ຖານທັບ ສ.ອາເມຣິກາ ໃນເຄນຢາຖືກກຸ່ມອັນ-ຊາບັບບຸກເຂົ້າໂຈມຕີ ເສຍຊີວິດລວມ 8 ຄົນ

ລາຍງານ 6 ມັງກອນ 2020, ສູບັນຊາການກາງຂອງກອງທັບສະຫະລັດ ອາເມຣິກາໃນອາຟຣິກາ (AFRICOM) ອອກຖະແຫຼງການວ່າ ກຸ່ມອັນ-ຊາບັບບຸກໂຈມຕີຄ່າຍຊິມບາ ເຊິ່ງເປັນຖານທັບຮ່ວມລະຫວ່າງກອງທັບເຄນຢາກັບກອງທັບ ສ.ອາເມຣິກາ ຕັ້ງຢູ່ໃນພູມມິພາກລາມູ ແຄມຝັ່ງອ່າວມັນດາ ທາງພາກຕາເວັນອອກສຽງໃຕ້ຂອງເຄນຢາ ເມື່ອຕອນເຊົ້າມືດຂອງວັນອາທິດ 5 ມັງກອນ ທີ່ຜ່ານມາ ຕາມເວລາທ້ອງຖິ່ນ ເຮັດໃຫ້ທະຫານອາເມຣິກາ 1 ຄົນ ແລະ ເຈົ້າໜ້າທີ່ສັນຍາຈ້າງ 2 ຄົນເສຍຊີວິດ, ຂະນະດຽວກັນມີເຈົ້າໜ້າທີ່ໄດ້ຮັບບາດເຈັບ 2 ຄົນ, ນອກຈາກນີ້ກຸ່ມອັນ-ຊາບັນໄດ້ຈູດເຜົາທຳລາຍຍານພາຫະນະພາຍໃນຖານທັບຈຳນວນໜຶ່ຶງ ແລະ ຍິງຕໍ່ສູ້ກັບທະຫານຂອງ ສ.ອາເມຣິກາ ແລະ ເຄນຢາທີ່ປະຈຳການຢູ່ພາຍໃນ ເຮັດໃຫ້ກຸ່ມອັນ-ຊາບັບເສຍຊີວິດຢ່າງໜ້ອຍ 5 ຄົນ.

ເຊິ່ງກຸ່ມອັນ-ຊາບັບ ມີເຂດທີ່ໝັ້ນໃນໂຊມາລີ ມັກຂ້າມແດນມາກໍ່ເຫດໃນເຄນຢາ ເຊິ່ງເປັນປະເທດເພື່ອນບ້ານທາງທິດໃຕ້ເປັນປະຈຳ ເນື່ອງຈາກບໍ່ພໍໃຈທີ່ລັດຖະບານເຄນຢາໃຫ້ການສະໜັບສະໜູນທາງທະຫານແກ້ລັດຖະບານໂຊມາລີ ໃນການປາບປາມກຸ່ມອັນ-ຊາບັບ, ຂະນະທີ່ປະຕິບັດການທາງທະຫານຂອງ ສ.ອາເມຣິກາໃນການກວາດລ້າງກຸ່ມອັນ-ຊາອັບ ທະວີຄວາມຮຸນແຮງຂຶ້ນຕັ້ງແຕ່ປີ 2017 ຫຼື ນັບຕັ້ງແຕ່ທ່ານ ໂດໂນ ທຣຳ ຂຶ້ນເປັນຜູ້ນຳ ສ.ອາເມຣິກາ, ໂດຍລາຍງານຂອງ AFRICOM ລະບຸວ່າ ໄດ້ມີປະຕິບັດການໂຈມຕີທາງອາກາດຢ່າງໜ້ອຍ 110 ຄັ້ງ ຂ້າສະມາຊິກກຸ່ມອັນ-ຊາບັນຫຼາຍກວ່າ 800 ຄົນແລ້ວ.