ລັດຖະມົນຕີກະຊວງປ້ອງກັນປະເທດຂອງລາວ ເດີນທາງຢ້ຽມຢາມ ແລະ ປະຕິບັດໜ້າທີ່ຢູ່ມຽນມາ

ໜັງສືພິມກອງທັບປະຊາຊົນລາວລາຍງານ 21 ພະຈິກ 2017 ວ່າ: ທ່ານ ພົນໂທ ຈັນສະໝອນ ຈັນຍາລາດ ລັດຖະມົນຕີກກະຊວງປ້ອງກັນປະເທດຂອງລາວ ພ້ອມດ້ວຍຄະນະໄດ້ເດີນທາງໄປຢ້ຽມຢາມມຽນມາ ຕາມຄຳເຊື້ອເຊີນຂອງທ່ານ ພົນເອກ ອາວຸໂສ ມິນ ອ່ອງຫຼ່າຍ ຜູ້ບັນຊາການທະຫານສູງສຸດຂອງມຽນມາ ໃນລະຫວ່າງວັນທີ 19-23 ພະຈິກ 2017 ນີ້.

ໂດຍທັງສອຝ່າຍໄດ້ພົບປະແລກປ່ຽນ ແລະ ແຈ້ງສະພາບການກ່ຽວກັບການພັດທະນາເສດຖະກິດ-ສັງຄົມຢູ່ພາຍໃນປະເທດຂອງຕົນໃຫ້ກັນຊາບ ແລະ ພ້ອມກັນທົບທວນຄືນເຖິງໝາກຜົນຂອງການພົວພັນຮ່ວມມືຊ່ວຍເຫຼືອເຊິ່ງກັນ ແລະ ກັນ ໃນໄລຍະຊຸມປີທີ່ຜ່ານມາ ພ້ອມກັບວາງທິດທາງແຜນການຮ່ວມມືກັນໃນຕໍ່ໜ້າ, ເຊິ່ງເຫັນວ່າ: ຫາກຜົນຂອງສາຍພົວພັນການຮ່ວມມືລະຫວ່າງສອງຊາດ, ສອງກອງທັບລາວ-ມຽນມາໄດ້ຮັບການເສີມຂະຫຍາຍຂຶ້ນຢ່າງບໍ່ຢຸດຢັ້ງ.

ຄະນະຜູ້ແທນລະດັບສູງຂອງສອງປະເທດໄດ້ແລກປ່ຽນການຢ້ຽມຢາມເຊິ່ງກັນ ແລະ ກັນຢ່າງເປັນປົກກະຕິ, ດ້ານວຽກງານຊາຍແດນຂອງສອງປະເທດແມ່ນມີຄວາມສະຫງົບໂດຍພື້ນຖານປັດສະຈາກບັນຫາຕ່າງໆທີ່ກະທົບກະເທືອນເຖິງອະທິປະໄຕຂອງແຕ່ລະປະເທດ, ປະຊາຊົນສອງຊາດທຳມາຫາກິນ ແລະ ຄ້າຂາຍໄປມາຫາສູ່ກັນຢ່າງສະຫງົບສຸກ, ການປັກຫຼັກໝາຍຊາຍແດນຂອງສອງປະເທດແມ່ນໄດ້ຮັບຜົນສຳເລັດຢ່າງຖາອວນດ້ວຍເວລາອັນສັ້ນ ເຊິ່ງບໍ່ເຄີຍມີມາໃນປະຫວັດສາດແຫ່ງການພົວພັນຂອງສອງປະເທດ.

ນອກຈາກນັ້ນທັງສອງຝ່າຍຍັງໄດ້ຮ່ວມມືກັນປາບປາມການຄ້າຂາຍຂອງເຖື່ອນ, ຢາເສບຕິດຢູ່ຕາມບໍລິເວນຊາຍແດນ, ການຮ່ວມມືທາງດ້ານການທ່ອງທ່ຽວ, ການຄ້າ ແລະ ອື່ນໆ, ການຮ່ວມມືລະຫວ່າງສອງກອງທັບລາວ-ມຽນມາ ແມ່ນໄດ້ຮັບການເພີ່ມພູນຄູນສ້າງ ແລະ ງອກງາມຂຶ້ນເລື້ອຍໆ ໂດຍມີຫ້ອງການທີ່ປຶກສາທູດຝ່າຍທະຫານຕັ້ງຢູ່ແຕ່ລະປະເທດ, ມີຄະນະກຳມະການ, ອະນຸກຳມະການຊາຍແດນຂັ້ນສູນກາງ ແລະ ທ້ອງຖິ່ນແຕ່ລະໆດັບ ເພື່ອແລກປ່ຽນຂໍ້ມູນຂ່າວສານ ເຮັດໃຫ້ບໍລິເວນຊາຍແດນມີຄວາມສະຫງົບກາຍເປັນຊາຍແດນແຫ່ງສັນຕິພາບ, ມິດຕະພາບ ແລະ ການຮ່ວມມື.

ຈາກນັ້ນກໍ່ໄດ້ເຊັນບົດບັນທຶກຄວາມຊົງຈຳ ເພື່ອເປັນບ່ອນອີງໃນການຮ່ວມມືກັນໃນຄັ້ງຕໍ່ໄປ ແລະ ໃນມື້ດຽວກັນນີ້ຄະນະຜູ້ແທນທະຫານຂັ້ນສູງຂອງກອງທັບປະຊາຊົນລາວ ນຳໂດຍທ່ານ ພົນໂທ ຈັນສະໝອນ ຈັນຍາລາດ ພ້ອມດ້ວຍຄະນະໄດ້ເຂົ້າວາງພວງມາລາ ຢູ່ອະນຸສອນສະຖານຄວາມຊົງຈຳນັກຮົບເກົ່າກອງທັບມຽນມາທີ່ເສຍສະຫຼະຊີວິດໃນປາງສົງຄາມຕ້ານຈັກກະພັດຜູ້ຮຸກຮານຢ່າງອົງກາດກ້າຫານຈົນເຮັດໃຫ້ປະຊາຊາດໄດ້ຮັບການປົດປ່ອຍຢ່າງສົມບູນ (ຕາມຂໍ້ມູນມຽນມາ).

ແລະ ເນື່ອງໃນໂອກາດເດີນທາງໄປຢ້ຽມຢາມ ແລະ ເຮັດວຽກຢູ່ມຽນມາໃນຄັ້ງນີ້ຂອງລັດຖະມົນຕີກະຊວງປ້ອງກັນປະເທດລາວ ພ້ອມດ້ວຍຄະນະຍັງໄດ້ເຂົ້າຢ້ຽມຂ່ຳນັບທ່ານ ອູ ທິນ ຈໍ ປະທານປະເທດມຽນມາ, ເຊິ່ງທ່ານ ອູ ທິນ ຈໍໄດ້ກ່າວສະແດງຄວາມຊົມເຊີຍຕໍ່ຄະນະຜູ້ແທນທະຫານຂັ້ນສູງຂອງກອງທັບປະຊາຊົນລາວ ທີ່ເດີນທາງມາຢ້ຽມຢາມສອງຊາດ, ສອງກອງທັບ ແລະ ເຮັດໃຫ້ສາຍພົວພັນຂອງປະຊາຊົນສອງຊາດລາວ-ມຽນມາໄດ້ຮັບການຖະນຸຖະໜອມ, ຮັດແໜ້ນ ແລະ ງອກງາມຍິ່ງໆຂຶ້ນ, ພ້ອມທັງໄດ້ອວຍພອນໃຫ້ຄະນະຜູ້ແທນທະຫານຂັ້ນສູງຂອງກອງທັບປະຊາຊົນລາວ ໃນການເດີນທາງມາຢ້ຽມຢາມ ແລະ ເຮັດວຽກຢູ່ມຽນມາໃນຄັ້ງນີ້ໃຫ້ໄດ້ຮັບຜົນສຳເລັດຢ່າງຈົບງາມ.

- Advertisement -