ສ.ອາເມຣິກາ ປະກາດສ້າງຕັ້ງ “ກອງທັບອະວະກາດ” ຢ່າງເປັນທາງການ

ລາຍງານ 21 ທັນວາ 2019, ທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ໄດ້ລົງນາມໃນກົດໝາຍ ວ່າດ້ວຍການມອບໝາຍອຳນາດໃນການປ້ອງກັນປະເທດ (NDAA) 2020 ທີ່ຖານທັບຮ່ວມເຮືອ-ອາກາດແອນດຣິວສ ໃນລັດແມຣິແລນ ແຄມຝັ່ງທາງຕາເວັນອອກສຽງເໜືອຂອງ ສ.ອາເມຣິກາ ເມື່ອວັນສຸກ 20 ທັນວາ ທີ່ຜ່ານມາ, ກົດໝາຍດັ່ງກ່າວລວມເຖິງງົບປະມານ 730,000 ລ້ານໂດລາສະຫະລັດ ທີ່ລັດຖະສະພາ ສ.ອາເມຣິກາອະນຸມັດໃຫ້ໃນອາທິດນີ້ ສຳລັບເປັນຄ່າໃຊ້ຈ່າຍດ້ານຄວາມໝັ້ນຄົງປະຈຳປີງົບປະມານ 2020 ເຊິ່ງການຈັດສັນງົບປະມານຄວາມໝັ້ນຄົງໃນປີງົບປະມານຫຼ້າສຸດ ມີອັດຕາສ່ວນເກີນເຄິ່ງຂອງງົບປະມານທັງໝົດທີ່ລັດຖະສະພາຮັບຮອງຄື 1.4 ລ້ານລ້ານໂດລາສະຫະລັດ.

ເຊິ່ງໜຶ່ງໃນເນື້ອໃນສຳຄັນຂອງກົດໝາຍ NDAA2020 ຄືການສ້າງຕັ້ງ “ກອງທັບອະວະກາດ” ເປັນກອງກຳລັງທີ 6 ຂອງກອງທັບ ສ.ອາເມຣິກາ ທີ່ນອກເໜືອຈາກກອງທັບບົກ, ກອງທັບເຮືອ, ກອງທັບອາກາດ, ກອງກຳລັງພິເສດ ແລະ ກອງກຳລັງຍາມຝັ່ງ ເຊິ່ງຖືເປັນຄັ້ງທຳອິດໃນຮອບ 72 ປີ ທີ່ ສ.ອາເມຣິກາສ້າງຕັ້ງກອງກຳລັງໃໝ່ ພາຍໃຕ້ການຄຸ້ມຄອງຂອງກອງທັບ ໂດຍກອງທັບອະວະກາດທີ່ແຍກຕົວອອກມາຈາກກອງທັບອາກາດຈະໄດ້ງົບປະມານສະໜັບສະໜູນ ໃນປີທຳອິດ 40 ລ້ານໂດລາສະຫະລັດ, ຂະນະທີ່ຜູ້ບັນຊາການກອງທັບອະວະກາດຄົນທຳອິດຄືທ່ານ ພົນເອກ ຈອນ ເຣມອນ ເຊິ່ງຄວບຕຳແໜ່ງຜູ້ບັນຊາການອະວະກາດ SpaceCom ທີ່ມີການສ້າງຕັ້ງ ແລະ ເປີດຕົວຢ່າງເປັນທາງການເມື່ອທ້າຍເດືອນສິງຫາ ທີ່ຜ່ານມາ.

ໃນດ້ານຂອງທ່ານ ໂດໂນ ທຣຳ ກ່າວເຖິງການສ້າງຕັ້ງກອງທັບອະວະກາດວ່າ ອະວະກາດຄືແນວຮົບໃໝ່ ແລະ ທ່າມກາງໄພຄຸກຄາມຈາກຮອບດ້ານ ກອງທັບ ສ.ອາເມຣິກາຕ້ອງເປັນເລີດກວ່າສັດຕູໃນທຸກເລື່ອງທີ່ກ່ຽວຂ້ອງກັບອະວະກາດເປັນສິ່ງສຳຄັນ ແລະ ກອງທັບອະວະກາດຈະເປັນກຳລັງສຳຄັນເພື່ອຊ່ວຍໃຫ້ ສ.ອາເມຣິກາຍົກລະດັບມາດຕະຖານຂອງຕົນເອງໄປໃຫ້ເຖິງຈຸດນັ້ນ ເຊິ່ງພາລະກິດຂອງກອງທັບອະວະກາດທີ່ມີເຈົ້າໜ້າທີ່ທັງທະຫານ ແລະ ພົນລະເຮືອນໃນສັງກັດລວມກັນປະມານ 16,000 ຄົນ ບໍ່ແມ່ນການສົ່ງທະຫານຂຶ້ນສູ່ອະວະກາດ ແຕ່ຄືການປ້ອງກັນຜົນປະໂຫຍດຂອງ ສ.ອາເມເຣິກາໃນອະວະກາດເຊັ່ນ: ດຽວທຽມຫຼາຍຮ້ອຍດວງທີ່ໂຄຈອນຢູ່ໃນຊັ້ນບັນຍາກາດ ເຮັດໜ້າທີ່ທັງການສຳຫຼວດ ແລະ ເກັບຂໍ້ມູນທົ່ວໄປ ແລະ ການສອດແນມ.

ສ່ວນພາລະກິດຂອງ Space Command ເຊິ່ງເປັນໜ່ວຍງານອິດສະຫຼະ ທີ່ບໍ່ຢູ່ພາຍໃຕ້ສັງກັດເຫຼົ່າທັບໃດ ແຕ່ຂຶ້ນໂດຍກົງກັບທ່ານ ມາກ ເອສເປີ ລັດຖະມົນຕີກະຊວງປ້ອງກັນປະເທດ ຈະເນັ້ນໄປທີ່ການພັດທະນາຄວາມສາມາດໃນທຸກດ້ານຂອງກອງທັບ ສ.ອາເມຣິກາ ທີ່ກ່ຽວຂ້ອງກັບອະວະກາດ ເພື່ອສ້າງຄວາມເຊື່ອໝັ້ນໃນແກ່ທຸກຝ່າຍວ່າ ອິດທິພົນຂອງ ສ.ອາເມຣິກາໃນອະວະກາດຈະບໍ່ຖືກຄຸກຄາມຈາກສັດຕູ ໂດຍສະເພາະລັດເຊຍ ແລະ ຈີນ.

ເຊິ່ງທ່ານ ວະລາດິເມຍ ປູຕິນ ປະທານປະເທດລັດເຊຍ ກ່າວເມື່ອຕົ້ນເດືອນນີ້ວ່າ ການສ້າງຕັ້ງກອງທັບອະວະກາດຂອງ ສ.ອາເມຣິກາ ເປັນໄພຄຸກຄາມຕໍ່ຜົນປະໂຫຍດຂອງລັດເຊຍທີ່ຢູ່ນອກໂລກເຊັ່ນກັນ ແລະ ລັດຖະບານລັດເຊຍຄວນມີມາດຕະການຕອບສະໜອງໃນເລື່ອງນີ້.