ຍີ່ປຸ່ນຊ່ວຍເຫຼືອລ້າກວ່າ 17 ລ້ານໂດລາ, ປັບປຸງລະບົບນ້ຳປະປາ ທີ່ນະຄອນຫຼວງພະບາງ

ລາຍງານ 9 ຕຸລາ 2019, ອີງຕາມການລາຍງານຂອງສະຖານເອກອັກຄະລາຊະທູດຍີ່ປຸ່ນ ປະຈຳ ສປປ.ລາວ ໃຫ້ຮູ້ວ່າ ໄດ້ມີພິທີລົງນາມເອກະສານແລກປ່ຽນສຳລັບໂຄງການຊ່ວຍເຫຼືອລ້າ ທີ່ກະຊວງການຕ່າງປະເທດ, ນະຄອນຫຼວງວຽງຈັນ ເມື່ອວັນທີ 5 ຕຸລາ ທີ່ຜ່ານມາ.

ເອກະສານດັ່ງກ່າວໄດ້ຮັບການລົງນາມ ແລະ ແລກປ່ຽນໂດຍ ທ່ານ ວາກາມິຍະ ເຄັນຈິ ຮອງລັດຖະມົນຕີກະຊວງການຕ່າງປະເທດຢິ່ປຸ່ນ ແລະ ທ່ານ ທອງຜ່ານ ສະຫວັນເພັດ ຮອງລັດຖະມົນຕີກະຊວງການຕ່າງປະເທດ ແຫ່ງ ສປປ.ລາວ, ໂດຍມີ ທ່ານ ທາເຄວາກະ ເຄໂຊ ເອກອັກຄະລາຊະທູດຍີ່ປຸ່ນ ປະຈຳ ສປປ.ລາວ ແລະ ໂຕແທນຈາກບັນດາກະຊວງທີ່ກ່ຽວຂ້ອງເຂົ້າຮ່ວມເປັນສັກຂີພະຍານ.

ໂຄງການຊ່ວຍເຫຼືອລ້າດັ່ງກ່າວມີມູນຄ່າ 1,922 ລ້ານເຢັນ ຫຼື ປະມານ 17.8 ລ້ານໂດລາສະຫະລັດ ເພື່ອປະກອບສ່ວນເຂົ້າໃນການຈັດຕັ້ງໂຄງການປັບປຸງລະບົບນ້ຳປະປາ ທີ່ນະຄອນຫຼວງພະບາງ ແຂວງຫຼວງພະບາງ ຜ່ານການສ້ອມແປງໂຮງງານບຳບັດນ້ຳເປື້ອນ, ສ້ອມແປງ ແລະ ຂະຫຍາຍທໍ່ສົ່ງນ້ຳ ແລະ ອຸປະກອນສິ່ງອຳນວຍຄວາມສະດວກສຳລັບລະບົບລະບາຍນ້ຳ. ຈຳນວນປະຊາກອນໃນຂົງເຂດເປົ້າໝາຍຂອງໂຄງການຈຳນວນ 73,593 ຄົນ, ພື້ນທີ່ກວ້າງກວ່າ 68,695 m2, ໂດຍຕັ້ງເປົ້າວ່າຈະສຳເລັດໃນປີ 2025.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube