ການຖອນຕົວຂອງ ສ.ອາເມຣິກາ-ລັດເຊຍ ຈາກສົນທິສັນຍານິວເຄຼຍມີຜົນຢ່າງເປັນທາງການ

ລາຍງານ 3 ສິງຫາ 2019: ກະຊວງການຕ່າງປະເທດສະຫະລັດ ອາເມຣິກາ ອອກຖະແຫຼງການເມື່ອວັນສຸກ ທີ່ຜ່ານມາ ວ່າລັດຖະບານສະຫະລັດ ອາເມຣະກາ ບໍ່ຂໍຮ່ວມເປັນພາຄີໃນສົນທິສັນຍາ ທີ່ລັດເຊຍເປັນຝ່າຍລະເມີດຢ່າງຮ້າຍແຮງມາໂດຍຕະຫຼອດອີກຕໍ່ໄປ, ເຊິ່ງທ່ານ ໂດໂນ ທຣຳ ປະທານປະເທດ ສ.ອາເມຣິກາ ປະກາດເມື່ອເດືອນຕຸລາ ປີທີ່ຜ່ານມາ ວ່າລັດຖະບານ ສ.ອາເມຣິກາ ຈະຖອນຕົວອອກຈາກສົນທິສັນຍາອາວຸດນິວເຄຼຍພິໄສກາງ (INF) ທີ່ລົງນາມຮ່ວມກັບລັດຖະບານລັດເຊຍ ເມື່ອປີ 1987 ເຊິ່ງເປັນໄລຍະທ້າຍຂອງສົງຄາມເຢັນ ແລະ ທ້າຍຍຸກສະໄໝສະຫະພາບໂຊວຽດ ແຕ່ໄດ້ຕໍ່ເວລາໃຫ້ກັບລັດເຊຍເປັນເວລາ 6 ເດືອນ ເມື່ອເດືອນກຸມພາ ທີ່ຜ່ານມາ ຫາກອີກຝ່າຍຍອມຢຸດຕິໂຄງການພັດທະນາຂີປະນາວຸດນຳວິຖີຈາກພື້ນສູ່ພື້ນ ພາຍໃຕ້ລະຫັດ SSC-8 ຫຼື 9M729.

ຂະນະທີ່ກະຊວງການຕ່າງປະເທດລັດເຊຍ ອອກຖະແຫຼງການຕອບໂຕ້ພາຍໃນເວລາອັນສັ້ນວ່າ ສ.ອາເມຣິກາ ຜິດພາດຮ້າຍແຮງ ທີ່ເປັນຝ່າຍຍົກເລີກສົນທິສັນຍາສະບັບນີ້ກ່ອນ ອັນໄດ້ເຮັດໃຫ້ທ່ານ ວະລດິເມຍ ປູຕິນ ປະທານປະເທດລັດເຊຍ ກໍ່ປະກາດຖອນຕົວອອກຈາກ INF ເຊັ່ນກັນໃນບໍ່ພໍເທົ່າໃດເດືອນຕໍ່ມາ, ພ້ອມທັງຢືນຢັນວ່າ ໂຄງການພັດທະນາຂີປະນາວຸດດັ່ງກ່າວ ບໍ່ໄດ້ລະເມີດເນື້ອໃນສຳຄັນຂອງຂໍ້ຕົກລົງ ທີ່ເປັນການຫ້າມທັງສອງປະເທດຜະລິດ ແລະ ທົດສອບຂີປະນາວຸດທີ່ມີໄລຍະການຍິງລະຫວ່າງ 500-5,500 ກິໂລແມັດ ແລະ ປິດທ້າຍວ່າ ລັດຖະບານລັດເຊຍບໍ່ຕ້ອງການແຂ່ງຂັນກັນສະສົມອາວຸດກັບປະເທດໃດ ຍົກເວັ້ນກໍລະນີທີ່ ສ.ອາເມຣິກາ ເປັນຝ່າຍເຄື່ອນໄຫວກ່ອນ.

ຕໍ່ມາ ທ່ານ ໂດໂນ ທຣຳ ກ່າວເຖິງການຖອນຕົວອອກຈາກ INF ທີ່ຕອນນີ້ມີຜົນຢ່າງເປັນທາງການແລ້ວສຳລັບທັງ ສ.ອາເມຣິກາ ແລະ ລັດເຊຍ ວ່າໃນສ່ວນຂອງລັດຖະບານ ສ.ອາເມຣິກາ ນັ້ນ ຕົນປາຖະໜາການເຈລະຈາຂໍ້ຕົກລົງສະບັບໃໝ່ ໃຫ້ເປັນຂໍ້ຕົກລົງຫຼາຍຝ່າຍທີ່ມີຈີນເຂົ້າຮ່ວມນຳ, ເຖິງຢ່າງໃດກໍ່ຕາມ ທ່ານ ຈາງ ຈຸນ ເອກອັກຄະລັດຖະທູດຈີນປະຈຳສະຫະປະຊາຊາດ ກ່າວວ່າ ທ່ານ ໂດໂນ ທຣຳ ໃຊ້ຈີນເປັນຂໍ້ອ້າງໃນການຖອນຕົວອອກຈາກ INF ຫຼາຍກວ່າ ເພາະເປັນສິ່ງທີ່ຮູ້ກັນດີຢູ່ແລ້ວ່າ ຄວາມສາມາດຂອງລັດຖະບານຈີນໃນດ້ານການພັດທະນາຫົວຮົບນິວເຄຼຍ ຍັງຫ່າງໄກຫຼາຍຈາກລັດເຊຍ ແລະ ສ.ອາເມຣິກາ ທີ່ປັດຈຸບັນທັງສອງປະເທດນັ້ນຄອບຄອວຫົວຮົບນິວເຄຼຍຫຼາຍທີ່ສຸດເປັນອັນດັບ 1 ແລະ 2 ຂອງໂລກຕາມລຳດັບ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube