ສ.ອາເມຣິກາ ຊ່ວຍເຫຼືອໄພນ້ຳຖ້ວມພາກໃຕ້ ສປປ.ລາວ ມູນຄ່າ 100,000 ໂດລາ

ເມື່ອວັນທີ 13 ກັນຍາ 2019 ທີ່ຜ່ານມາ, ທ່ານ ນາງ ຣີນາ ບິດເຕີ ເອກອັກຄະລັດຖະທູດສະຫະລັດ ອາເມຣິກາ ປະຈຳ ສປປ.ລາວ ໄດ້ປະກາດແຈ້ງການຊ່ວຍເຫຼືອຜູ້ປະສົບ ໄພນ້ຳຖ້ວມຢູ່ພາກໃຕ້ຂອງ ສປປ.ລາວ ເປັນມູນຄ່າຈຳນວນ 100,000 ໂດລາສະຫະລັດ. ພ້ອມກ່າວວ່າ: ປະຊາຊົນສະຫະລັດ ອາເມຣິກາທຸກຄົນ ມີຄວາມເປັນຫ່ວງເປັນໃຍ ແລະ ພ້ອມທີ່ຈະຊ່ວຍເຫຼືອປະຊາຊົນລາວ ໂດຍສະເພາະໃນໄລຍະທີ່ປະສົບໄພດັ່ງກ່າວ.

ການຊ່ວຍເຫຼືອດັ່ງກ່າວ ແມ່ນຈະຜ່ານອົງການພັດທະນາສາກົນ ຂອງປະເທດສະຫະລັດ ອາເມຣິກາ (USAID) ການຊ່ວຍເຫຼືອ ໄດ້ແບ່ງອອກ ເປັນແຕ່ລະໄລຍະ, ເຊິ່ງໃນໄລຍະທຳອິດ ແມ່ນກຳລັງດຳເນີນການຈັດຊື້ອາຫານ ແລະ ເຄື່ອງສຸຂະອະນາໄມ ເພື່ອຈັດສົ່ງໃຫ້ ຜູ້ປະສົບໄພ ໃຫ້ທ່ວງທັນ. ເຄື່ອງຊ່ວຍເຫຼືອດັ່ງກ່າວຈະນຳໄປມອບໃຫ້ຄອບຄົວຂອງຜູ້ຖືກກະທົບຈາກນ້ຳຖ້ວມ ທີ່ຍ້າຍມາອາໄສໃນບ່ອນພັກເຊົາຊົ່ວຄາວ, ອາໄສກັບຍາດຕິພີ່ນ້ອງ ແລະ ຜູ້ທີ່ຍັງຕິດຄ້າງຢູ່ໃນເຂດນ້ຳຖ້ວມ. ນອກຈາກນີ້, ສະຫະລັດ ອາເມຣິກາ ຍັງໄດ້ສົ່ງທິມງານຜູ້ຊ່ຽວຊານ ເພື່ອເຮັດວຽກຮ່ວມກັບລັດຖະບານ ສປປ.ລາວ ໃນການປະເມີນສະຖານະການ ແລະ ຄວາມຕ້ອງການຊ່ວຍເຫຼືອໃນຂົງເຂດປະສົບໄພ. ໃນຕົ້ນອາທິດທີ່ຜ່ານມາ, ໂດຍຜ່ານອົງການ Norwegian People’s Aid, ລັດຖະບານສະຫະລັດ ອາເມຣິກາ ໄດ້ນຳໃຊ້ກອງທຶນເກັບກູ້ລະເບີດບໍ່ທີ່ທັນແຕກ (UXO funding) ເພື່ອຊ່ວຍເຫຼືອແຈກຢາຍນ້ຳດື່ມ, ອາຫານ ແລະ ເຄື່ອງໃຊ້ສອຍທີ່ຈຳເປັນ ໃຫ້ແກ່ປະຊາຊົນທີ່ປະສົບໄພນ້ຳຖ້ວມ ຢູ່ແຂວງສາລະວັນ.

- Advertisement -