ສ.ອາເມຣິກາ-ຊາອູດິດຂໍໃຫ້ປາກິດສະຖານ ຊ່ວຍເປັນຄົນກາງເຈລະຈາກັບອີຣານ

ລາຍງານ 14 ຕຸລາ 2019, ກະຊວງການຕ່າງປະເທດປາກິດສະຖານ ອອກຖະແຫຼງການເມື່ອວັນອາທິດ 13 ຕຸລາ ທີ່ຜ່ານມາ ວ່າການເດີນທາງຢ້ຽມຢາມອີຣານຂອງທ່ານ ອິມຣານ ຂານ ເປັນສ່ວນໜຶ່ງຂອງຂໍ້ລິເລີ່ມ ເພື່ອສົ່ງເສີມສັນຕິພາບ ແລະ ຄວາມໝັ້ນຄົງໃນພູມມິພາກ, ທ່ານ ອິມຣານ ຂານມີກຳນົດວາລະເຂົ້າຢ້ຽມຂ່ຳນັບ ແລະ ປຶກສາຫາລືກັບທ່ານ ຢາຕອນເລາະ ອາລີ ຄາເມນີ ຜູ້ນຳສູງສຸດຂອງອີຣານ ແລະ ທ່ານ ຮັສຊັນ ໂຣຮານີ ປະທານປະເທດອີຣານ.

ຖືເປັນການຢ້ຽມຢາມອີຣານເປັນຄັ້ງທີ 2 ຂອງທ່ານ ອິມຣານ ຂານໃນປີນີ້ ແລະ ຍັງໄດ້ພົບປະເຈລະຈາສອງຝ່າຍກັບທ່ານ ຮັສຊັນ ໂຣຮານີ ນອກຮອບກອງປະຊຸມສະມັດຊາໃຫຍ່ສະຫະປະຊາຊາດ ໃນນະຄອນນິວຢອກ ສ.ອາເມຣິກາ ເມື່ອທ້າຍເດືອນກັນຍາ ທີ່ຜ່ານມາ.

ປາກິດສະຖານ ແລະ ອີຣານເປັນປະເທດເພື່ອນບ້ານ ແລະ ພັນທະມິດໃກ້ຊິດ ມີເຂດແດນຮ່ວມຄວາມຍາວປະມານ 1,000 ກິໂລແມັດ ແລະ ປາກິດສະຖານຍັງມີສາຍພົວກັນທີ່ເຂັ້ມແຂງກັບອາຣັບບີ ຊາອູດິດອີກດ້ວຍ, ປັດຈຸບັນມີຊາວປາກິດສະຖານໃຊ້ອາໄສຢູ່ ແລະ ເຮັດວຽກໃນອາຣັບບີ ຊາອູດິດຫຼາຍກວ່າ 2.5 ລ້ານຄົນ.

ທ່ານ ອິມຣານ ຂານ ທີ່ຈະເດີນທາງຕໍ່ໄປຍັງນະຄອນຫຼວງຣິຢາດ ຂອງອາຣັບບີ ຊາອູດິດ ພາຍຫຼັງສຳເລັດການຢ້ຽມຢາມອີຣານຄັ້ງນີ້ ເປີດເຜີຍເມື່ອເດືອນທີ່ຜ່ານມາວ່າ ຕົນໄດ້ຮັບການຮ້ອງຂໍ ທັງຈາກ ສ.ອາເມຣິກາ ແລະ ອາຣັບບີ ຊາອູດິດ ໃຫ້ຊ່ວຍເປັນຄົນກາງເຈລະຈາກັບອີຣານ ເພື່ອຜ່ອນຄາຍຄວາມເຄັ່ງຕຶງໃນອ່າວເປີເຊຍ ພາຍຫຼັງເກີດເຫດໂຈມຕີເຮືອບັນທຸກນ້ຳມັນຫຼາຍຄັ້ງຂອງທັງສອງຝ່າຍ ແຕ່ຍັງບໍ່ສາມາດລະບຸຜູ້ລົງມືກໍ່ເຫດໄດ້ຢ່າງຊັດເຈນ ລວມທັງການໃຊ້ໂດຣນຕິດລະເບີດ ໂຈມຕີໂຮງກັ່ນນ້ຳມັນ ແລະ ບໍ່ນ້ຳມັນຂອງອາຣັບບີ ຊາອູດິດ.

 


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube