ແຂວງໄຊຍະບູລີ ມີຮອຍເລື່ອນຢູ່ຢ່າງໜາແໜ້ນ ແລະ ມີໂອກາດເກີດແຜ່ນດິນໄຫວເຖິງ 7 ຣິກເຕີ

ລາຍງານ 22 ພະຈິກ 2019, ຈາກເຫດແຜ່ນດິນໄຫວຂະໜາດ 5.9 ຣິກເຕີ ເມື່ອເວລາ 04:03 ນາທີ ແລະ ຕໍ່ດ້ວຍຄວາມຮຸນແຮງທີ່ສຸດຂອງການສັ່ນໄຫວເຖິງ 6.4 ຣິກເຕີ ເມື່ອເວລາ 06:50 ນາທີ, ຂອງວັນທີ 21 ພະຈິກ 2019 ທີ່ຜ່ານມາ ຢູ່ແຂວງໄຊຍະບູລີ ແລະ ຕາມດ້ວຍການສັ່ນໄຫວຢ່າງຕໍ່ເນື່ອງອີກຫຼາຍກວ່າ 80 ຄັ້ງ ທີ່ໄດ້ສ້າງຄວາມເສຍຫາຍແກ່ສິ່ງປຸກສ້າງ ແລະ ເຮັດໃຫ້ປະຊາຊົນໄຊຍະບູລີຍັງຢູ່ໃນຄວາມແຕກຕື່ນ.

ສຳນັກຂ່າວ BBC Thai ໄດ້ສຳພາດ ສຈ. ດຣ. ປັນຍາ ຈາຣຸສິຣິ ທີ່ປຶກສາກົມຊັບພະຍາກອນທໍລະນີ ແລະ ອະດີດອາຈານ ປະຈຳພາກວິຊາທໍລະນີວິທະຍາ, ຄະນະວິທະຍາສາດ, ຈຸລາລົງກອນມະຫາວິທະຍາໄລ, ປະເທດໄທ ໃຫ້ຮູ້ວ່າ: ບໍລິເວນທາງພາກໃຕ້ຂອງຈີນ ຕໍ່ໃສ່ຫວຽດນາມ ແລະ ລາວ ມີຮອນເລື່ອນຂະແໜງໃຫຍ່ ທີ່ຮຽກວ່າຮອຍເລື່ອນ “ດຽນບຽນຟູ” ເຊິ່ງເປັນຮອຍເລື່ອນທີ່ລາກເສັ້ນຕໍ່ຈາກແມ່ນ້ຳແດງຂອງຈີນ ຮອຍເລື່ອນນີ້ໄດ້ຮັບການພິສູດແລ້ວວ່າເປັນຮອຍເລື່ອນທີ່ມີພະລັງ.

ຜູ້ຊ່ຽວຊານດ້ານທໍລະນີວິທະຍາທ່ານນນີ້ລະບຸອີກວ່າ ຈາກຂໍ້ມູນທີ່ມີສະແດງໃຫ້ເຫັນວ່າທາງພາກເໜືອຂອງ ສປປ.ລາວ ມີຮອຍເລື່ອນທີ່ມີພະລັງຢູ່ຢ່າງໜາແໜ້ນ ແຕ່ຍັງບໍ່ມີການສຳຫຼວດພິສູດໄດ້ຄົບທັງໝົດ, ຂະນະທີ່ຮອຍເລື່ອນຫຼາຍແຫ່ງລາກເສັ້ນຕໍ່ເນື່ອງເຂົ້າໃນພື້ນທີ່ຂອງປະເທດໄທ.

ສຈ. ດຣ. ປັນຍາ ກ່າວວ່າສາເຫດທີ່ແຜ່ນດິນໄຫວໃນ ສປປ.ລາວ ຄັ້ງນີ້, ສາມາດຮັບຮູ້ແຮງສັ່ນສະເທືອນໄດ້ເຖິງຫົວເມືອງໃຫຍ່ໆຂອງໄທ ເປັນເພາະເກີດຂຶ້ນໃນລະດັບທີ່ບໍ່ເລິກ ແລະ ເກີດໃນບໍລິເວນທີ່ມີຮອຍເລື່ອນເຊື່ອມຕໍ່ກັນ, ເຊິ່ງກົມອຸຕຸນິຍົມວິທະຍາຂອງໄທລະບຸວ່າ: ແຜ່ນດິນໄຫວຂະໜາດ 6.4 ຣິກເຕີ ຄັ້ງນີ້ມີຄວາມເລິກຈາກຜິວດິນພຽງ 3 ກິໂລແມັດ.

ນອກຈາກນີ້, ສຈ. ດຣ. ປັນຍາ ຍັງສະແດງຄວາມເປັນຫ່ວງຕໍ່ເຂື່ອນໄຟຟ້າໄຊຍະບູລີ ໂດຍກ່າວກັບ BBC Thai ອີກວ່າ: ເຖິງແມ່ນວ່າທີ່ຕັ້ງຂອງເຂື່ອນໄຊຊຍະບູລີ (ເຂື່ອນແມ່ນ້ຳຂອງ) ຕັ້ງຢູ່ເທິງຮອຍເລື່ອນທີ່ເປັນຫິນແຂງ ເປັນຮອຍເລື່ອນທີ່ຕາຍແລ້ວບໍ່ມີພະລັງ ແຕ່ສິ່ງທີ່ໜ້າເປັນຫ່ວງຄືບໍລິເວນໃກ້ຄຽງເຊັ່ນ ຕົວເມືອງໄຊຍະບູລີ ເຄີຍມີການສຶກສາແລ້ວວ່າຍັງປາກົດຮອຍເລື່ອນທີ່ມີພະລັງຢູ່ ເມື່ອເກີດແຜ່ນດິນໄຫວກໍ່ອາດສົ່ງຜົນກະທົບຕໍ່ໂຄງສ້າງຂອງເຂື່ອນໄດ້.

ສຈ. ດຣ. ປັນຍາ ກ່າວອີກວ່າ: ພວກເຮົາສາມາດກວດສອບພື້ນທີ່ໆມີໂອກາດເກີດແຜ່ນດິນໄຫວໄດ້ ແຕ່ບໍ່ສາມາດກວດສອບໄດ້ວ່າຈະເກີດຂຶ້ນເວລາໃດ.

ນອກຈາກນີ້, ເມື່ອປີ 2014 ສຈ. ດຣ. ປັນຍາ ເຄີຍອອກມາເຕືອນໃນເລື່ອງອັນຕະລາຍທີ່ຈະເກີດກັບເຂື່ອນທີ່ກໍ່ສ້າງໃກ້ຮອຍເລື່ອນ ທີ່ມີພະລັງ ໂດຍທ່ານໄດ້ຄາດການໃນປີນັ້ນວ່າ ມີໂອກາດປະມານ 30% ທີ່ຈະເກີດແຜ່ນດິນໄຫວຂະໜາດກາງ ບໍລິເວນພື້ນທີ່ກໍ່ສ້າງເຂື່ອນໃນອີກ 30 ປີຂ້າງໜ້າ ແລະ ມີໂອກາດປະມານ 10% ທີ່ຈະເກີດແຜ່ນດິນໄຫວຮຸນແຮງເຖິງ 7 ຣິກເຕີ, ພ້ອມທັງລະບຸຊັດເຈນວ່າ ບໍ່ຄວນສ້າງເຂື່ອນໄຊຍະບູລີໃນບໍລິເວນດັ່ງກ່າວ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube