ກອງທັບ ສ.ອາເມຣິກາ ໂຈມຕີທາງອາກາດໃນອິຣັກ ແລະ ຊີຣີ

ລາຍງານ 30 ທັນວາ 2019, ກະຊວງປ້ອງກັນປະເທດສະຫະລັດ ອາເມຣິກາ ອອກຖະແຫຼງການ, ເລື່ອງປະຕິບັດການໂຈມຕີທາງອາກາດທຳລາຍເປົ້າໝາຍ 3 ແຫ່ງໃນພາກຕາເວັນຕົກຂອງອີຣັກ ແລະ ອີກ 2 ແຫ່ງໃນພາກຕາເວັນອອກຂອງຊີຣີ ເຊິ່ງເປັນເຂດທີ່ໝັ້ນຂອງຄາຕາອິບ ຮິສບອນເລາະ ກອງກຳລັງຕິດອາວຸດຝັກໃຝ່ອີຣານ ເມື່ອວັນອາທິດ 29 ທັນວາ ທີ່ຜ່ານມາ ຕາມເວລາທ້ອງຖິ່ນ, ເຊິ່ງເນື້ອໃນຖະແຫຼງການລະບຸພຽງວ່າ ປະຕິບັດການດັ່ງກ່າວປະສົບຄວາມສຳເລັດ ແຕ່ບໍ່ໄດ້ໃຫ້ຂໍ້ມູນກ່ຽວກັບຈຸດປະສົງຂອງການໂຈມຕີ ແລະ ຂອບເຂດຄວາມເສຍຫາຍທີ່ເກີດຂຶ້ນ.

ເຖິງຢ່າງໃດກໍ່ຕາມ, ການເຄື່ອນໄຫວທາງທະຫານຂອງ ສ.ອາເມຣິກາ ຄັ້ງນີ້ເກີດຂຶ້ນພຽງ 2 ວັນພາຍຫຼັງທີ່ກຸ່ມຕິດອາວຸດດັ່ງກ່າວລະດົມຍິງຈະຫຼວດຫຼາຍກວ່າ 30 ລູກ ໂຈມຕີຖານທັບ K1 ຂອງກອງທັບອິຣັກ ໃນເມືອງເຄີຄຸກ ເຊິ່ງເປັນໜຶ່ງໃນບໍ່ນ້ຳມັນຂະໜາດໃຫຍ່ຂອງອີຣັກ ຕັ້ງຢູ່ທາງທິດເໜືອຂອງນະຄອນຫຼວງແບກແດດ ສົ່ງຜົນໃຫ້ເຈົ້າໜ້າທີ່ພົນລະເຮືອນສັນຍາຈ້າງຂອງ ສ.ອາເມຣິກາ 1 ຄົນ ເສຍຊີວິດ, ທະຫານອາເມຣິກາ 4 ຄົນ ແລະ ທະຫານອີຣັກອີກ 2 ຄົນໄດ້ຮັບບາດເຈັບ.

ດ້ານແຫຼ່ງຂ່າວໃນກອງທັບອີຣັກເປີດເຜີຍວ່າ ຜົນການໂຈມຕີທາງອາກາດຂອງ ສ.ອາເມຣິກາ ເຮັດໃຫ້ມີຜູ້ເສຍຊີວິດຢ່າງໜ້ອຍ 25 ຄົນ, ໃນຈຳນວນນັ້ນ 4 ຄົນ ເປັນສະມາຊິກຂອງຄາຕາອິບ ຮິສບອນເລາະ ແລະ ມີຜູ້ໄດ້ຮັບບາດເຈັບອີກຢ່າງໜ້ອຍ 55 ຄົນ, ສ່ວນແຫຼ່ງຂ່າວໃນກອງທັບ ສ.ອາເມຣິກາ ໃຫ້ຂໍ້ມູນວ່າ ຍານພາຫະນະທາງອາກາດທີ່ໃຊ້ໃນປະຕິບັດການຄັ້ງນີ້ ຄືຝູງຍົນຂັບໄລ່ F-15.

ຂະນະທີ່ທຳນຽບລັດຖະບານອິຣັກ ອອກຖະແຫຼງການປະນາມປະຕິບັດການໂຈມຕີທາງອາກາດຂອງ ສ.ອາເມຣິກາ ວ່າລະເມີດອະທິປະໄຕຢ່າງຮ້າຍແຮງ, ແຕ່ລັດຖະບານຊີຣີ ແລະ ອີຣານຍັງບໍ່ສະແດງທ່າທີ.

ຕໍ່ມາທ່ານ ມາກ ເອັສເປີ ລັດຖະມົນຕີກະຊວງປ້ອງກັນປະເທດ ສ.ອາເມຣິກາ, ພົນເອກ ມາກ ມິວລີ ປະທານຄະນະເລນາທິການທະຫານຮ່ວມ ແລະ ທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດ ສ.ອາເມຣິກາ ຖະແຫຼງຮ່ວມກັນວ່າ ປະຕິບັດການຄັ້ງນີ້ສະແດງໃຫ້ເຫັນວ່າ ສ.ອາເມຣິກາ ພ້ອມດຳເນີນການທາງທະຫານຕາມຄວາມຈຳເປັນ ເພື່ອປ້ອງກັນຕົນເອງ ຈາກພຶດຕິກຳອັນຊົ່ວຮ້າຍຂອງກຸ່ມຕິດອາວຸດໃນອິຣັກ ແລະ ຊີຣີ ຫຼື ຈາກອີຣານ.