ສປປ.ລາວ ເປີດສະຖານກົງສຸນໃຫຍ່ ແຫ່ງໃໝ່ ທີ່ນະຄອນຊຽງຊາ ສປ.ຈີນ

ກະຊວງການຕ່າງປະເທດລາຍງານວ່າ: ໂດຍອີງຕາມການຕົກລົງຂອງລັດຖະບານ ແຫ່ງ ສປປ.ລາວ ແລະ ສປ.ຈີນ ກ່ຽວກັບການເຫັນດີສ້າງຕັ້ງສະຖານກົງສຸນໃຫຍ່ ແຫ່ງ ສປປ.ລາວ ທີ່ ນະຄອນຊາງຊາ, ແຂວງຫູນານ, ທ່ານ ສະເຫຼີມໄຊ ກົມມະສິດ, ລັດຖະມົນຕີ ກະຊວງການຕ່າງປະເທດ ແຫ່ງ ສປປ.ລາວ ພ້ອມດ້ວຍຄະນະ ໄດ້ເດີນທາງເຂົ້າຮ່ວມເປັນແຂກກິດຕິມະສັກ ໃນພິທີເປີດສະຖານກົງສຸນໃຫຍ່ ສປປ.ລາວ ແຫ່ງໃໝ່ ທີ່ ນະຄອນຊາງຊາ, ແຂວງຫູນານ, ສປ.ຈີນ.

ໃນການເດີນທາງໄປແຂວງຫູຫນານຄັ້ງນີ້, ທ່ານ ສະເຫຼີມໄຊ ກົມມະສິດ ພ້ອມດ້ວຍຄະນະ ໄດ້ພົບປະກັບ ທ່ານ ຕູ້ ເຈ່ຍຫາວ, ເລຂາພັກແຂວງ ແລະ ທ່ານ ສູ ຕາເຈີ, ເຈົ້າແຂວງໆຫູນານ. ໃນການພົບປະກັບການນຳຂອງແຂວງຫູນານ, ທັງສອງຝ່າຍໄດ້ຕີລາຄາສູງຕໍ່ສາຍພົວພັນມິດຕະພາບທີ່ເປັນມູນເຊື້ອ ແລະ ການແລກປ່ຽນການຮ່ວມມືຕົວຈິງ ໃນໄລຍະຜ່ານມາ ລະຫວ່າງ ສປປ.ລາວ ແລະ ສປ.ຈີນ ເວົ້າລວມ, ເວົ້າສະເພາະ ສປປ.ລາວ ແລະ ແຂວງຫູນານ, ຊຶ່ງທັງສອງຝ່າຍກໍເຫັນດີຕໍ່ທິດທາງທີ່ຈະສືບຕໍ່ເພີ່ມທະວີ ແລະ ຮັດແໜ້ນສາຍພົວພັນມິດຕະພາບທີ່ເປັນມູນເຊື້ອຂອງທັງສອງປະເທດ ໃຫ້ນັບມື້ນັບແຕກດອກອອກຜົນຍິ່ງໆຂຶ້ນ, ເປັນຕົ້ນແມ່ນຮ່ວມກັນຊຸກຍູ້ການແລກປ່ຽນຮ່ວມມືດ້ານການເມືອງ, ດ້ານເສດຖະກິດ-ການຄ້າ, ດ້ານກະສິກຳ, ການຂົນສົ່ງ, ດ້ານວັດທະນະທຳ-ສັງຄົມ, ການສຶກສາ ແລະ ດ້ານອື່ນໆທີ່ສອງຝ່າຍເຫັນວ່າມີທ່າແຮງ. ພ້ອມດຽວກັນນັ້ນ, ຝ່າຍລາວໄດ້ສະແດງຄວາມຂອບອົກຂອບໃຈຕໍ່ລັດຖະບານ ສປ.ຈີນ ກໍຄື ອຳນາດການປົກຄອງແຂວງຫູນານ ໂດຍສະເພາະແມ່ນຫ້ອງການພົວພັນຕ່າງປະເທດແຂວງຫູນານ ທີ່ໄດ້ເອົາໃຈໃສ່ຊຸກຍູ້ ແລະ ສະໜັບສະໜູນ ໃນວຽກງານກະກຽມເປີດສະຖານກົງສຸນໃຫຍ່ ສປປ.ລາວ ທີ່ ນະຄອນຊາງຊາ.

ພິທີເປີດສະຖານກົງສຸນໃຫຍ່  ສປປ.ລາວ ທີ່ ນະຄອນຊາງຊາ, ແຂວງຫູນານ ໄດ້ຈັດຂຶ້ນໃນຕອນບ່າຍຂອງວັນທີ 23 ທັນວາ 2017, ໂດຍເປັນກຽດເຂົ້າຮ່ວມຂອງ ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ.ລາວ ແລະ ທ່ານ ຕູ້ ເຈ່ຍຫາວ, ເລຂາພັກແຂວງໆຫູນານ ພ້ອມດ້ວຍຄະນະຜູ້ແທນຈາກ ສປປ.ລາວ ແລະ ສປ.ຈີນ ປະມານ 150 ຄົນ. ໃນພິທີເປີດດັ່ງກ່າວນີ້, ທ່ານ ນ. ວັນດີ ບຸດທະສະວົງ, ເອກອັກຄະລັດຖະທູດ ແຫ່ງ ສປປ.ລາວ ປະຈຳ ສປ.ຈີນ ແລະ ທ່ານ ສຸຍ ຕ້າເຈີ, ຮອງເລຂາພັກແຂວງ, ເຈົ້າແຂວງຫູຫນານ ໄດ້ຜັດປ່ຽນກັນມີຄຳເຫັນ.

ການເປີດສະຖານກົງສຸນໃຫຍ່ ສປປ.ລາວ ທີ່ ນະຄອນຊາງຊາ ແມ່ນຈັດຂຶ້ນໃນໄລຍະທີ່ສຳຄັນແຫ່ງການພົວພັນລະຫວ່າງສອງປະເທດລາວ ແລະ ຈີນ ຄື: ພາຍຫຼັງການຢ້ຽມຢາມ ສປປ.ລາວ ຂອງ ພະນະທ່ານ ເລຂາທິການໃຫຍ່, ປະທານປະເທດ ສີ ຈິ້ນຜິງ ໃນກາງເດືອນພະຈິກ ທີ່ຜ່ານມາ ດ້ວຍຜົນສຳເລັດອັນຈົບງາມ, ໃນໂອກາດສະເຫຼີມສະຫຼອງວັນຄ້າຍວັນເກີດຂອງອະດີດປະທານປະເທດ ເໝົາ ເຈີຕຸງ ແລະ ໃນຊ່ວງສິ້ນສຸດປີ 2017, ຊຶ່ງສະແດງໃຫ້ເຫັນເຖິງສາຍພົວພັນມິດຕະພາບອັນເປັນມູນເຊື້ອ ແລະ ການພົວພັນຮ່ວມມືແບບຄູ່ຮ່ວມຍຸດທະສາດຮອບດ້ານ ໝັ້ນຄົງ ຍາວນານ ຕາມທິດ 4 ດີ ລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ ແລະ ຈີນ ໄດ້ຮັບການຂະຫຍາຍຕົວ ແລະ ແຕກດອກອອກຜົນຍິ່ງໆຂຶ້ນ.

ປັດຈຸບັນ, ສປປ.ລາວ ມີສະຖານກົງສຸນໃຫຍ່ຂອງຕົນຕັ້ງຢູ່ ສປ.ຈີນ ທັງໝົດ 6 ແຫ່ງ ຄື: ສະຖານກົງສຸນໃຫຍ່ລາວ ທີ່ ນະຄອນຄຸນມິງ ແຂວງຢຸນນານ, ນະຄອນໜານໜິງ ເຂດກວາງຊີ, ນະຄອນກວາງໂຈວ ແຂວງກວາງຕຸ້ງ, ນະຄອນຊຽງໄຮ້, ເຂດປົກຄອງພິເສດຮົງກົງ ແລະ ນະຄອນຊາງຊາ ແຂວງຫູນານ ແລະ ມີ 1 ຫ້ອງການກົງສຸນລາວ ທີ່ ຊຽງຮຸ່ງ ກິ່ງແຂວງສິບສອງພັນນາ ຊຶ່ງແຕ່ລະສະຖານກົງສຸນດັ່ງກ່າວໄດ້ເຄື່ອນໄຫວໃນຂອບເຂດ ແລະ ຄວາມຮັບຜິດຊອບຂອງຕົນ.

ສຳລັບສະຖານກົງສຸນໃຫຍ່ລາວ ທີ່ ນະຄອນຊາງຊາ ເປັນສະຖານກົງສຸນຕ່າງປະເທດ ແຫ່ງທຳອິດທີ່ສ້າງຕັ້ງຢູ່ແຂວງຫູນານ, ມີຂອບເຂດຮັບຜິດຊອບ 4 ແຂວງພາກກາງຕອນໃຕ້ຂອງຈີນ ລວມມີ: ແຂວງຫູນານ, ແຂວງຫູເປ, ແຂວງເຫີນານ ແລະ ແຂວງກຸ້ຍໂຈວ, ຊຶ່ງບັນດາແຂວງດັ່ງກ່າວລ້ວນແຕ່ເປັນແຂວງທີ່ມີເສດຖະກິດຂະຫຍາຍຕົວ, ມີທ່າແຮງຢ່າງຫຼວງຫຼາຍ, ມີການພົວພັນຮ່ວມມື ແລະ ຊ່ວຍເຫຼືອຊ່ຶງກັນແລະກັນ ເປັນຢ່າງດີກັບ ສປປ.ລາວ ມາແຕ່ດົນນານ.

ການເປີດສະຖານກົງສຸນໃຫຍ່ແຫ່ງໃໝ່ຂອງລາວນີ້ ຈະເປັນການປະກອບສ່ວນສຳຄັນເຂົ້າໃນການຊຸກຍູ້ການພົວພັນຮ່ວມມືທາງດ້ານເສດຖະກິດ, ການຄ້າ-ການລົງທຶນ, ການທ່ອງທ່ຽວ, ການສຶກສາ ແລະ ວັດທະນະທຳ ລະຫວ່າງ ສປປ.ລາວ ກັບ ແຂວງຫູນານ ແລະ ກັບບັນດາແຂວງທີ່ກົງສຸນຮັບຜິດຊອບ ໃຫ້ກ້າວໄປສູ່ບາດກ້າວໃໝ່ ແລະ ທັງເປັນການອຳນວຍຄວາມສະດວກໃຫ້ແກ່ການໄປມາຫາສູ່ກັນ ລະຫວ່າງປະຊາຊົນສອງຊາດ ລາວ-ຈີນ ໃຫ້ສະດວກຍິ່ງຂຶ້ນ ໂດຍສະເພາະໃນປີ 2018, ຊຶ່ງເປັນປີທ່ອງທ່ຽວລາວ.

ການເດີນທາງໄປແຂວງຫູນານຄັ້ງນີ້ຂອງທ່ານລັດຖະມົນຕີຕ່າງປະເທດ ໄດ້ເປັນຂີດໝາຍອັນສຳຄັນໃນການຊຸກຍູ້ການແລກປ່ຽນຮ່ວມມື ລະຫວ່າງ ສປປ.ລາວ ແລະ ແຂວງຫູນານ, ໂດຍສະເພາະການເປີດສະຖານກົງສຸນໃຫຍ່ ຂອງ ສປປ.ລາວ ຢ່າງເປັນທາງການ ທີ່ ນະຄອນຊາງຊາ ຊຶ່ງຈະເປັນທ່າແຮງໜຶ່ງທີ່ສາມາດນຳເອົາຜົນປະໂຫຍດມາສູ່ທັງສອງປະເທດ ກໍຄື ປະຊາຊົນສອງຊາດລາວ ແລະ ຈີນ.