ອີຣານເປີດສາກບຸກຍິງຈະຫຼວດກວ່າ 20 ລູກໃສ່ຖານທັບ ສ.ອາເມຣິກາ ໃນອິຣັກ

ລາຍງານ 8 ມັງກອນ 2020, ກະຊວງປ້ອງກັນປະເທດ ສ.ອາເມຣິກາ ອອກຖະແຫຼງການວ່າ ກອງທັບປະຕິວັດອີຣານຍິງຈະຫຼວດຫຼາຍກວ່າ 20 ລູກໂຈມຕີຖານທັບ ສ.ອາເມຣິກາ 2 ແຫ່ງໃນອິຣັກທີ່ແຂວງອັນບາ ໃນພາກຕາເວັນຕົກ ແລະ ໃນເມືອງເອີບິວ ເຊິ່ງເປັນເມືອງເອກຂອງເຂດປົກຄອງຕົນເອງເຄີດິດສະຖານ ໃນພາກເໜືອຂອງອິຣັກ ຕັ້ງແຕ່ຕອນຄ່ຳຂອງວັນທີ 7 ມັງກອນ ທີ່ຜ່ານມາ ຕໍ່ເນື່ອງຈົນເຖິງຕອນເຊົ້າຂອງວັນທີ 8 ມັງກອນນີ້ ຕາມເວລາທ້ອງຖິ່ນ ເບື້ອງຕົ້ນເຈົ້າໜ້າທີ່ກຳລັງປະເມີນຂອບເຂດຂອງຄວາມເສຍຫາຍ, ຂະນະທີ່ທຳນຽບຂາວລາຍງານເພີ່ມເຕີມວ່າ ທ່ານ ໂດໂນ ທຣຳ ປະທານປະເທດ ສ.ອາເມຣິກາກຳລັງປະຊຸມສຸກເສີນໜ່ວຍງານດ້ານຄວາມໝັ້ນຄົງແລ້ວ ກ່ຽວກັບສະຖານະການທີ່ເກີດຂຶ້ນ.

ໃນດ້ານຂອງກອງທັບປະຕິວັດອີຣານ ໄດ້ເຜີຍແຜ່ຖະແຫຼງການຜ່ານສະຖານີໂທລະພາບແຫ່ງຊາດວ່າ ກອງກຳລັງທາງອາກາດໄດ້ເປີດກສາກປະຕິບັດການ “ນັກບຸນໂຊໄລມານີ” ດ້ວຍການຍິງຂີປະນາວຸດນຳວິຖີຈາກອາກາດສູ່ພື້ນ ໂຈມຕີເປົ້າໝາຍຄື ຖານທັບຂອງ ສ.ອາເມຣິກາໃນອິຣັກ ຕອບໂຕ້ປະຕິບັດການໂຈມຕີທາງອາກາດຂອງ ສ.ອາເມຣິກາ ທີ່ຂ້າທ່ານ ພົນຕີ ກັສເຊັມ ໂຊໄລມານີ ໃນນະຄອນຫຼວງແບກແດດ ເມື່ອວັນທີ 3 ມັງກອນ ທີ່ຜ່ານມາ.

ນອກຈາກນີ້, ຖະແຫຼງການຂອງກອງທັບປະຕິວັດອີຣານ ໄດ້ຍັງເຕືອນ ສ.ອາເມຣິກາ ແລະ ພັນທະມິດໃນອິຣັກໃຫ້ກຽມພ້ອມຮັບມືກັບການໂຈມຕີຮອບຕໍ່ໄປ ແລະ ຍັງສົ່ງຄຳເຕືອນແບບດຽວກັນໄປຍັງອີກຫຼາຍປະເທດໃນຕາເວັນອອກກາງ ຫາກປະເທດໃນອະນຸຍາດໃຫ້ ສ.ອາເມຣິກາໃນຜືນແຜ່ນດິນເປັນຖານປະຕິບັດການໂຈມຕີອີຣານ.