະດັອກໂດ ຫຼື ເກາະທາເຄຊິມະເຊັ່ນກັນ ໄດ້ສົ່ງຍົນຂັບໄລ່ບິນຂຶ້ນທຽບຍົນຂອງຈີນ ແລະ ລັດເຊຍ ເພື່ອກົດດັນໃຫ້ອອກໄປຈາກນ່ານຟ້າ ເຊິ່ງບັນຍາກາດປັ່ນປວນຢູ່ດົນເຕີບ ກ່ອນທີ່ຕ່າງຝ່າຍຕ່າງແຍກທາງກັນໄປ ຕໍ່ມາກະຊວງປ້ອນກັນປະເທດລັດເຊຍ ແລະ ຈີນອອກຖະແຫຼງການໃນເວລາໄລ່ເລ່ຍກັນ ປະຕິເສດການລະເມີດນ່ານຟ້າຂອງເກົາຫຼີໃຕ້ ໂດຍລັດຖະບານລັດເຊຍຕຳນິກອງທັບເກົາຫຼີໃຕ້ ທີ່ກະທຳການອັນຕະລາຍຕໍ່ການເດີນອາກາດ ເຊິ່ງເຂົ້າຂ່າຍລະເມີດກົດໝາຍການຈະລາຈອນທາງອາກາດ ພ້ອມທັງເຕືອນວ່າບໍ່ມີກົດໝາຍການເດີນອາກາດສະບັບໃດຮັບຮອງ KADIZ ຂອງເກົາຫຼີໃຕ້.

ຂະນະທີ່ລັດຖະບານຍີ່ປຸ່ນ ກໍ່ໄດ້ຕຳນິການຊ້ອມຮົບທາງອາກາດຂອງຈີນ ແລະ ລັດເຊຍວ່າ ລະເມີດນ່ານຟ້າເໜືອດິນແດນທີ່ຢູ່ພາຍໃຕ້ອະທິປະໄຕຂອງຍີ່ປຸ່ນ ແລະ ວິຈານເກົາຫຼີໃຕ້ເຊັ່ນກັນວ່າ ກະທຳການເກີນກວ່າເຫດເໜືອນ່ານຟ້າຂອງຍີ່ປຸ່ນ, ໃນອີກດ້ານໜຶ່ງ ລັດຖະບານລັດເຊຍ ແລະ ລັດຖະບານຈີນຕ່າງກໍ່ປະກາດເຂດພິສູດຝ່າຍປ້ອງກັນທາງອາກາດເໜືອພື້ນທີ່ຄວາມຂັດແຍ່ງບາງສ່ວນເຊັ່ນກັນ ແລະ ເປັນເຫດໃຫ້ເກີດບັນຫາຫຼາຍຄັ້ງ ແຕ່ຄັ້ງນີ້ຮຽກໄດ້ວ່າ ວຸ້ນວາຍ ແລະ ເຄັ່ງຕຶງທີ່ສຸດ.

- Advertisement -