ຈີນກ່າວວ່າ ເສດຖະກິດໂລກຈະຖົດຖອຍ ເພາະບາງປະເທດສ້າງບັນຫາ ແລ້ວກ່າວໂທດແຕ່ຄົນອື່ນ

ລາຍງານ 28 ກັນຍາ 2019, ທ່ານ ຫວັງ ອີ້ ທີ່ປຶກສາແຫ່ງລັດ ແລະ ລັດຖະມົນຕີກະຊວງການຕ່າງປະເທດຂອງຈີນ ກ່າວຖະແຫຼງຕໍ່ກອງປະຊຸມສະມັດຊາໃຫຍ່ສະຫະປະຊາຊາດ (UNGA) ເມື່ອວັນສຸກ 27 ກັນຍາ ທີ່ຜ່ານມາ ວ່າການສ້າງກຳແພງບໍ່ແມ່ນຫົນທາງແກ້ໄຂຄວາມທ້າທາຍ, ການກ່າວໂທດຄົນອື່ນຕໍ່ບັນຫາທີ່ຕົນເອງເປັນຜູ້ສ້າງຂຶ້ນ ກໍ່ບໍ່ແມ່ນສິ່ງທີ່ສົມຄວນເຊັ່ນກັນ, ບົດຮຽນຈາກວິກິດເສດຖະກິດຕົກຕ່ຳຄັ້ງໃຫຍ່ ພາຍຫຼັງສົງຄາມໂລກ ຄັ້ງທີ I ເຖິງສູນກາງຢູ່ທີ່ອາເມຣິກາເໜືອ ແລະ ເອີຣົບ ແຕ່ໂລກກໍ່ບໍ່ຄວນລືມວ່າເປັນໜຶ່ງໃນກໍລະນີສຶກສາສຳຄັນ ທີ່ຍັງໃຊ້ເພື່ອຮຽນຮູ້ໄດ້ຈົນເຖິງທຸກວັນນີ້.

ທ່ານ ຫວັງ ອີ້ ກ່າວຕໍ່ໄປວ່າ ຕະຫຼອດໄລຍະເວລາ 1 ປີເຄິ່ງ ການຕັ້ງກຳແພງພາສີ ແລະ ການຂົ່ມຂູ່ທາງການຄ້າ, ຕະຫຼອດຮອດຂໍ້ຂັດແຍ່ງລະຫວ່າງຄູ່ກໍລະນີ ບໍ່ພຽງແຕ່ສົ່ງຜົນກະທົບຢ່າງມະຫາສານຕໍ່ຕ່ອງໂຊ້ອຸປະທານ, ຂະນະດຽວກັນຍັງເປັນການທຳລາຍລະບຽບການຄ້າໂລກແບບພະຫຸພາຄີ ແລະ ຫາກສະຖານະການຍັງແກ່ຍາວຢູ່ແບບນີ້ຕໍ່ໄປ ໂລກຂອງພວກເຮົາຕ້ອງປະສົບກັບພາວະເສດຖະກິດຖົດຖອຍຄັ້ງໃຫຍ່ ຊ້ຳຮອຍເມື່ອເກືອບ 100 ປີທີ່ຜ່ານມາອີກຄັ້ງ.

ແນ່ນອນວ່າ ທ່ານ ຫວັງ ອີ້ ຕ້ອງກ່າວເຖິງວັນທີຊາດຈີນ ທີ 1 ຕຸລາ ທີ່ປີນີ້ມີຄວາມໝາຍຄວາມສຳຄັນໃນວາລະຄົບຮອບ 70 ປີ ແຫ່ງການສະຖາປະນາ ສາທາລະນະລັດ ປະຊາຊົນຈີນ ວ່າເມື່ອຫວນກັບໄປ 7 ທົດສະວັດທີ່ຜ່ານມາ ຈີນຢຸດຕິການແບ່ງແຍກ ແລະ ລວມແຜ່ນດິນຄືນໃໝ່ໃຫ້ເປັນຜືນດຽວ ເມື່ອວັນທີ 1 ຕຸລາ 1949 ເຊິ່ງເປັນວັນທີ່ປະທານ ເໝົາ ເຈີຕົງ ປະກາດຜ່ານໄມກາງຈັດຕຸລັດທຽນອານເໝິນ ໃນນະຄອນຫຼວງປັກກິ່ງ ເມື່ອປະທານເໝົາ ເຖິງແກ່ກຳ ໃນອີກ 27 ປີຕໍ່ມາ ຈີນປະສົບກັບພາວະເສດຖະກິດຖົດຖອຍຄັ້ງໃຫຍ່, ສະພາບສັງຄົມທີ່ຊຸດໂຊມ ແລະ ປະຊາຊົນຕ້ອງອົດຢາກ, ໃນຂະນະທີ່ສະຖາບັນການປົກຄອງຂາດສະຖຽນລະພາບ ຈີນຈຶ່ງຕ້ອງລຸກຂຶ້ນມາປະຕິຮູບ ແລະ ພັດທະນາຕາມແບບຂອງຕົວເອງ ທີ່ເຮັດໃຫ້ຈີນເປັນຈີນຈົນເຖິງທຸກວັນນີ້ ປະຊາຊົນຫຼາຍກວ່າ 1,400 ລ້ານຄົນມີກິນມີໃຊ້ ຈີນຜ່ານຮ້ອນຜ່ານໜາວກັບປະຫວັດສາດ ແລະ ອາລິຍະທຳທີ່ຍາວນານກວ່າ 5,000 ປີ ແລະ ຈະບໍ່ມີວັນຍອມຄຸກເຂົ່າ ໃຫ້ກັບການຂົ່ມຂູ່ຮຸກຮານຂອງໃຜອີກຕໍ່ໄປ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube