ອິດສະຣາແອນກ່າວວ່າ ພ້ອມຕອບໂຕ້ແບບແຫຼກເປັນຜົງ ຫາກຖືກອີຣານໂຈມຕີ

ລາຍງານ 8 ມັງກອນ 2020, ທ່ານ ເບນຈາມິນ ເນທັນຢາຮູ ນາຍົກລັດຖະມົນຕີອິດສະຣາແອນຖະແຫຼງວ່າ ໃຜກໍ່ຕາມທີ່ໂຈມຕີອິດສະຣາແອນ ຈະຕ້ອງໄດ້ຮັບການຕອບໂຕ້ແບບແຫຼກເປັນຜົງ ແລະ ກ່າວເຖິງທ່ານ ພົນຕີ ກັສເຊັມ ໂຊໄລມານີ ອະດີດຜູ້ບັນຊາການກອງກຳລັງນັກຮົບພິເສດຄຸດ ຂອງກອງທັບປະຕິວັດອີຣານ ທີ່ເສຍຊີວິດຈາກປະຕິບັດການໂຈມຕີທາງອາກາດຂອງ ສ.ອາເມຣິກາ ທີ່ນະຄອນຫຼວງແບກແດດ ປະເທດອິຣັກ ເມື່ອວັນທີ 3 ມັງກອນ ທີ່ຜ່ານມາວ່າເປັນ “ຜູ້ບັນຊາການກຸ່ມກໍ່ການຮ້າຍ”.

ການຖະແຫຼງດັ່ງກ່າວຖືເປັນການສະແດງຈຸດຢືນຢ່າງເປັນທາງການຄັ້ງທຳອິດຂອງອິດສະຣາແອນ ຕໍ່ບັນຍາກາດໃນຕາເວັນອອກກາງທີ່ກຳລັງເຄັ່ງຕຶງສຸດຂີດໃນຮອບຫຼາຍທົດສະວັດ ໂດຍກອງທັບປະຕິວັດອີຣານໄດ້ຍິງຈະຫຼວດຫຼາຍກວ່າ 20 ລູກໂຈມຕີຖານທັບ 2 ແຫ່ງຂອງ ສ.ອາເມຣິກາໃນອິຣັກ ເພື່ອຕອບໂຕ້ການທີ່ ສ.ອາເມຣິກາ ສັງຫານທ່ານ ພົນຕີ ກັສເຊັມ ໂຊໄລມານີ ແລະ ທ່ານ ອາບູ ມາດີ ອັນ-ມູຮັນດິສ ອະດີດຮອງຜູ້ບັນຊາການກອງກຳລັງນັກຮົບຊີອະໃນອິຣັກ ທີ່ເປັນພັນທະມິດກັບອີຣານ, ນອກນີ້, ກອງທັບປະຕິວັດອີຣານຂູ່ວ່າຈະຂະຫຍາຍຂອບເຂດຂອງປະຕິບັດການທາງທະຫານໄປຍັງເມືອງໄຮຟາ ຂອງອິດສະຣາແອນ ແລະ ນະຄອນດູໄບ ຂອງສະຫະນະຄອນ ເອເມຣັດ ອາຣັບ (UAE) ຫາກຖືກ ສ.ອາເມຣິກາ ຕອບໂຕ້ປະຕິບັດການດັ່ງກ່າວ.

ຂະນະດຽວກັນ, ທ່ານ ເບນຈາມິນ ເນທັນຢາຮູ ໄດ້ກ່າວເຖິງສະໄໝທີ່ອິດສະຣາແອນເປັນຝ່າຍໄດ້ຮັບໄຊຊະນະໃນການເຮັດສົງຄາມຫົກວັນ ເມື່ອປີ 1967 ແລະ ການທີ່ອິດສະຣາແອນເກືອບບໍ່ມີຄວາມສຳພັນທາງການທູດຢ່າງເປັນທາງການກັບກຸ່ມປະເທດອາຣັບ ຍົກເວັ້ນເອຢິບ ແລະ ຊອກດານີ ວ່າສາຍພົວພັນລະຫວ່າງອິດສະຣາແອນກັບໂລກອາຣັບກຳລັງເຂົ້າສູ່ການປ່ຽນແປງຄັ້ງໃຫຍ່ ແຕ່ບໍ່ໄດ້ລົງເລິກໃນລາຍລະອຽດ ແລະ ກ່າວເຖິງ ສ.ອາເມຣິກາ ວ່າຄືມະຫາມິດທີ່ດີທີ່ສຸດຂອງອິດສະຣາແອນ ແລະ ບໍ່ມີໃຜເປັນມິດກັບ ສ.ອາເມຣິກາ ໄດ້ເທົ່າອິດສະຣາແອນ.