ທ່ານນາຍົກກ່າວ: ການກູ້ຢືມຕ້ອງເນັ້ນສະເພາະໂຄງການທີ່ມີປະສິດທິພາບສູງເທົ່ານັ້ນ ເພື່ອບໍ່ໃຫ້ມີໜີ້ຫຼາຍເກີນໄປ

ສຳນັກຂ່າວສານປະເທດລາວລາຍງານ 29 ທັນວາ 2017 ວ່າ: ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ຊີ້ນຳຕໍ່ບັນດາສະມາຊິກລັດຖະບານ ໂດຍຢ້ຳວ່າ ປີ 2018, ຕ້ອງໄດ້ເອົາໃຈໃສ່ສືບຕໍ່ການລະດົມ ແລະ ນຳໃຊ້ທຶນ ເພື່ອການພັດທະນາເສດຖະກິດ-ສັງຄົມ ໃຫ້ມີປະສິດທິຜົນສູງກວ່າເກົ່າ. ໃນນັ້ນໃຫ້ເອົາໃຈໃສ່ເປັນພິເສດໃນການຊຸກຍູ້ການຈັດຕັ້ງປະຕິບັດບັນດາໂຄງການຮ່ວມມືລະຫວ່າງປະເທດເຮົາ ແລະ ສາກົນ.

ທ່ານນາຍົກລັດຖະມົນຕີໄດ້ແນະນຳຕື່ມວ່າ ໃຫ້ຮີບຮ້ອນຜັນຂະຫຍາຍ ສ້າງເປັນໂຄງການລະອຽດ ແລະ ປະສານກັບພາກສ່ວນທີ່ກ່ຽວຂ້ອງຂອງຈີນ ເພື່ອໃຫ້ສາມາດຈັດຕັ້ງປະຕິບັດຢ່າງມີປະສິດທິພາບໂດຍໄວ ສຳລັບໂຄງການຊ່ວຍເຫຼືອຂອງທາງການຈີນ ໃນມູນຄ່າ 4 ຕື້ຢວນ ແລະ 1.2 ຕື້ຢວນ, ນັບທັງໂຄງການຮ່ວມມືລາວ-ຫວຽດນາມ ທີ່ລັດຖະບານທັງສອງປະເທດໄດ້ເປັນເອກະພາບດ້ານຫຼັກການແລ້ວ ໃຫ້ມີການປະສານ ແລະ ເຈລະຈາກັບພາກສ່ວນກ່ຽວຂ້ອງຂອງຫວຽດນາມ ເພື່ອຈັດຕັ້ງປະຕິບັດ ເພື່ອໃຫ້ໄດ້ຮ່ວມລົງນາມໃນ 4 ສັນຍາ ໃນໂອກາດການພົບປະລະຫວ່າງສອງກົມການເມືອງ ແລະ ກອງປະຊຸມຄະນະກຳມາທິການລາວ-ຫວຽດນາມ ຄັ້ງທີ 40 ໃນເດືອນມັງກອນ 2018 ທີ່ຈະມາເຖິງນີ້.

ສະເພາະບັນດາໂຄງການທີ່ໄດ້ສະເໜີຂໍກູ້ຢືມມູນຄ່າສູງ ທີ່ສະພາໄດ້ຮັບຮອງແລ້ວ ໃຫ້ຮີບຮ້ອນປະສານສົມທົບກັບຜູ້ໃຫ້ທຶນກູ້ຢືມ ເພື່ອໃຫ້ສາມາດຈັດຕັ້ງປະຕິບັດໂດຍໄວ, ທັງນີ້, ໃນຕໍ່ໜ້າການກູ້ຢືມຈະເນັ້ນໃສ່ບັນດາໂຄງການທີ່ມີປະສິດທິຜົນສູງເທົ່ານັ້ນ ເພື່ອບໍ່ໃຫ້ເພີ່ມໜີ້ສິນຫຼາຍເກີນໄປ. ສ່ວນບັນດາໂຄງການລົງທຶນຂະໜາດໃຫຍ່ ທີ່ໄດ້ເລີ່ມດຳເນີນການຈັດຕັ້ງປະຕິບັດແລ້ວ ໂດຍຊຸກຍູ້ໃຫ້ສາມາດດຳເນີນໄປຕາມແຜນເຊັ່ນ: ໂຄງການກໍ່ສ້າງທາງລົດໄຟລາວ-ຈີນ, ໂຄງການພັດທະນາຕາມນະໂຍບາຍ 1 ແລວທາງ 1 ເສັ້ນທາງ, ໂຄງການພັດທະນາເສດຖະກິດພິເສດທີ່ກຳລັງດຳເນີນ, ໂຄງການທີ່ກຳລັງສຶກສາຄວາມເປັນໄປໄດ້ ແລະ ໂຄງການລົງທຶນຂະໜາດໃຫຍ່ອື່ນໆ ທີ່ມີຜົນກະທົບສູງຕໍ່ການພັດທະນາ ໃຫ້ສາມາດດຳເນີນໄປໄດ້ດີ.

ເຖິງຢ່າງໃດກໍ່ຕາມ ທ່ານ ທອງລຸນ ສີສຸລິດ ລະບຸວ່າ: ການລະດົມທຶນເພື່ອການພັດທະນາທັງພາຍໃນ ແລະ ຕ່າງປະເທດ ທັງທາງດ້ານປະລິມານ ແລະ ຄຸນນະພາບໃຫ້ໄດ້ຫຼາຍຂຶ້ນ ຕ້ອງໄດ້ເອົາໃຈໃສ່ວຽກງານ ປັບປຸງສະພາບແວດລ້ອມຂອງການດຳເນີນທຸລະກິດ, ສຸມໃສ່ແກ້ໄຂບັນຫາຄວາມບໍ່ສະດວກ ໃນການດຳເນີນທຸລະກິດ ແລະ ການອະນຸມັດການລົງທຶນ ຜ່ານປະຕູດຽວໃຫ້ວ່ອງໄວ, ໂປ່ງໃສ ແລະ ສອດຄ່ອງຕາມກົດໝາຍ-ລະບຽບການ. ສູ້ຊົນເຮັດໃຫ້ອັນດັບຄວາມສະດວກໃນການດຳເນີນທຸລະກິດຢູ່ປະເທດເຮົາໃຫ້ດີຂຶ້ນ ໃນປີ 2018-2019. ພ້ອມນີ້, ກໍ່ໃຫ້ເອົາໃຈໃສ່ຈັດຕັ້ງປະຕິບັດແຜນພັດທະນາວິສາຫະກິດຂະໜາດນ້ອຍ-ຂະໜາດກາງ ໄລຍະປີ 2016-2020 ທີ່ລັດຖະບານໄດ້ອອກດຳລັດຮັບຮອງ ແລະ ປະກາດໃຊ້ແລ້ວ ເພື່ອຊຸກຍູ້ການພັດທະນາຂອງ SMEs ຢູ່ປະເທດເຮົາໃຫ້ເຂັ້ມແຂງເທື່ອລະກ້າວ.

ສິ່ງສຳຄັນຕ້ອງສືບຕໍ່ຄຸ້ມຄອງ, ແກ້ໄຂການລົງທຶນ ແລະ ການເຄື່ອນໄຫວທຸລະກິດ ແລະ ບໍລິການທີ່ບໍ່ສອດຄ່ອງຕາມກົດໝາຍ ແລະ ລະບຽບການ, ໂດຍສະເພາະການລັກສອບຂຸດຄົ້ນ ແລະ ສົ່ງອອກໄປ, ການລັກລອບຂຸດຄົ້ນບໍ່ແຮ່ ແລະ ຊັບພະຍາກອນຫວງຫ້າມຢູ່ໃກ້ຊາຍແດນ ແລະ ເຂດຫ່າງໄກຈາກຕົວເມືອງ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube