ຈີນບໍ່ພໍໃຈ ທີ່ລັດຖະມົນຕີຕ່າງປະເທດຂອງເຢຍລະມັນ ໃຫ້ແກ່ນນຳຜູ້ປະທ້ວງຮົງກົງເຂົ້າພົບ

ລາຍງານ 11 ກັນຍາ 2019: ທ່ານ ນາງ ຫົວ ຊຸນຫຍິງ ໂຄສົກກະຊວງການຕ່າງປະເທດຈີນ ກ່າວເມື່ອວັນອັງຄານ ທີ່ຜ່ານມາ ວ່າລັດຖະບານຈີນບໍ່ພໍໃຈເປັນຢ່າງຍິ່ງ ຕໍ່ການກະທຳຂອງລັດຖະບານເຢຍລະມັນ ເຊິ່ງຖືເປັນການລະເມີດອະທິປະໄຕຂອງ ສປ.ຈີນ ຢ່າງຊັດເຈນ, ຈຶ່ງໄດ້ດຳເນີນການຕາມຂະບວນການທາງການທູດລະຫວ່າງປະເທດ ກັບໜ່ວຍງານທີ່ກ່ຽວຂ້ອງຂອງລັດຖະບານເຢຍລະມັນແລ້ວ, ພ້ອມກັນນີ້ຈີນຂໍເຕືອນທຸກຝ່າຍອີກຄັ້ງ ວ່າວຽກງານພາຍໃນຂອງຮົງກົງຖືເປັນວຽກງານພາຍໃນຂອງ ສປ.ຈີນ ເທົ່ານັ້ນ, ລັດຖະບານ ແລະ ອົງການລະຫວ່າງປະເທດ ຕະຫຼອດຮອດບຸກຄົນໃດກໍ່ຕາມ ຫຼື ແມ່ນແຕ່ໜ່ວຍງານເອກະຊົນ ກໍ່ບໍ່ມີສິດກ້າວກ່າຍ.

ທ່າທີດັ່ງກ່າວຂອງລັດຖະບານຈີນ ເກີດຂຶ້ນພາຍຫຼັງທີ່ທ້າວ ໂຈຊົວ ຫວ່ອງ ແກນນຳການປະທ້ວງຕໍ່ຕ້ານລັດຖະບານໃນຮົງກົງ ເດີນທາງໄປຍັງນະຄອນຫຼວງແບັກແລັງ ປະເທດເຢຍລະມັນ ເພື່ອເຂົ້າຮ່ວມງານ BILD-100 ທີ່ຈັດຂຶ້ນໂດຍໜັງສືພິມ BILD ທີ່ເປັນໜັງສືພິມລາຍໃຫຍ່ທີ່ສຸດຂອງເຢຍລະມັນ ກ່ຽວກັບບຸກຄົນແຫ່ງປີ 100 ຄົນ ແລະ ຝ່າຍຈັດງານຍັງເປີດໂອກາດໃຫ້ທ້າວ ໂຈຊົວ ຫວ່ອງ ໄດ້ພົບກັບທ່ານ ໄຮໄກ ມາສ ລັດຖະມົນຕີກະຊວງການຕ່າງປະເທດເຢຍລະມັນອີກດ້ວຍ, ເຊິ່ງລັດຖະບານເຢຍລະມັນຍັງບໍ່ສະແດງທ່າທີກ່ຽວກັບການພົບປະກັນດັ່ງກ່າວ, ຂະນະທີ່ທ້າວ ໂຈຊົວ ຫວ່ອງ ໄດ້ຕອບໂຕ້ການວິຈານຂອງລັດຖະບານຈີນ ວ່າເປັນພຽງຍຸດທະສາດທາງການທູດ ເພື່ອວາງບົດບາດຂອງຕົວເອງໃຫ້ເໜືອກວ່າຝ່າຍອື່ນເທົ່ານັ້ນ ແລະ ຢືນຢັນວ່າການປະທ້ວງຮຽກຮ້ອງເສລີພາບຂອງຄົນຮົງກົງ ຈະດຳເນີນໄປຈົນກວ່າ ສປ.ຈີນ ຈະຍອມມອບສິດທິອັນຊອບທຳໃນການເລືອກຕັ້ງໃຫ້ກັບຄົນຮົງກົງ ແລະ ກ່າວອີກວ່າ ສະຖານະການໃນຮົງກົງຕອນນີ້ ບໍ່ຕ່າງຈາກເຢຍລະມັນໃນຊ່ວງສົງຄາມເຢັນ ທີ່ແບ່ງເປັນເຢຍລະມັນຕາເວັນອອກ ກັບ ເຢຍລະມັນຕາເວັນຕົກ, ຮົງກົງເອງກໍ່ກຳລັງແບ່ງເປັນ 2 ຝ່າຍຄືຝ່າຍໂລກເສລີ ແລະ ຝ່າຍສັງຄົມນິຍົມ.

ໃນອີກດ້ານໜຶ່ງ, ທ່ານ ພໍ ຊານ ໂປ ເລຂາທິການດ້ານການເງິນ ຂອງຄະນະຜູ້ບໍລິຫານຮົງກົງ ຖະແຫຼງສະຖິຕິນັກທ່ອງທ່ຽວທີ່ເດີນທາງມາຢ້ຽມຢາມຮົງກົງ ເມື່ອເດືອນສິງຫາ ທີ່ຜ່ານມາ ມີຈຳນວນຫຼຸດລົງເກືອບ 40% ເມື່ອທຽບກັບຊ່ວງເວລາດຽວກັນຂອງປີທີ່ຜ່ານມາ ແລະ ຫຼຸດລົງ 5% ຈາກເດືອນກໍລະກົດ ຖືເປັນສະຖິຕິທີ່ຕົກຕ່ຳທີ່ສຸດ ຍິ່ງກວ່າການແຜ່ລະບາດຂອງໂລກຊາ ເມື່ອປີ 2003, ເຊິ່ງລັດຖະບານວິເຄາະວ່າເປັນຜົນມາຈາກການປະທ້ວງ ທີ່ແກ່ຍາວມາຕັ້ງແຕ່ເດືອນມິຖຸນາ ແລະ ຍັງບໍ່ມີທິດທາງວ່າຈະຢຸດຕິລົງ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube