ສະພາລ່າງ ສ.ອາເມຣິກາ ຈະດຳເນີນການຖອດຖອນ ປ.ທຣຳ ເນື່ອງຈາກລະເມີດລັດຖະທຳມະນູນ

ລາຍງານ 25 ກັນຍາ 2019, ທ່ານ ນາງ ແນນຊີ ເປໂລຊີ ປະທານສະພາປະຊາຊົນສະຫະລັດ ອາເມຣິກາ ຫຼື ສະພາລ່າງ ຖະແຫຼງເມື່ອວັນອັງຄານ 24 ກັນຍາ ທີ່ຜ່ານມາ ເລື່ອງການເລີ່ມຕົ້ນຂະບວນການສືບສວນສອບສວນຢ່າງເປັນທາງການ ເຊິ່ງອາດນຳໄປສູ່ການເປີດຍັດຕິອະພິປາຍ ແລະ ລົງມະຕິຖອດຖອນທ່ານ ໂດໂນ ທຣຳ ປະທານປະເທດ ສ.ອາເມຣິກາ ອອກຈາກຕຳແໜ່ງຜູ້ນຳ, ໂດຍທ່ານ ນາງ ແນນຊີ ເປໂລຊີ ກ່າວວ່າຂະບວນການຖອດຖອນທ່ານ ໂດໂນ ທຣຳ ເປັນຜົນມາຈາກການທີ່ຜູ້ນຳ ສ.ອາເມຣິກາ ລະເມີດລັດຖະທຳມະນູນ ດ້ວຍການຂໍຄວາມຊ່ວຍເຫຼືອຈາກລັດຖະບານຕ່າງປະເທດ ເຊິ່ງນັ້ນກໍ່ຄືອູແກຣນ ເພື່ອຜົນປະໂຫຍດທາງການເມືອງ ນັ້ນຄືການສ້າງຄວາມເສື່ອມເສຍໃຫ້ກັບອະດີດຮອງປະທານປະເທດ ໂຈ ໄບເດນ ເຊິ່ງເປັນໜຶ່ງໃນບຸກຄົນທີ່ມີທ່າອ່ຽງວ່າຈະໄດ້ຮັບການຄັດເລືອກໃຫ້ເປັນຕົວແທນຂອງພັກເດໂມແຄຼດ ໃນການລົງເລືອກຕັ້ງປະທານປະເທດສູ້ກັບທ່ານ ໂດໂທ ທຣຳ ທີ່ຈະຈັດຂຶ້ນໃນເດືອນພະຈິກ ປີໜ້າ.

ຂະນະທີ່ທ່ານ ໂດໂນ ທຣຳ ກ່າວເຖິງການເຄື່ອນໄຫວດັ່ງກ່າວ ວ່າເປັນຂະບວນການຂອງແມ່ມົດທີ່ເປິເປື້ອນ ເພື່ອກຳຈັດຕົນ, ເຖິງແມ່ນວ່າຕະຫຼອດໄລຍະເວລາທີ່ຜ່ານມາ ທ່ານ ນາງ ແນນຊີ ເປໂລຊີ ປະຕິເສດການຮຽກຮ້ອງຂອງສະມາຊິກພັກເດໂມແຄຼດ ທີ່ຄອງສຽງສ່ວນໃຫຍ່ໃນສະພາລ່າງ ຕໍ່ການພິຈາລະນາຖອດຖອນຜູ້ນຳ ສ.ອາເມຣິກາ ມາໂດຍຕະຫຼອດ ແຕ່ທ່ານ ນາງ ຍອມຮັບວ່າປັດໄຈສຳຄັນທີ່ເຮັດໃຫ້ປ່ຽນໃຈ ຄືລາຍງານຂອງສື່ກະແສຫຼັກຫຼາຍແຫ່ງ ເຊິ່ງອ້າງອີງແຫຼ່ງຂ່າວໃນທຳນຽບຂາວ ວ່າທ່ານ ໂດໂນ ທຣຳ ສົນທະນາທາງໂທລະສັບ ກັບທ່ານ ໂວໂລດິເມຍ ເຊເລນສະກີ ປະທານປະເທດອູແກຣນ ເມື່ອວັນທີ 25 ກໍລະກົດ ທີ່ຜ່ານມາ ແລ້ວບັງຄັບຂົ່ມຂູ່ອີກຝ່າຍຢ່າງໜ້ອຍ 8 ຄັ້ງ ໃຫ້ຟື້ນຟູການສືບສວນສອບສວນ ການສໍ້ລາດບັງຫຼວງຂອງທ່ານ ຮັນເຕີ ໄບເດນ ລູກຊາຍຂອງທ່ານ ໂຈ ໄບເດນ ອະດີດຮອງຜູ້ນຳ ສ.ອາເມຣິກາ ທີ່ດຳລົງຕຳແໜ່ງຢູ່ໃນຄະນະຜູ້ບໍລິຫານຂອງບໍລິສັດດ້ານພະລັງງານລາຍໃຫຍ່ແຫ່ງໜຶ່ງຂອງອູແກຣນ.

ເຊິ່ງລາຍງານຂອງສື່ລະບຸວ່າ ທ່ານ ໂດໂນ ທຣຳ ອ່າງເຖິງການທີ່ທ່ານ ໂຈ ໄບເດນ ຕັ້ງເງື່ອນໄຂລະງັບການຊ່ວຍເຫຼືອທາງການເງິນໃຫ້ແກ່ລັດຖະບານອູແກຣນໃນຍຸກນັ້ນ ຫາກຍັງຄົງເດີນໜ້າກວດສອບລູກຊາຍຂອງຕົນ, ສ່ວນທ່ານ ໂດໂນ ທຣຳເອງກໍ່ຂູ່ວ່າຈະລະງັບເງິນຊ່ວຍເຫຼືອແກ່ລັດຖະບານອູແກຣນເຊັ່ນກັນ ໃນຂໍ້ຫາສະໜັບສະໜູນການສໍ້ລາດບັງຫຼວງ ເຖິງແມ່ນວ່າກະຊວງການຕ່າງປະເທດອູແກຣນຢືນຢັນປະຕິເສດວ່າ ບໍ່ເຄີຍກ່ຽວຂ້ອງກັບວຽກງານພາຍໃນຂອງ ສ.ອາເມຣິກາ ບໍ່ວ່າເມື່ອໃດກໍ່ຕາມ.

ຫາກຂະບວນການຖອດຖອນທ່ານ ໂດໂນ ທຣຳ ເກີດຂຶ້ນຈິງ ຈະຖືເປັນຄັ້ງທຳອິດ ນັບຕັ້ງແຕ່ປີ 1998 ທີ່ສະພານິຕິບັນຍັດດຳເນີນການກັບທ່ານ ຄລິນຕັນ ຜູ້ນຳ ສ.ອາເມຣິກາໃນໄລຍະນັ້ນ ຖານໃຫ້ຂໍ້ມູນປອມ ແລະ ຂັດຂວາງຂະບວນການຍຸຕິທຳ ຈາກກໍລະນີຄວາມສຳພັນອັນບໍ່ດີໃນທຳນຽບຂາວ, ເຖິງແມ່ນວ່າສະພາລ່າງມີມະຕິຖອດຖອນທ່ານ ຄລິນຕັນ ແຕ່ອີກ 2 ເດືອນຕໍ່ມາ ສະພາສູງໃຫ້ຖອນມະຕິຂອງສະພາລ່າງ ແລະ ທ່ານ ຄລິນຕັນ ດຳລົງຕຳແໜ່ງຕໍ່ເນື່ອງຈົນຄົບ 2 ສະໄໝ, ສະທ້ອນໃຫ້ເຫັນຊັດເຈນວ່າ ການລົງມະຕິຖອດຖອນຜູ້ນຳ ສ.ອາເມຣິກາ ເປັນເລື່ອງຂອງການຄານອຳນາດລະຫວ່າງສອງສະພາ ແລະ ສອງພັກການເມືອງໃຫຍ່.

- Advertisement -