ເຈົ້າຊາຍແຫ່ງຊອກດານີ ເດີນທາງຢ້ຽມຢາມ ແລະ ເຮັດວຽກຢູ່ ສປປ.ລາວ

ລາຍງານ 24 ຕຸລາ 2019, ອີງຕາມການລາຍງານຂອງກະຊວງການຕ່າງປະເທດໃຫ້ຮູ້ວ່າ: ໃນລະ​ຫວ່າ​ງວັນ​ທີ 23 – 24 ຕຸລາ 2019, ເຈົ້າຊາຍ Mired Raad Zeid Al-Hussein, ແຫ່ງຊອກດານີ (ຈໍແດນ), ໃນຖານະຜູ້ຕາງໜ້າພິເສດຂອງສົນທິສັນຍາວ່າດ້ວຍການເກືອດຫ້າມລະເບີດຝັງດິນຕ້ານບຸກຄົນ ໄດ້ເດີນທາງມາຢ້ຽມຢາມ ແລະ ເຮັດວຽກຢູ່ ສປປ.ລາວ.

ໃນໂອກາດນີ້, ເຈົ້າຊາຍ ພ້ອມດ້ວຍຄະນະໄດ້ເຂົ້າ​ຢ້ຽ​ມ​ຂໍ່າ​ນັບທ່ານ ທອງລຸນ ສີສຸລິດ ​ນາ​ຍົກ​ລັດ​ຖະ​ມົນ​ຕີ, ທ່ານ ພົນເອກ ຈັນສະໝອນ ຈັນຍາລາດ ລັດຖະມົນຕີກະຊວງປ້ອງກັນປະເທດ, ທ່ານ ສະ​ເຫຼີມ​ໄຊ​ ກົມ​ມະ​ສິດ ລັດ​ຖະ​ມົນ​ຕີ ກະຊວງ​ການ​ຕ່າງ​ປະ​ເທດ, ແລະ ທ່ານ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ, ເພື່ອແລກປ່ຽນບົດຮຽນ ໃນວຽກງານເກັບກູ້ສິ່ງເສດເຫຼືອຈາກປາງສົງຄາມ ແລະ ສົ່ງເສີມການຮ່ວມມືໃນດ້ານການຊ່ວຍເຫຼືອຜູ້ໄດ້ຮັບຜົນກະທົບ.

ພ້ອມດຽວກັນນັ້ນ, ເຈົ້າຊາຍພ້ອມດ້ວຍຄະນະໄດ້ເດີນ ທາງໄປຢ້ຽມຢາມໂຄງການເກັບກູ້ລະເບີດ ທີ່ ບ້ານຫາດຍາ, ເມືອງປາກອູ, ແຂວງ ຫຼວງພະບາງ ໃນວັນທີ 23 ຕຸລາ 2019, ເພື່ອຕິດຕາມ ແລະ ເກັບກຳສະພາບຕົວຈິງໃນການເກັບກູ້ລະເບີດບໍ່ທັນແຕກທີ່ຕົກຄ້າງຢູ່ ສປປ.ລາວ ເຊິ່ງການແກ້ໄຂບັນຫາດັ່ງກ່າວເປັນໜຶ່ງໃນບູລິມະສິດຂອງລັດຖະບານລາວ.

ສົນທິສັນຍາວ່າດ້ວຍການເກືອດຫ້າມການນຳໃຊ້ລະເບີດຝັງດິນຕ້ານບຸກຄົນ ຫຼື ສົນທິສັນຍາໂອຕາວາ (Ottawa Convention) ໄດ້ມີການເລີ່ມລົງນາມໃນປີ 1997 ແລະ ມີຜົນບັງຄັບໃຊ້ໃນວັນທີ 01 ມີນາ 1999. ປັດຈຸບັນມີ 164 ປະເທດ ທີ່ໃຫ້ສັດຕະຍາບັນ, 1 ປະເທດ ລົງນາມແລ້ວ, ເຖິງວ່າ ສປປ.ລາວ ຍັງບໍ່ໄດ້ເປັນພາຄີ ແຕ່ກໍ່ໃຫ້ການສະໜັບສະໜູນຈຸດປະສົງ ແລະ ເປົ້າໝາຍທາງດ້ານມະນຸດສະທຳ ຂອງສົນທິສັນຍາ ໂອຕາວາ ແລະ ໄດ້ເຂົົ້າຮ່ວມກອງປະຊຸມລັດພາຄີໃນຖານະປະເທດສັງເກດການ.

ປັດຈຸບັນ, ລັດຖະບານ ພວມສຸມໃສ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 05 ປີ ຄັ້ງທີ 8​(2016-2020) ແລະ ການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ (ປພຍ) ເຊິ່ງ ສປປ.ລາວ ໄດ້ຮັບຮອງເອົາເປົ້າໝາຍແຫ່ງຊາດ ເປົ້າໝາຍທີ່ 18 “ຊິວິດປອດໄພຈາກລະເບີດທີ່ບໍ່ທັນແຕກ” ທີ່ມີເປົ້າໝາຍແນ່ໃສ່ຫຼຸດຜ່ອນຜົນກະທົບຈາກລະເບີດທີ່ບໍ່ທັນແຕກ ຕໍ່ການດຳລົງຊິວິດຂອງປະຊາຊົນລາວ ແລະ ການພັດທະນາປະເທດ. ສະນັ້ນ, ການແກ້ໄຂບັນຫາດັ່ງກ່າວ ຈຶ່ງແມ່ນບັນຫາຮີບດ່ວນເມື່ອທຽບໃສ່ບັນຫາລະເບີດຝັງດີນ. ພ້ອມດຽວກັນນີ້, ການ​ເດີນ​ທາງ​ມາຢ້ຽມ​ຢາມໃນ​ຄັ້ງ​ນີ້ແມ່ນເຫດການທີ່ສຳຄັນ ສະແດງໃຫ້ເຫັນເຖິງສາຍພົວພັນ ແລະ ການຮ່ວມມືທີ່ດີຂອງ ສປປ.ລາວ ແລະ ວົງຄະນະຍາດສາກົນໃນໄລຍະຜ່ານມາ ເປັນຕົ້ນແມ່ນການປະຕິບັດພັນທະຕໍ່ສາກົນຂອງ ສປປ.ລາວ ໃນບັນຫາທີເປັນບູລິມມະສິດຂອງລັດຖະບານໃຫ້ບັນລຸຕາມຄາດໝາຍທີ່ວາງໄວ້.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube