ຈີນຮຽກທູດເຢຍລະມັນເຂົ້າພົບ ກໍລະນີໃຫ້ແກ່ນນຳປະທ້ວງຮົງກົງ ພົບລັດຖະມົນຕີຕ່າງປະເທດ

ລາຍງານ 12 ກັນຍາ 2019: ກະຊວງການຕ່າງປະເທດຂອງຈີນອອກຖະແຫຼງການ ເມື່ອວັນພຸດ ທີ່ຜ່ານມາ ມີເນື້ອໃນລະບຸພຽງວ່າ ໄດ້ເຊີນທ່ານ ເຄເມນ ຟອນ ເກິດເຊີ ເອກອັກຄະລັດຖະທູດເຢຍລະມັນ ປະຈຳນະຄອນຫຼວງປັກກິ່ງ ເຂົ້າພົບປຶກສາຫາລື, ໃນດ້ານຂອງທ່ານ ເຄນ ອູ ເອກອັກຄະລັດຖະທູດຈີນ ປະຈຳນະຄອນຫຼວງແບັກແລັງ ໃຫ້ຂໍ້ມູນເພີ່ມເຕີມວ່າ ເປັນການສະແດງຄວາມຜິດຫວັງຢ່າງຍິ່ງຂອງຈີນ ຕໍ່ເຫດການທີ່ເກີດຂຶ້ນໃນເຢຍລະມັນ ອັນຈະສົ່ງຜົນກະທົບໃນດ້ານລົບຕໍ່ສາຍພົວພັນລະຫວ່າງສອງປະເທດ ແລະ ກ່າວອີກວ່າ ນັກເຄື່ອນໄຫວ ແລະ ນັກປະທ້ວງຫົວຮຸນແຮງບາງຄົນ ໃຊ້ຄຳວ່າປະຊາທິປະໄຕເປັນໜ້າກາກ ຫຼື ສາກບັງໜ້າ ໂດຍເຈດຕະນາທີ່ແທ້ຈິງຄືການປຸກລະດົມແນວຄິດແບ່ງແຍກດິນແດນ.

ການເຄື່ອນໄຫວດັ່ງກ່າວຂອງລັດຖະບານຈີນ ເກີດຂຶ້ນພາຍຫຼັງທີ່ທ້າວ ໂຈຊົວ ຫວ່ອງ ນັກເຄື່ອນໄຫວແກ່ນນຳການປະທ້ວງໃນຮົງກົງ ປາກົດຕົວທີ່ນະຄອນຫຼວງແບັກແລັງ ປະເທດເຢຍລະມັນ ເພື່ອຮ່ວມງານ  BILD-100 ທີ່ຈັດໂດຍໜັງສືພິມ BILD ໜັງສືພິມຍັກໃຫຍ່ຂອງເຢຍລະມັນ ກ່ຽວກັບການຈັດອັນດັບບຸກຄົນແຫ່ງປີ 100 ຄົນ ແລະ ຝ່າຍຈັດງານຍັງເປີດໂອກາດໃຫ້ທ້າວ ໂຈຊົວ ຫວ່ອງ ໄດ້ພົບກັບທ່ານ ໄຮໂກ ມາສ ລັດຖະມົນຕີກະຊວງການຕ່າງປະເທດເຢຍລະມັນ ອັນໄດ້ເຮັດໃຫ້ເກີດສຽງວິຈານຈາກລັດຖະບານຈີນ ວ່າເປັນການແຊກແຊງວຽກງານພາຍໃນ, ແຕ່ເຖິງຢ່າງໃດກໍ່ຕາມຝ່າຍຄ້ານເຢຍລະມັນ ໄດ້ວິຈານທ່ານ ນາງ ອັງເກລາ ແມເຄີ ນາຍົກລັດຖະມົນຕີເຢຍລະມັນ ທີ່ບໍ່ເປີດໂອກາດໃຫ້ທ້າວ ໂຈຊົວ ຫວ່ອງ ເຂົ້າພົບ.

ນອກຈາກນີ້, ທ້າວ ໂຈຊົວ ຫວ່ອງ ຍັງໄດ້ໃຫ້ສຳພາດກັບສື່ຂອງເຢຍລະມັນຫຼາຍແຫ່ງ ຢືນຢັນວ່າການປະທ້ວງຮຽກຮ້ອງເສລີພາບຂອງຄົນຮົງກົງ ຈະດຳເນີນຕໍ່ໄປ ຈົນກວ່າ ສປ.ຈີນ ຈະມອບສິດທິອັນຊອບທຳ ໃນການເລືອກຕັ້ງໃຫ້ກັບຄົນຮົງກົງ ແລະ ກ່າວອີກວ່າ ສະຖານະການໃນຮົງກົງຕອນນີ້ຕໍ່ແຕກຕ່າງກັບເຢຍລະມັນໃນຊ່ວງສົງຄາມເຢນ ທີ່ແບ່ງເປັນເຢຍລະມັນຕາເວັນອອກ-ເຢຍລະມັນຕາເວັນຕົກ ໂດຍໃນສ່ວນຂອງຮົງກົງເອງແບ່ງເປັນ 2 ຝ່າຍຄື: ຝ່າຍປະຊາທິປະໄຕ ກັບ ຝ່າຍສັງຄົມນິຍົມ ແລະ ຢືນຢັນວ່າການເຄື່ອນໄຫວຂອງຕົນ ແລະ ແນວຮ່ວມບໍ່ແມ່ນການແບ່ງແຍກເອກະລາດ ພຽງແຕ່ຕ້ອງການທວງສັນຍາຈາກ ສປ.ຈີນ ຕາມຂໍ້ຕົກລົງກ່ອນທີ່ອັງກິດ ຈະສົ່ງມອບຮົງກົງກັບຄືນໃຫ້ ສປ.ຈີນ ເມື່ອປີ 1997 ວ່າຈະມອບສິດທິ ແລະ ເສລີພາບໃນການເລືອກຕັ້ງ ເຊິ່ງເປັນພຽງສິ່ງດຽວເທົ່ານັ້ນທີ່ຕົນຕ້ອງການ ພ້ອມທັງປະຕິເສດຂໍ້ກ່າວຫາຊັກເສິກເຂົ້າບ້ານ ແຕ່ກ່າວວ່າເຢຍລະມັນຄວນຢຸດຕິສົ່ງອອກແກັດນ້ຳຕາ ໃຫ້ກັບຕຳຫຼວດຮົງກົງ ແລະ ສະພາສະຫະລັດ ອາເມຣິກາ ຄວນເລັ່ງຜ່ານກົດໝາຍສະໜັບສະໜູນຝ່າຍປະຊາທິປະໄຕຂອງຮົງກົງ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube