ລັດຖະບານລັດເຊຍລາອອກທັງຄະນະ ເພື່ອປະຕິຮູບລັດຖະທຳມະນູນຄັ້ງໃຫຍ່

ລາຍງານ 16 ມັງກອນ 2020, ໃນຕອນໜຶ່ງຂອງການຖະແຫຼງນະໂຍບາຍປະຈຳປີຕໍ່ລັດຖະສະພາ ເມື່ອວັນພຸດ 15 ມັງກອນ ທີ່ຜ່ານມາ ທ່ານ ວະລາດິເມຍ ປູຕິນ ປະທານປະເທດລັດເຊຍກ່າວວ່າ ຕົນມີແນວຄິດປະຕູຮູບລັດຖະທຳມະນູນ ສະບັບປັດຈຸບັນ ທີ່ໃຊ້ມາຕັ້ງແຕ່ປີ 1993 ເພື່ອເພີ່ມຄວາມເຂັ້ມແຂງ ແລະ ບົດບາດຂອງລັດຖະສະພາ ດ້ວຍການກະຈາຍອຳນາດຈາກປະທານປະເທດ ທີ່ລວມເຖິງການຄັດເລືອກ ແລະ ອະນຸມັດບຸກຄົນດຳລົງຕຳແໜ່ງລະດັບສູງໃນລັດຖະບານ ລວມເຖິງນາຍົກລັດຖະມົນຕີ ເຊິ່ງຜູ້ນຳລັດເຊຍສະເໜີໃຫ້ມີການເພີ່ມອຳນາດ ແຕ່ຍັງບໍ່ໄດ້ລົງເລິກໃນລາຍລະອຽດ.

ພາບ: ທ່ານ ເດີມີຕຣີ ເມດເວດເດບ ນາຍົກລັດຖະມົນຕີລັດເຊຍ ແລະ ທ່ານ ປູຕິນ ປະທານປະເທດລັດເຊຍ

ຫຼັງຈາກນັ້ນພຽງບໍ່ພໍເທົ່າໃດຊົ່ວໂມງ ທ່ານ ເດີມີຕຣີ ເມດເວດເດບ ນາຍົກລັດຖະມົນຕີລັດເຊຍ ປະກາດລາອອກຈາກຕຳແໜ່ງພ້ອມຄະນະລັດຖະມົນຕີທັງໝົດ ເພື່ອສະໜັບສະໜູນແນວທາງປະຕິຮູບລັດຖະທຳມະນູນຂອງທ່ານ ປູຕິນ ທີ່ຈະຕ້ອງຜ່ານການອະພິປາຍ ແລະ ລົງມະຕີຈາກລັດຖະສະພາ ກ່ອນມີການລົງປະຊາມະຕິໂດຍປະຊາຊົນລັດເຊຍຕໍ່ໄປ ຕໍ່ມາທ່ານ ປູຕິນ ໄດ້ສະເໜີຊື່ທ່ານ ມິຄາອິວ ມິຊຸສຕິນ ອາຍຸ 53 ປີ ປັດຈຸບັນດຳລົງຕຳແໜ່ງຜູ້ອຳນວຍການສຳນັກງານພາສີແຫ່ງຊາດ ໃຫ້ລັດຖະສະພາພິຈາລະນາຄຸນສົມບັດໃນການຕຳແໜ່ງນາຍົກລັດຖະມົນຕີຄົນໃໝ່.

ພາບ: ທ່ານ ມິຄາອິວ ມິຊຸສຕິນ ວ່າທີ່ນາຍົກລັດຖະມົນຕີຄົນໃໝ່ຂອງລັດເຊຍ

ເຖິງຢ່າງໃດກໍ່ຕາມ, ການທີ່ທ່ານ ມິຄາອິວ ມິຊຸສຕິນ ຂ້ອນຂ້າງເປັນບຸກຄົນທີ່ຢູ່ເບື້ອງຫຼັງຕະຫຼອດໄລຍະເວລາທີ່ຜ່ານມາ ແລະ ບໍ່ເຄີຍມີປະສົບການການເມືອງມາກ່ອນ ເນື່ອງຈາກເປັນນັກວິຊາການມາຕະຫຼອດຈົນຮັບຕຳແໜ່ງສູງສຸດຂອງສຳນັກງານພາສີແຫ່ງຊາດ ເມື່ອປີ 2010 ກໍ່ໃຫ້ເກີດຄຳຖາມວ່າ ບຸກຄົນຜູ້ນີ້ຈະເປັນທາຍາດທາງການເມືອງຂອງຜູ້ນຳລັດເຊຍຕົວຈິງຫຼືບໍ່ ໂດຍທ່ານ ປູຕິນໄດ້ແຕ່ງຕັ້ງທ່ານ ເດີມີຕຣີ ເມດເວດເດບ ທີ່ເຮັດວຽກຮ່ວມກັນໃກ້ຊິດມາຍາວນານ ໃຫ້ດຳລົງຕຳແໜ່ງຮອງປະທານສະພາຄວາມໝັ້ນຄົງ ເຊິ່ງຂຶ້ນກັບປະທານປະເທດໂດຍກົງ ແຕ່ບົດບາດໃໝ່ຂອງທ່ານ ເດີມີຕຣີ ເມດເວດເດບ ຍັງບໍ່ເປັນທີ່ຊັດເຈນ.

ລວມທັງຍັງຊັດເຈນວ່າ ມີບຸກຄົນວົງໃນທີ່ໃກ້ຊິດກັບທ່ານ ປູຕິນ ຮັບຊາບເຖິງການປ່ຽນແປງດັ່ງກ່າວນີ້ລ່ວງໜ້າມາຫຼາຍໜ້ອຍພຽງໃດ ແຕ່ຖືເປັນຄວາມແປກປະຫຼາດໃຈສຳລັບສັງຄົມໃນວົງກວ້າງຂອງລັດເຊຍ ທ່າມກາງການຄາດເດົາໄປຕ່າງໆນາໆວ່າ ທ່ານ ປູຕິນ ທີ່ປັດຈຸບັນອາຍຸ 67 ປີ ດຳລົງຕຳແໜ່ງປະທານປະເທດຕັ້ງແຕ່ປີ 2000 ເຖິງແມ່ນວ່າບໍ່ໄດ້ຕໍ່ເນື່ອງ ຈະມີອະນາຄົດທາງການເມືອງແບບໃດ ຫຼັງຈາກໝົດວາລະອີກຄັ້ງໃນປີ 2024 ແຕ່ເປັນເລື່ອງປົກກະຕິທີ່ທ່ານ ປູຕິນ ຈະບໍ່ເປີດເຜີຍຈົນນາທີສຸດທ້າຍ.

ຂະນະທີ່ທ່ານ ເລໂອນິດ ໂວລຄັອບ ໜຶ່ງໃນແກນນຳຝ່າຍຄ້ານຂອງລັດເຊຍ ອອກມາວິຈານທັນທີວ່າ ການເຄື່ອນໄຫວຄັ້ງນີ້ບໍ່ມີຍັງຫຼາຍ ນີ້ຄືການລັດຖະປະຫານຖືກກົດມາຍ ເພື່ອເປີດທາງໃຫ້ທ່ານ ປູຕິນ ຢູ່ໃນຕຳແໜ່ງຕະຫຼອດຊີວິດ.

HTML tutorial