ລາວ-ລັດເຊຍເປີດສາກຊ້ອມຮົບລົດຕັງ-ຍານເກາະ Laros 2019 ທີ່ແຂວງຊຽງຂວາງ

ລາຍງານ 12 ທັນວາ 2019, ອີງຕາມການລາຍງານຂອງໜັງສືພິມກອງທັບປະຊາຊົນລາວໃຫ້ຮູ້ວ່າ: ໄດ້ເປີດການເຝິກຊ້ອມຮ່ວມ ຄັ້ງປະຫວັດສາດລະຫວ່າງເຫຼົ່າຮົບລົດຕັງ-ຍານເກາະລາວ-ລັດເຊຍ “Laros 2019”  ພາຍໃຕ້ຄຳຂວັນ “ຄຽງບ່າ ຄຽງໄຫຼ່ກັນຕໍ່ສູ້ເພື່ອສັນຕິພາບ” ຢ່າງເປັນທາງການ ເມື່ອວັນທີ 10 ທັນວາ 2019 ທີ່ຜ່ານມາ ຢູ່ສະໜາມກິລາໂຮງຮຽນການທະຫານທ້ອງຖິ່ນ ກອງບັນຊາການທະຫານແຂວງຊຽງຂວາງ, ການເຝິກຊ້ອມດັ່ງກ່າວຈະໃຊ້ເວລາ 9 ວັນ ແຕ່ວັນທີ 10-19 ທັນວາ 2019.

ອີງຕາມການລາຍງານຂອງກະຊວງປ້ອງກັນປະເທດລັດເຊຍໃຫ້ຮູ້ວ່າ: ການເຝິກຊ້ອມຄັ້ງນີ້ໄດ້ນຳໃຊ້ລົດຕັ້ງ T-72B3 ແລະ T-72MS, ລົດຫຸ້ມເກາະ BRDM-2MS, ປືນກົນ PKTM ແລະ ປືນ AKM, ໂດຍມີທະຫານລາວ-ລັດເຊຍຫຼາຍກວ່າ 500 ຄົນ ເຂົ້າຮ່ວມການເຝິກຊ້ອມຮົບໃນຄັ້ງນີ້.

ທ່ານ ພົນຕີ ປະສິດ ທ່ຽງທຳ ຮອງຫົວໜ້າກົມໃຫຍ່ເສນາທິການກອງທັບປະຊາຊົນລາວ, ຫົວໜ້າຄະນະຊີ້ນຳການຫັດແອບລົດຕັງ-ຍານເກາະກອງທັບລາວ-ລັດເຊຍ 2019 ໄດ້ກ່າວວ່າ: ການເຄື່ອນໄຫວເຝິກຊ້ອມທີ່ຈັດຂຶ້ນຢູ່ ສປປ.ລາວ ຄັ້ງນີ້ ເພື່ອແນ່ໃສ່ເພີ່ມທະວີຮັດແໜ້ນສາຍພົວພັນມິດຕະພາບການຮ່ວມມື ລະຫວ່າງສອງຊາດ, ສອງກອງທັບລາວ-ລັດເຊຍ ໂດຍສະເພາະແມ່ນການຮ່ວມມືດ້ານການທະຫານ ເພື່ອສ້າງຄວາມເຊື່ອໝັ້ນ ແລະ ເພີ່ມທະວີການຊ່ວຍເຫຼືອເຊິ່ງກັນ ແລະ ກັນ ໃນຂົງເຂດວຽກງານປ້ອງກັນຊາດຂອງສອງກອງທັບ.

ທ່ານ ພົນຕີ ປະສິດ ທ່ຽງທຳ ກ່າວຕື່ມວ່າ: ການເຝິກຊ້ອມຄັ້ງນີ້ ເພື່ອເລັ່ງໃສ່ການນຳໃຊ້ລົດຕັງ-ຍານເກາະສົມທົບກັບກຳລັງໄຟທະຫານຮາບຈຳນວນໜຶ່ງ ສູ້ຮົບຢູ່ເທິງພື້ນທີ່ພູມິປະເທດຕົວຈິງ ທີ່ມີຄວາມແຕກຕ່າງກັນຫຼາຍລະດັບ ແນ່ໃສ່ຍົກລະດັບໃຫ້ແກ່ຜູ້ບັນຊາຮູ້ຈັກບັນຊາສູ້ຮົບ ໃນສະພາບພູມິປະເທດ ແລະ ດິນຟ້າອາກາດທີ່ມີການປ່ຽນແປງ ແລະ ທັງເປັນການອົບຮົມໃຫ້ນາຍ ແລະ ພົນທະຫານຮູ້ຈັກການນຳໃຊ້ພາຫະນະ-ອາວຸດທີ່ທັນສະໄໝ ເຂົ້າໃນການປະຕິບັດໜ້າທີ່ສູ້ຮົບຢ່າງຊຳນານ.

ໃນດ້ານຂອງທ່ານ ພົນຈັດຕະວາ ຊາຣາໂກບສ໌ ຮອງຜູ້ບັນຊາການທະຫານສູງສຸດ ແມ່ທັບໃຫຍ່ລົດຕັງທີ 29 ເຂດທະຫານຕາເວັນອອກ ກຳລັງປະກອບອາວຸດລັດເຊຍ ໄດ້ກ່າວວ່າ: ການເຝິກຊ້ອມຄັ້ງນີ້ ເປັນຄັ້ງທຳອິດເພື່ອເປັນການເສີມຂະຫຍາຍການພົວພັນຮ່ວມມືທາງດ້ານການທະຫານລະຫວ່າງສອງກອງທັບ ທີ່ມີມາແຕ່ດົນນານແລ້ວນັ້ນ ໃຫ້ກ້າວເຂົ້າສູ່ລວງເລິກ ແລະ ສືບຕໍ່ຮ່ວມມືກັນແກ້ໄຂບັນຫາສາກົນ ແລະ ສັນຕິພາບຢູ່ໃນພາກພື້ນ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube