ລັດຖະມົນຕີສິ່ງແວດລ້ອມຄົນໃໝ່ຂອງຍີ່ປຸ່ນ ຕ້ອງການຍົກເລີກໂຮງໄຟຟ້ານິວເຄຼຍ

ລາຍງານ 12 ກັນຍາ 2019, ທ່ານ ຊິນຈິໂຣ ໂຄອິຊູມິ ລັດຖະມົນຕີກະຊວງສິ່ງແວດລ້ອມຄົນໃໝ່ຂອງຍີ່ປຸ່ນ ອາຍຸ 38 ປີ ກ່າວກັບສື່ເປັນຄັ້ງທຳອິດ ເມື່ອວັນພຸດ ທີ່ຜ່ານມາ ພາຍຫຼັງເຂົ້າຮັບຕຳແໜ່ງໃນວັນດຽວກັນ ຕໍ່ກັບຄຳຖາມເລື່ອງນະໂຍບາຍໂຮງໄຟຟ້ານິວເຄຼຍຂອງລັດຖະບານ ວ່າຕົນຕ້ອງການຫາຊ່ອງທາງເພື່ອຍົກເລີກໂຮງໄຟຟ້ານິວເຄຼຍ ບໍ່ແມ່ນຕ້ອງການຢາກຮັກສາໄວ້ ແລະ ຈະບໍ່ປ່ອຍໃຫ້ຍີ່ປຸ່ນຕ້ອງປະສົບອຸປະຕິເຫດນິວເຄຼຍເປັນຄັ້ງທີ 2 ເນື່ອງຈາກເຄີຍເກີດເຫດໂຮງໄຟຟ້ານິວເຄຼຍລະເບີດ ເມື່ອຄັ້ງເກີດແຜ່ນດິນໄຫວຢ່າງຮຸນແຮງ ແລະ ເກີດຄື້ນຍັກສຶນາມິ ໃນປີ 2011, ເພາະບໍ່ສາມາດຮັບຮູ້ໄດ້ລ່ວງໜ້າວ່າຈະເກີດແຜ່ນດິນໄຫວອີກເມື່ອໃດ.

ເຖິງຢ່າງໃດກໍ່ຕາມ, ຄວາມຄິດເຫັນຂອງທ່ານ ຊິນຈິໂຣ ໂຄອິຊູມິ ຍັງບໍ່ມີຜົນໃນທັນທີຕໍ່ຈຸດຢືນຂອງລັດຖະບານທີ່ຈະຍົກເລີກການເພິ່ງພາໂຮງໄຟຟ້ານິວເຄຼຍ, ໃນຂະນະທີ່ຍັງຕ້ອງເພິ່ງພາໄຟຟ້າຈາກຖ່ານຫິນຂ້ອນຂ້າງສູງ, ລັດຖະບານຍີ່ປຸ່ນຕັ້ງເປົ້າຈະໃຊ້ນິວເຄຼຍຜະລິດໄຟຟ້າ 20%-22% ຂອງຄວາມຕ້ອງການໃຊ້ໄຟຟ້າທົ່ວປະເທດໃນປີ 2030.

ທ່ານ ຊິນຈິໂຣ ໂຄອິຊູມີ ເປັນລູກຊາຍຂອງທ່ານ ຈຸນອິຈິໂຣ ໂຄອິຊູມິ ອະດີດນາຍົກລັດຖະມົນຕີຍີ່ປຸ່ນ, ໂດຍໄດ້ຮັບເລືອກເປັນສະມາຊິກສະພາມາຕັ້ງແຕ່ປີ 2009, ນອກຈາກນີ້ຍັງໄດ້ຮັບນິຍົມຈາກຊາວຍີ່ປຸ່ນ ແລະ ສະມາຊິກສະພາອາຍຸນ້ອຍໃນພັກເສລີປະຊາທິປະໄຕ (LDP) ຫຼາຍຄົນເຊື່ອວ່າທ່ານຈະເປັນຜູ້ສະໝັກຊິງຕຳແໜ່ງນາຍົກລັດຖະມົນຕີໃນອະນາຄົດ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube