ຈີນເຕືອນປະເທດຕາເວັນຕົກ ຢ່າແຊກແຊງວຽກງານພາຍ ບັນຫາຄວາມວຸ້ນວາຍຮົງກົງ ແກ້ໄຂເອງໄດ້

ລາຍງານ 16 ສິງຫາ 2019: ທ່ານ ຫຼິວ ສ່ຽວໝິງ ເອກອັກຄະລັດຖະທູດຈີນ ປະຈຳນະຄອນຫຼວງລອນດອນ ປະເທດອັງກິດ ຖະແຫຼງເມື່ອວັນພະຫັດ ທີ່ຜ່ານມາ ວ່າ ສປ.ຈີນ ມີມາດຕະການໃນແບບຂອງຕົນເອງ ແລະ ມີກຳລັງແຮງພຽງພໍໃນການແກ້ໄຂກັບສະຖານະການຄວາມບໍ່ສະຫງົບໃນຮົງກົງ ໃຫ້ກັບຄືນສູ່ພາວະປົກກະຕິພາຍໃນໄລຍະເວລາທີ່ວ່ອງໄວ, ເຖິງແມ່ນວ່າກ່ອນໜ້ານນັ້ນນັກວິເຄາະບາງສ່ວນຕີລາຄາວ່າ ການສົ່ງເຈົ້າໜ້າທີ່ຝ່າຍຄວາມໝັ້ນຄົງຂອງ ສປ.ຈີນ ເຂົ້າສູ່ຮົງກົງຈະສົ່ງຜົນຕໍ່ພາບລັກຂອງຈີນໃນທຸກດ້ານ ແຕ່ອີກຝ່າຍກໍ່ໃຫ້ຄວາມເຫັນວ່າ ເມື່ອມາເຖິງຈຸດທີ່ຕ້ອງແຕກຫັກ ແນ່ນອນວ່າລັດຖະບານຈີນພ້ອມຮັບມືກັບຜົນທີ່ຈະຕາມມາ, ໂດຍກະຊວງການຄ້າຂອງຈີນອອກຖະແຫຼງການວ່າ ສປ.ຈີນ ບໍ່ມີທາງປ່ອຍປະເສດຖະກິດຮົງກົງ ພາຍຫຼັງທີ່ກະຊວງການຕ່າງປະເທດ ສ.ອາເມຣິກາ ຂົ່ມຂູ່ຈະຖອດຖອນສິດທິພິເສດທາງການຄ້າລະຫວ່າງຮົງກົງ ກັບ ສ.ອາເມຣິກາ.

ຂະນະດຽວກັນ, ທ່ານ ຫຼິວ ສ່ຽວໝິງ ຍັງກ່າວວ່ານັກການເມືອງອັງກິດຫຼາຍຄົນຍັງມີແນວຄິດຄັບແຄບ ວ່າຮົງກົງຍັງຢູ່ໃນສະຖານະເປັນ “ອານານິຄົມ” ຂອງຕົນເອງ ທັງທີ່ບັນຫາດັ່ງກ່າວໄດ້ຈົບລົງນັບຕັ້ງແຕ່ວິນາທີທຳອິດທີ່ສົ່ງມອບເກາະຮົງກົງກັບຄືນສູ່ ສປ.ຈີນ ເມື່ອວັນທີ 1 ກໍລະກົດ 1997 ແລະ ພະຍາຍາມແຊກແຊກປຸກລະດົມແນວຄິດນີ້ ໃຫ້ກັບກຸ່ມຄົນໄວໜຸ່ມຮົງກົງ.

ເຊິ່ງທ່ານ ໂດມິນິກ ຣາບ ລັດຖະມົນຕີກະຊວງການຕ່າງປະເທດອັງກິດ ໄດ້ໂທລະສັບສາຍກົງເຖິງທ່ານ ນາງ ແຄຣີ ແລມ ຫົວໜ້າຄະນະຜູ້ບໍລິຫານເກາະຮົງກົງ ເມື່ອອາທິດທີ່ຜ່ານມາ ຮຽກຮ້ອງໃຫ້ທ່ານ ນາງ ຈັດຕັ້ງຄະນະປະຕິບັດງານອິດສະຫຼະ ເພື່ອກວດສອບການໃຊ້ຄວາມຮຸນແຮງຂອງຕຳຫຼວດຕໍ່ກຸ່ມຜູ້ປະທ້ວງ ເຊິ່ງຈີນຕຳໜິຢ່າງໜັກວ່າ ຜິດມາລະຍາດທາງການທູດຢ່າງຮ້າຍແຮງ, ນອກຈາກນີ້ ທ່ານ ຫຼິວ ສ່ຽວໝິງ ຍັງຕຳໜິສື່ຕາເວັນຕົກບາງແຫ່ງ ວ່າເຈດຕະນາຊັກຈູງໄປໃນທາງທີ່ຜິດ ກ່ຽວກັບສະຖານະການໃນຮົງກົງ ພ້ອມທັງຢ້ຳວ່າບັນຫານີ້ ຄືວຽກງານພາຍໃນຂອງ ສປ.ຈີນ ເທົ່ານັ້ນ.

ໃນດ້ານຂອງທ່ານ ໂດໂນ ທຣຳ ປະທານປະເທດ ສ.ອາເມຣິກາ ກ່າວວ່າ ສ.ອາເມຣິກາມີຄວາມເປັນຫ່ວງເປັນໃຍຢ່າງຍິ່ງ ຕໍ່ສະຖານະການໃນຮົງກົງ ທີ່ໃກ້ເຖິງຈຸດແຕກຫັກ ແລະ ໄດ້ສະເໜີແນວທາງ ທີ່ທຸກຝ່າຍກ່າວເປັນສຽງດຽວກັນວ່າບໍ່ມີທາງເປັນໄປໄດ້ ນັ້ນຄືການຂໍໃຫ້ທ່ານ ສີ ຈິ້ນຜິງ ປະທານປະເທດຈີນ ເດີນທາງໄປຍັງຮົງກົງ ແລ້ວພົບປະກັບແກນນຳຂອງກຸ່ມຜູ້ປະທ້ວງ, ສ່ວນທ່ານ ຈອນ ໂບຕັ້ນ ທີ່ປຶກສາດ້ານຄວາມໝັ້ນຄົງແຫ່ງຊາດ ສ.ອາເມຣິກາ ປະຈຳທຳນຽບຂາວ ກ່າວວ່າຫາກຈີນກຳລັງຄິດຟື້ນຟູ “ທຽນອັນເໝິນ 2”, ລັດຖະບານ ສ.ອາເມຣິກາ ຂໍເຕືອນວ່ານັ້ນເປັນທາງເລືອກທີ່ຜິດມະຫັນ ແຕ່ຍັງບໍ່ໄດ້ກ່າວຊັດເຈນວ່າຈະຕອບໂຕ້ແບບໃດ.