ຜູ້ນຳການາດາກ່າວວ່າ ສ.ອາເມຣິກາ ກໍ່ມີສ່ວນເຮັດໃຫ້ຍົນໂດຍສານຂອງອູແກຣນຕົກໃນອີຣານ

ລາຍງານ 14 ມັງກອນ 2020, ທ່ານ ຈັສຕິນ ທຼູໂດ ນາຍົກລັດຖະມົນຕີການາດາ ກ່າວເມື່ອວັນຈັນ 13 ມັງກອນ ທີ່ຜ່ານມາ ວ່າໃນຂະນະທີ່ນານາຊາດສະແດງຈຸດຢືນຮ່ວມຈັດຊັດເຈນ ວ່າອີຣານບໍ່ຄວນມີໂຄງການນິວເຄຼຍ ແຕ່ບໍ່ອາດປະຕິເສດໄດ້ວ່າສະຖານະການຄວາມເຄັ່ງຕຶງໃນຕາເວັນອອກກາງ ເປັນຜົນມາຈາກນະໂຍບາຍຂອງ ສ.ອາເມຣິກາເຊັ່ນກັນ, ຫາກບໍ່ມີບັນຍາກາດຄວາມຮຸນແຮງເກີດຂຶ້ນ ແລະ ບໍ່ມີການຍົກລະດັບຄວາມເຄັ່ງຕຶງດ້ວຍວິທີການໃດກໍ່ຕາມ ພົນລະເມືອງການາດາທັງໝົດເທິງຍົນໂດຍສານຂອງອູແກຣນ ກໍ່ອາດຈະໄດ້ກັບໄປໃຊ້ຊີວິດຮ່ວມກັບຄອບຄົວຕາມປົກກະຕິແລ້ວ.

ເຊິ່ງຍົນໂບອິ້ງ 737-800 ຂອງສາຍການບິນ Ukraine International Airlines ຫຼື UIA ຖ້ຽວບິນ PS752 ຕົກໃກ້ກັບສະໜາມບິນສາກົນອິໝ່າມ ໂຄໄມນີ ໃນນະຄອນຫຼວງເຕຫະຣານ ເມື່ອວັນທີ 8 ມັງກອນ ທີ່ຜ່ານມາ ເຮັດໃຫ້ມີຜູ້ເສຍຊີວິດ 176 ຄົນ ໂດຍເປັນຄົນອີຣານ 82 ຄົນ, ຮອງລົງມາຄືຄົນການາດາ 57 ຄົນ.

ໃນດ້ານຂອງອີຣານຍອມຮັບວ່າເປັນຜູ້ຍິງຍົນລຳດັ່ງກ່າວຕົກ ເຊິ່ງເປັນເຫດການທີ່ເກີດຂຶ້ນພາຍຫຼັງກອງທັບປະຕິວັດອີຣານລະດົມຍິງຈະຫຼວດຕີຖານທັບ ສ.ອາເມຣິກາ 2 ແຫ່ງໃນອິຣັກ ແລະ ທ່າມກາງແຮງກົດດັນຂັ້ນສູງສຸດຂອງເຈົ້າໜ້າກອງທັບປະຕິວັດອີຣານ ທີ່ມີຄວາມເປັນຫ່ວງວ່າອາເມຣິກາອາດຍິງຂີປະນາວຸດກັບມາ ຫຼື ເປີດການໂຈມຕີທາງອາກາດໃນຜືນແຜ່ນດິນອີຣານ ສົ່ງຜົນໃຫ້ເກີດຄວາມຜິດພາດຄັ້ງໃຫຍ່ນີ້.

ຂະນະທີ່ທ່ານ ອາລີ ຣາບີອີ ໂຄສົກລັດຖະບານອີຣານກ່າວວ່າ ການເປີດເຜີຍຂໍ້ມູນຂອງເຈົ້າໜ້າທີ່ລະດັບສູງຈາກໜ່ວຍງານຫຼາຍແຫ່ງທັງຝ່າຍພົນລະເຮືອນ ແລະ ທະຫານ ກ່ຽວກັບການຕົກຂອງຖ້ຽວບິນ PS752 ກ່ອນມີການຢືນຢັນວ່າຖືກຍິງດ້ວຍຂີປະນາວຸດຂອງກອງທັບປະຕິວັດອີຣານ ເປັນໄປຕາມຂໍ້ມູນທີ່ເຈົ້າໜ້າທີ່ແຕ່ລະຄົນມີຢູ່, ລັດຖະບານອີຣານບໍ່ເຄີຍມີເຈດຕະນາປົກປິດ ຫຼື ບິດເບືອນຂໍ້ມູນໃດກ່ຽວກັບໂຄກນາດຕະກຳທີ່ເກີດຂຶ້ນ, ເຖິງຢ່າງໃດກໍ່ຕາມ ປະຊາຊົນອີຣານຈຳນວນບໍ່ໜ້ອຍຍັງຄົງໂຮມຊຸມນຸມປະທ້ວງຕໍ່ບັນຫາດັ່ງກ່າວ, ໃນເວລາດຽວກັນ ສ.ອາເມຣິກາ ກໍ່ໄດ້ອອກຕົວສະໜັບສະໜູນຜູ້ປະທ້ວງຢ່າງເປີດເຜີຍ ຮຽກສຽງວິຈານຈາກທາງການອີຣານວ່າ ເປັນການທຳສົງຄາມຈິດຕະສາດຄັ້ງໃໝ່.


ຕິດຕາມພວກເຮົາທາງ Twitter

ຕິດຕາມພວກເຮົາທາງ Youtube