ລັດຖະມົນຕີກະຊວງການຕ່າງປະເທດ ຮ່ວມປະຊຸມອາເຊັມ (ASEM) ຄັ້ງທີ 14 ທີ່ມາດຣິດ

ໂດຍອີງຕາມການລາຍງານຂອງກະຊວງການຕ່າງປະເທດໃຫ້ຮູ້ວ່າ: ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ພ້ອມດ້ວຍຄະນະ ໄດ້ສຳເລັດການເຂົ້າຮ່ວມກອງປະຊຸມລັດຖະມົນຕີຕ່າງປະເທດອາເຊັມ (ASEM) ຄັ້ງທີ 14 ທີ່ໄດ້ຈັດຂຶ້ນໃນລະຫວ່າງວັນທີ 15-16 ທັນວາ 2019 ທີ່ມາດຣິດ, ແອັດສະປາຍ ພາຍໃຕ້ຫົວຂໍ້ “ອາຊີ-ເອຣົບ ຮ່ວມກັນສ້າງການຮ່ວມມືແບບຫຼາຍຝ່າຍຢ່າງມີປະສິດທິພາບ” (Asia & Europe-Together for Effective Multilateralism), ເຊິ່ງມີຄະນະຜູ້ແທນເຂົ້າຮ່ວມຈາກ 53 ຄູ່ຮ່ວມມືອາເຊັມ ຈາກພາກພື້ນອາຊີ ແລະ ເອີຣົບ ເຂົ້າຮ່ວມກອງປະຊຸມລັດຖະມົນຕີໃນຄັ້ງນີ້.

ກອງປະຊຸມລັດຖະມົນຕີຕ່າງປະເທດອາເຊັມຄັ້ງນີ້ ໄດ້ປຶກສາຫາລື ແລະ ແລກປ່ຽນຄຳຄິດຄຳເຫັນກ່ຽວກັບການຮ່ວມມືກັນ ລະຫວ່າງ ພາກພື້ນອາຊີ ແລະ ເອີຣົບ ໃນຫຼາຍຂົງເຂດ ເພື່ອສົ່ງເສີມ ແລະ ຮັດແໜ້ນການພົວພັນຮ່ວມມື, ໂດຍສະເພາະການຊຸກຍູ້ການຮ່ວມມືແບບຫຼາຍຝ່າຍ, ການສົ່ງເສີມບົດບາດຍິງຊາຍ, ການສົ່ງເສີມການເຊື່ອມຈອດແບບຍືນຍົງ ແລະ ການຈັດຕັ້ງປະຕິບັດວາລະ 2030 ເພື່ອການພັດທະນາຍືນຍົງ.

ພ້ອມດຽວກັນນີ້, ຍັງໄດ້ແລກປ່ຽນທັດສະນະກ່ຽວກັບ ສະພາບການພາກພື້ນ ແລະ ສາກົນ ທີ່ສອງພາກພື້ນກໍາລັງປະເຊີນຢູ່ ເຊັ່ນ: ບັນຫາການປ່ຽນແປງຂອງດິນຟ້າອາກາດ, ບັນຫາໄພຄຸກຄາມຈາກລັດທິກໍ່ການຮ້າຍ, ບັນຫາຄວາມໝັ້ນຄົງ ແລະ ຄວາມປອດໄພທາງທະເລ, ບັນຫາຂີ້ເຫຍື້ອປລາສະຕິກ  ໃນທະເລ ແລະ ບັນຫາອື່ນໆ.

ໃນກອງປະຊຸມຄັ້ງນີ້, ທ່ານ ລັດຖະມົນຕີ ໄດ້ປະກອບຄຳເຫັນຕໍ່ກອງປະຊຸມ ໂດຍໄດ້ຢ້ຳຄືືນເຖິງ ຂອບການຮ່ວມມືອາເຊັມ ຍັງສືບຕໍ່ເປັນເວທີທີ່ມີຄວາມສໍາຄັນທາງດ້ານການເມືອງ ແລະ ເປັນກົນໄກ ໃນການສົ່ງເສີມການເປັນຄູ່ຮ່ວມມື, ຄວາມເຂົ້າໃຈ ແລະ ຄວາມເຊື່ອໝັ້ນເຊິ່ງກັນ ແລະ ກັນ ລະຫວ່າງພາກພື້ນ ອາຊີ ແລະ ເອີຣົບ, ພ້ອມທັງສົ່ງເສີມການພົວພັນຮ່ວມມືດ້ານເສດຖະກິດ ແລະ ແລກປ່ຽນການໄປມາຫາສູ່ກັນ ລະຫວ່າງ ປະຊາຊົນຂອງສອງພາກພື້ນ.

ທ່ານ ລັດຖະມົນຕີ ຍັງໄດ້ເນັ້ນໃສ່ການຮ່ວມມືດ້ານການເຊື່ອມຈອດແບບຍືນຍົງ ລະຫວ່າງ ພາກພື້ນອາຊີ ແລະ ເອີຣົບ, ໂດຍສະເພາະ ການຈັດຕັ້ງຜັນຂະຫຍາຍ ແຜນການເຊື່ອມຈອດ ຂອງ ອາເຊັມ ທີ່ບັນດາຜູ້ນຳ ໄດ້ຮັບຮອງເອົາໃນກອງປະຊຸມສຸດຍອດອາເຊັມ ຄັ້ງທີ 12 ເພື່ອໃຫ້ເປັນຮູບປະທຳຫຼາຍຂຶ້ນກວ່າເກົ່າ.

ນອກຈາກນັ້ນ, ໃນໂອກາດເຂົ້າຮ່ວມກອງປະຊຸມຄັ້ງນີ້, ທ່ານ ສະເຫຼີມໄຊ ກົມມະສິດ ຍັງໄດ້ພົບປະສອງຝ່າຍ    ກັບຄູ່ຮ່ວມຕຳແໜ່ງຈາກປະເທດ ສາທາລະນະລັດເຊັກ, ຮົງກາລີ, ອຽກລັງ ແລະ ເຈົ້າພາບແອັດສະປາຍ, ເຊິ່ງທັງສອງຝ່າຍ ໄດ້ປຶກສາຫາລື ແລະ ແລກປ່ຽນຄຳຄິດເຫັນ ເພື່ອເສີມຂະຫຍາຍ ແລະ ຮັດແໜ້ນການພົວພັນຮ່ວມມື ລະຫວ່າງ ສປປ.ລາວ ແລະ ບັນດາປະເທດດັ່ງກ່າວ. ນອກຈາກນັ້ນ, ຍັງໄດ້ແລກປ່ຽນທັດສະນະ ກ່ຽວກັບ ການຮ່ວມມື ພາຍໃຕ້ຂອບການຮ່ວມມືອາເຊັມ.

ກອງປະຊຸມລັດຖະມົນຕີຕ່າງປະເທດອາເຊັມ ຄັ້ງທີ 14 ໄດ້ປິດລົງໃນຕອນແລງ ຂອງ ວັນທີ 16 ທັນວາ 2019 ດ້ວຍຜົນສຳເລັດອັນຈົບງາມ, ໂດຍໄດ້ຮັບຮອງເອົາຖະແຫຼງການຂອງປະທານ ເພື່ອເປັນແນວທາງໃນການສົ່ງເສີມການຮ່ວມມື ພາຍໃຕ້ຂອບການຮ່ວມມືອາຊີ ແລະ ເອີຣົບ.

HTML tutorial