ລັດເຊຍກ່າວວ່າ ຕາເວັນຕົກເປັນພວກລະເມີດກົດລະບຽບໂລກ ເພື່ອຜົນປະໂຫຍດຂອງກຸ່ມຕົນ

ລາຍງານ 30 ກັນຍາ 2019, ທ່ານ ເຊີເກ ລາວາຣົບ ລັດຖະມົນຕີກະຊວງການຕ່າງປະເທດລັດເຊຍ ກ່າວຖະແຫຼງຕໍ່ກອງປະຊຸມສະມັດຊາໃຫຍ່ສະຫະປະຊາຊາດ (UNGA) ຄັ້ງທີ 74 ທີ່ນະຄອນນິວຢອກ, ສະຫະລັດ ອາເມຣິກາ ເມື່ອວັນສຸກ 27 ກັນຍາ ທີ່ຜ່ານມາ ມີເນື້ອໃນສຳຄັນໂດຍການກ່າວນຳວ່າ ເຖິງແມ່ນວ່າ UN ສາມາດປ້ອງກັນສົງຄາມໂລກ ຄັ້ງທີ 3 ໄວ້ໄດ້ ແຕ່ກໍ່ສວນທາງກັບຄວາມຂັດແຍ່ງໃນໂລກທີ່ບໍ່ໄດ້ຫຼຸດໜ້ອຍລົງ ແລະ ເປັນຂໍ້ຂັດແຍ່ງທີ່ມີຄວາມຫຼາກຫຼາຍຂຶ້ນເລື້ອຍໆ ເນື່ອງຈາກຍັງມີປະເທດຕາເວັນຕົກທີ່ອ້າງຕົວວ່າເປັນຜູ້ຊະນະສົງຄາມເຢັນ ຍັງຄົງບໍ່ຍອມຮັບສິດທິ ແລະ ຜົນປະໂຫຍດອັນຊອບທຳຂອງລັດອື່ນ.

ເຊິ່ງທ່ານ ເຊີເກ ລາວາຣົບ ກ່າວເຖິງຈຸດຢືນດັ່ງກ່າວ ວ່າສະທ້ອນໃຫ້ຮູ້ເຖິງຄວາມຍາກລຳບາກໃຈ ຂອງບັນດາປະເທດແຖວໜ້າໃນໂລກຕາເວັນຕົກ ໃນການຍອມຮັບການພັດທະນາ ແລະ ຄວາມກ້າວໜ້າ ຕະຫຼອດຮອດການປ່ຽນແປງຂອງໂລກຍຸກປັດຈຸບັນ ທີ່ມີຄວາມຫຼາກຫຼາຍຂຶ້ນ ອຳນາດບໍ່ໄດ້ກະຈຸກຢູ່ທີ່ປະເທດແຫ່ງດຽວ ຫຼື ການລວມກຸ່ມຂອງປະເພດພຽງບໍ່ພໍເທົ່າໃດປະເທດອີກຕໍ່ໄປ, ເຖິງຢ່າງໃດກໍ່ຕາມ ກຸ່ມປະເທດຕາເວັນຕົກຍັງຄົງໃຊ້ຍຸດທະສາດແບບດັ້ງເດີມ ນັ້ນກໍ່ຄືການຂວ້ຳບາດເພື່ອຫວັງກົດດັນ ແລະ ສ້າງມາດຕະຖານໃຫ້ປະເທດທີ່ບໍ່ແມ່ນພວກດຽວກັນ ຍອມເດີນຕາມທາງທີ່ຕົນກຳນົດ ຖ້າບໍ່ດັ່ງນັ້ນກໍ່ຈະຍອມຝ່າຍລົງທຶນລະເມີດກົດໝາຍລະຫວ່າງປະເທດເອງ ເຊັ່ນ: ການທີ່ ສ.ອາເມຣິກາ ຖອນຕົວອອກຈາກຂໍ້ຕົກລົງນິວເຄຼຍກັບອີຣານ ເມື່ອປີທີ່ຜ່ານມາ ແລ້ວຖອນທຶນຄືນ ໂດຍການໃຊ້ມາດຕະການຂັ້ນເດັດຂາດ ຕາມແບບຂອງຕົວເອງ ທີ່ບໍ່ແມ່ນພຽງເປັນການບີບບັງຄັບອີຣານ ແຕ່ຍັງກະທົບເຖິງປະຊາຄົມໂລກທັງໝົດອີກດ້ວຍ.

ຂະນະດຽວກັນ, ທ່ານ ເຊີເກ ລາວາຣົບ ຍັງໄດ້ຍົກເອົາໜຶ່ງໃນມາດຕາສຳຄັນຂອງກົດບັດສະຫະປະຊາຊາດ ນັ້ນຄືການທີ່ປະເທດໜຶ່ງ ຕ້ອງບໍ່ແຊກແຊງວຽກງານພາຍໃນຂອງອີກປະເທດໜຶ່ງ ແຕ່ຂໍ້ກຳນົດຂອງສະຫະປະຊາຊາດໃນບັນຫານີ້ ເກືອບວ່າບໍ່ເຄີຍໄດ້ຮັບການປະຕິບັດຕາມ ແລະ ຕົວຢ່າງຊັດເຈນກຳລັງເກີດຂຶ້ນໃນເວເນຊູເອລາ ດັ່ງນັ້ນ, ຈຶ່ງເປັນສິ່ງສຳຄັນທີ່ສະມາຊິກສະຫະປະຊາຊາດທຸກປະເທດຕ້ອງຮ່ວມກັນເພີ່ມຄວາມໃສ່ໃຈ ໃນການປະຕິບັດຕາມກົດໝາຍລະຫວ່າງປະເທດ ແລະ ຂໍ້ຕົກລົງທຸກສະບັບທີ່ສະຫະປະຊາຊາດເປັນຄົນກາງ ເພື່ອສະຖຽນລະພາບດ້ານຄວາມໝັ້ນຄົງຂອງໂລກ ທີ່ຕອນນີ້ການປ້ອງກັນການແຊກແຊງຍັງຕ້ອງຄວບຄຸມເຖິງ ສົງຄາມໄຊເບີສະເປສອີກດ້ວຍ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube