ຍອດຜູ້ຕິດພະຍາດປອດອັກເສບ ຈາກເຊື້ອຈຸລະໂລກສາຍພັນໃໝ່ອູຫັ້ນ ຍັງເພີ່ມຂຶ້ນຢ່າງຕໍ່ເນື່ອງ

ລາຍງານ 25 ມັງກອນ 2020, ສື່ມວນຊົນເກືອບທຸກສຳນັກໃນຈີນລາຍງານວ່າ: ທ່ານ ຫຼຽງ ອູຕົງ ອາຍຸ 62 ປີ ທີ່ເປັນໝໍປະຈຳໂຮງໝໍຫູເປີຍ ຊິນຫົວ ໃນເມືອງອູຫັ້ນ ເມືອງເອກຂອງມົນທົນຫູເປີຍ ເສຍຊີວິດຫຼັງຈາກຕິດພະຍາດປອດອັກເສບຈາກເຊື້ອຈຸລະໂລກສາຍພັນໃໝ່ (Novel Corona Virus – nCOV) ຫຼື ໄວຣັສອູຫັ້ນ ຕາມຊື່ຂອງແຫຼ່ງກຳເນີດ.

ເຊິ່ງລາຍງານລະບຸວ່າໝໍ ຫຼຽງ ອູຕົງ ຕິດເຊື້ອເມື່ອວັນທີ 16 ມັງກອນ ທີ່ຜ່ານມາ ແລະ ອີກ 2 ວັນຕໍ່ມາໄດ້ມີການຍ້າຍໄປປິ່ນປົວຢູ່ໂຮງໝໍຈິນອິ້ນຖັນ ທີ່ຢູ່ໃນເມືອງອູຫັ້ນເຊັ່ນກັນ ກ່ອນມີການຢືນຢັນວ່າເສຍຊີວິດເມື່ອຕອນເຊົ້າມືດຂອງວັນເສົານີ້ ຕາມເວລາທ້ອງຖິ່ນ, ຂະນະທີ່ລາຍງານຂອງຄະນະກຳມະການສາທາລະນະສຸກແຫ່ງຊາດຈີນ ສະຫຼຸບສະຖິຕິຜູ້ເສຍຊີວິດຈາກເຊື້ອຈຸລະໂລກດັ່ງກ່າວ ນັບຕັ້ງແຕ່ຕົ້ນເດືອນນີ້ເຖິງວັນທີ 24 ມັງກອນ ມີ 41 ຄົນ ໃນຈຳນວນນີ້ 39 ຄົນຢູ່ໃນມົນທົນຫູເປີຍ ແລະ ຈຳນວນຜູ້ຕິດເຊື້ອທົ່ວປະເທດເພີ່ມຂຶຶ້ນເປັນ 1,287 ຄົນ.

ໃນດ້ານຂອງຄະນະກຳມາທິການທະຫານສູນກາງແຫ່ງ ສປ.ຈີນ ໄດ້ນຳສົ່ງບຸກຄະລາກອນການແພດໃນສັງກັດກອງທັບປົດປ່ອຍປະຊາຊົນຈີນ ຊຸດທຳອິດ 450 ຄົນ ໂດຍເຈົ້າໜ້າທີ່ບາງສ່ວນມີປະສົບການຮັບມືກັບເຊື້ອຈຸລະໂລກອີໂບລາ ແລະ ໂລກຊາ ລົງພື້ນທີ່ເມືອງອິຫັ້ນ ເພື່ອຕໍ່ສູ້ກັບການແຜ່ລະບາດດັ່ງກ່າວ.

ເຖິງຢ່າງໃດກໍ່ຕາມ ລັດຖະບານຈີນໄດ້ໃຊ້ມາດຕະການຄວບຄຸມໂລກດ້ວຍການປິດເມືອງໃນມົນທົນຫູເປີຍ ຕັ້ງແຕ່ວັນພະຫັດ ທີ່ຜ່ານມາ ເພື່ອຈຳກັດວົງການແຜ່ລະບາດຂອງເຊື້ອຈຸລະໂລກສາຍພັນໃໝ່ນີ້, ເຮັດໃຫ້ຊາວເມືອງອູຫັ້ນພາກັນແຫ່ກັກຕຸນສິນຄ້າອຸປະໂພກບໍລິໂພກ, ປະຊາຊົນຈຳນວນບໍ່ໜ້ອຍວິຈານການປະຊາສຳພັນຂອງພາກລັດວ່າບໍ່ຄວບຄຸມພຽງພໍ ແລະ ມາດຕະການປິດກັ້ນພື້ນທີ່ສ້າງຄວາມແຕກຕື່ນ ເພາະສົ່ງຜົນໃຫ້ບັນຍາກາດໃນເມືອງມີແຕ່ຄວາມເປົ່າວ່າງ.

ໃນດ້ານຂອງທ່ານ ຫວັງ ສຽວຕົງ ເຈົ້າຄອງມົນທົນຫູເປີຍ ກ່າວວ່າສະບຽງອາຫານສຳລັບປະຊາຊົນ ໂດຍສະເພາະຢູ່ເມືອງອູຫັ້ນ ເຊິ່ງເປັນເມືອງເອກ ແລະ ມີປະຊາຊົນຫຼາຍກວ່າ 11 ລ້ານຄົນນັ້ນພຽງພໍ ໂດຍເມືອງອູຫັ້ນລາຍງານວ່າ ອາຫານໃນຄັງມີເຂົ້າສານ 5 ລ້ານກິໂລ, ນ້ຳມັນພືດ 4 ລ້ານກິໂລ ແລະ ຊີ້ນສັດລວມທັງໝູ ແລະ ງົວລວມຫຼາຍກວ່າ 10,000 ໂຕນ, ຂະນະທີ່ມົນທົນໃກ້ຄຽງ ລວມເຖິງມົນທົນເຫີເປີຍ ແລະ ມົນທົນໄຫຫຼຳກໍ່ໄດ້ສົ່ງສະບຽງອາຫານເຂົ້າມາຊ່ວຍ.

ນອກຈາກນີ້, ທາງການຈີນຍັງໄດ້ລະດົມເຄື່ອງກົນຈັກຂະໜາດໃຫຍ່ ແລະ ເຈົ້າໜ້າທີ່ກໍ່ສ້າງໃຫ້ຮີບເລັ່ງສ້າງໂຮງໝໍພິເສດແຫ່ງໃໝ່ໃນເນື້ອທີ່ 25,000 ຕາລາງແມັດ ຕະຫຼອດມື້ຕະຫຼອດຄື່ນ ເພື່ອຮອງຮັບຜູ້ຕິດເຊື້ອຈຸລະໂລກສາຍພັນໃໝ່ ໂດຍບໍ່ໄດ້ຢຸດພັກເຖິງຈະຢູ່ໃນທ່າມກາງບັນຍາກາດການສະເຫຼີມສະຫຼອງບຸນປີໃໝ່ຈີນ ຫຼື ກຸດຈີນກໍ່ຕາມ ເພື່ອໃຫ້ທັນເປີດໃຊ້ຕາມກຳນົດໃນວັນທີ 3 ກຸມພາ 2020 ນີ້.

HTML tutorial