ຍົນໂດຍສານລັດເຊຍຕຳນົກ ຕ້ອງລົງຈອດສຸກເສີນກາງທົ່ງສາລີ ພ້ອມ 233 ຊີວິດ (ວິດີໂອ)

ລາຍງານ 15 ສິງຫາ 2019: ເຈົ້າໜ້າທີ່ລັດເຊຍເປີດເຜີຍວ່າ ຍົນໂດຍສານ Airbus A321 ຂອງສາຍການບິນ Ural Airlines ພ້ອມຜູ້ໂດຍສານ 226 ຄົນ ແລະ ຈຸບິນ 7 ຄົນ ປະສົບເຫດຕຳກັບຝູງນົກຂະນະກຳລັງບິນຂຶ້ນຈາກສະໜາມບິນຊູຄັອບສະກີ້, ນະຄອນຫຼວງມົດສະກູ ເພື່ອເດີນທາງໄປເມືອງຊິມເຟໂຣໂພ ແຫຼມໄຄເມຍ.

ຖະແຫຼງການຂອງສາຍການບິນ Ural Airlines ລະບຸວ່າ ມີນົກຫຼາຍໂຕຫຼຸດເຂົ້າໄປໃນເຄື່ອງຈັກ 2 ເຄື່ອງຂອງຍົນ ເຮັດໃຫ້ເຄື່ອງຈັກຂັດຂ້ອງ, ນັກບິນຈຶ່ງຕັດສິນໃຈນຳຍົນລົງຈອດສຸກເສີນກາງທົ່ງສາລີ ທີ່ຢູ່ຫ່າງຈາກສະໜາມບິນປະມານ 1 ກມ ເທົ່ານັ້ນ.

ເຈົ້າໜ້າທີ່ສາທາລະນະສຸກລັດເຊຍເປີດເຜີຍວ່າ ມີຜູ້ໄດ້ຮັບບາດເຈັບ 23 ຄົນ, ລວມມີເດັກນ້ອຍ 5 ຄົນ, ສາຍການບິນ Ural Airlines ຍັງໄດ້ກ່າວຊົມເຊີຍຈຸບິນວ່າ ປະຕິບັດໜ້າທີ່ໄດ້ຢ່າງມືອາຊີບ ໃນການອົບພະຍົບຜູ້ໂດຍສານອອກຈາກຍົນ, ນອກຈາກນັ້ນແລ້ວ ນັກບິນຍັງເປັນຜູ້ມີປະສົບການສູງໃນການຄວບຄຸມຍົນ ແລະ ມີຊົ່ວໂມງບິນຫຼາຍເກີນ 3,000 ຊົ່ວໂມງແລ້ວ.