ມະຫາພາຍຸໄຕ້ຝຸ່ນ ທີ່ຮຸນແຮງທີ່ສຸດໃນຮອບກວ່າ 60 ປີ ຈະພັດເຂົ້າປະເທດຍີ່ປຸ່ນ

ລາຍງານ 11 ຕຸລາ 2019, ມະຫາພາຍຸໄຕ້ຝຸ່ນ ຫົວທີ 19 ຂອງປີນີ້ ເຊິ່ງເປັນພາຍຸທີ່ມີຂະໜາດໃຫຍ່ຫຼາຍ ເສັ້ນຜ່າສູນກາງ 1,400 ກິໂລແມັດ ແລະ ມີຄວາມຮຸນແຮງລະດັບ 5, ກຳລັງເຄື່ອນທີ່ດ້ວຍຄວາມໄວ 25 ກິໂລແມັດຕໍ່ຊົ່ວໂມງ ດ້ວຍແຮງລົມສູງສຸດ 252 ກິໂລແມັດຕໍ່ຊົ່ວໂມງ ເຂົ້າໃກ້ເກາະຮອນຊູ ແລະ ຈະສົ່ງຜົນກະທົບຕໍ່ຍີ່ປຸ່ນທົ່ວປະເທດ.

ທາງການຍີ່ປຸ່ນຄາດວ່າພາຍຸດັ່ງກ່າວ ຈະສົ່ງຜົນກະທົບໃຫ້ເກີດຄື້ນສູງຕະຫຼອດຊາຍຝັ່ງເບື້ອງຕາເວັນອອກຂອງປະເທດ ແລະ ສົ່ງຜົນໃຫ້ມີຝົນຕົກໜັກ, ນ້ຳຖ້ວມກະທັນຫັນໃນຫຼາຍພື້ນທີ່ໃນລະຫ່າງວັນທີ 11-13 ກັນຍາ 2019 ນີ້ ແລະ ຖືເປັນພາຍຸທີ່ຮຸນແຮງທີ່ສຸດທີ່ພັດເຂົ້ານະຄອນຫຼວງໂຕກຽວ ນັບຕັ້ງແຕ່ປີ 1958 ເປັນຕົ້ນມາ.

ພາຍຸດັ່ງກ່າວສົ່ງຜົນໃຫ້ສາຍການບິນຫຼາຍສາຍ ຕ້ອງປະກາດຍົກເລີກຖ້ຽວບິນເຂົ້າ-ອອກ ທັງສອງສະໜາມບິນຫຼັກໃນນະຄອນໂຕກຽວສະໜາມບິນນາຣິຕະ ແລະ ສະໜາມບິນຮາເນດະ ຕະຫຼອດໄລຍະທ້າຍອາທິດນີ້, ນອກຈາກນີ້ຜູ້ໃຫ້ບໍລິການລົດໄຟຟ້າ ໃນໂຕກຽວ ລວມເຖິງຂະບວນລົດໄຟຊິນຄັນເຊັນ ແລະ ລົດໄຟທ້ອງຖິ່ນຫຼາຍສາຍ ໄດ້ປະກາດຍົກເລີການເດີນທາງເຊັ່ນກັນ.

ໃນດ້ານລັດຖະບານຍີ່ປຸ່ນໄດ້ອອກປະກາດໃນຫຼາຍພາສາ ເພື່ອແຈ້ງເຕືອນໃຫ້ນັກທ່ອງທ່ຽວຕິດຕາມສະຖານະການ ແລະ ປະກາດຕ່າງໆທີ່ສຳຄັນຢ່າງໃກ້ຊິດ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube