ການປະທ້ວງໃນຮົງກົງ ດຸເດືອດຮຸນແຮງທີ່ສຸດໃນຮອບ 3 ເດືອນ ເພື່ອທຳລາຍບັນຍາກາດວັນຊາດຈີນ

ລາຍງານ 29 ກັນຍາ 2019, ເກີດການປະທະກັນລະຫວ່າງກຸ່ມເຄື່ອນໄຫວທີ່ຮຽກຮ້ອງປະຊາທິປະໄຕຫຼາຍພັນຄົນ ກັບຕຳຫຼວດຮົງກົງ ເມື່ອຕອນຄ່ຳຂອງວັນອາທິດນີ້ ໃນເຂດການຄ້າ ຄອສເວເບ, ເຂດບາໄນຄລັບ, ຫວ່ານໄຈ໋ ແລະ ເຂດແອດມິຣໍຕີ ທີ່ຕັ້ງສຳນັກງານລັດຖະບານ ຕຳຫຼວດໃຊ້ປືນສີດນ້ຳແຮງດັນສູງ, ລູກປືນຢາງ ແລະ ແກັສນ້ຳຕາ, ຂະນະທີ່ກຸ່ມຜູ້ປະທ້ວງຕອບໂຕ້ດ້ວຍລະເບີດໄຟ ແລະ ກ້ອນຫິນ ຖືເປັນການປະທະກັນຮຸນແຮງດຸເດືອດ ໃນວົງກວ້າງທີ່ສຸດ ໃນຮອບກວ່າ 3 ເດືອນຂອງການປະທ້ວງຕໍ່ຕ້ານຄະນະຜູ້ບໍລິຫານເຂດຮົງກົງ ແລະ ລັດຖະບານຈີນ.

ການປະທ້ວງມີຈຸດໝາຍເພື່ອທຳລາຍບັນຍາກາດ ການສະເຫຼີມສະຫຼອງວັນຊາດຈີນ ທີ່ຈະຈັດຂຶ້ນຢ່າງຍິ່ງໃຫຍ່ໃນວັນອັງຄານ ທີ 1 ຕຸລາ ທີ່ຈະມາເຖິງນີ້ ເຊິ່ງປີນີ້ມີວາລະຄົບຮອບ 70 ປີ ຂອງການສະຖາປະນາສາທາລະນະລັດ ປະຊາຊົນຈີນ ໂດຍພິທີສະເຫຼີມສະຫຼອງຈະຈັດຂຶ້ນທີ່ຈັດຕຸລັດທຽນອານເໝິນ ໃນນະຄອນຫຼວງປັກກິ່ງ, ນອກຈາກຈະມີການເດີນສວນສະໜາມຂອງກອງທັບປົດປ່ອຍປະຊາຊົນຈີນແລ້ວ ຍັງຈະມີຂະບວນຂອງປະຊາຊົນ ເຊິ່ງຈີນຈະສະແດງໃຫ້ໂລກໄດ້ເຫັນເຖິງຄວາມຈະເລີນກ້າວໜ້າ ຈາກການພັດທະນາປະເທດໃນດ້ານຕ່າງໆ ໃນໄລຍະ 70 ປີຂອງການປ່ຽນລະບອບການປົກຄອງ.

ແກນນຳກຸ່ມເຄື່ອນໄຫວໃນຮົງກົງປະກາດຈະລວມຕົວປະທ້ວງຄັ້ງໃຫຍ່ສຸດ ຈົນເຖິງວັນທີ 1 ຕຸລາ ພ້ອມກັບຮຽກຮ້ອງໄປຍັງແນວຮ່ວມທົ່ວໂລກ ໃຫ້ລວມຕົວກັນປະທ້ວງໃນເມືອງຕ່າງໆ ເພື່ອຮ່ວມກັນຕໍ່ຕ້ານ, ເຊິ່ງລາຍງານລະບຸວ່າ ໃນວັນອາທິດນີ້ ມີແນວຮ່ວມຫຼາຍພັນຄົນ ອອກມາເດີນຂະບວນໃນເມືອງຊິດນີ ເມືອງໃຫຍ່ສຸດຂອງອົດສະຕຣາລີ ແລະ ນະຄອນໄທເປ ຂອງໄຕ້ຫວັນ ເພື່ອສະແດງພະລັງສະໜັບສະໜູນກຸ່ມຜູ້ປະທ້ວງໃນຮົງກົງ, ແກນນຳກຸ່ມເຄື່ອນໄຫວໃນຮົງກົງເປີດເຜີຍອີກວ່າ ຈະມີແນວຮ່ວມລວມຕົວປະທ້ວງໃນ 40 ເມືອງທົ່ວເອີຣົບ ແລະ ອາເມຣິກາເໜືອ ໃນຕອນຄ່ຳວັນອາທິດນີ້.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube