ສາທາລະນະສຸກຈີນວ່າ ເຊື້ອຈຸລະໂລກໂຄໂຣນາສາຍພັນໃໝ່ ຍັງມີໂອກາດສູງທີ່ຈະຂະຫຍາຍວົງກວ້າງການແຜ່ລະບາດ

ລາຍງານ 26 ມັງກອນ 2020, ທ່ານ ໝ່າ ສຽວເວີ້ຍ ປະທານຄະນະກຳມາທິການສາທາລະນະສຸກແຫ່ງ ສປ.ຈີນ ຖະແຫຼງໃນມື້ນີ້ ກ່ຽວກັບສະຖານະການການແຜ່ລະບາດຂອງເຊື້ອຈຸລະໂລກໂຄໂຣນາສາຍພັນໃໝ່ ທີ່ມີຖິ່ນກຳເນີດໃນເມືອງອູຫັ້ນ ມົນທົນຫູເປີຍ ທາງພາກກາງຂອງປະເທດຈີນ ວ່າຄວາມຮູ້ ແລະ ຄວາມເຂົ້າໃຈຂອງເຈົ້າໜ້າທີ່ຕໍ່ເຊື້ອຈຸລະໂລກຊະນິດນີ້ຍັງມີຈຳກັດ ແລະ ຍັງບໍ່ມີຄວາມຊັດເຈນຕໍ່ກັບຄວາມສ່ຽງທີ່ຈະເກີດຂຶ້ນໃນກໍລະນີທີ່ເຊື້ອຈຸລະໂລກດັ່ງກ່າວຫາກກາຍພັນຫຼາຍຂຶ້ນສູ່ລະດັບໃໝ່.

ເຊິ່ງທ່ານ ໝ່າ ສຽວເວີ້ຍກ່າວວ່າ ໄລຍະການເບາະຂອງເຊື້ອຈຸລະໂລກສາຍພັນໃໝ່ນີ້ໃຊ້ເວລາພຽງວັນດຽວ ຫຼື ສູງສຸດ 14 ວັນ ແລະ ທີ່ສຳຄັນຄືການຕິດເຊື້ອສາມາດເກີດຂຶ້ນໄດ້ ເຖິງແມ່ນວ່າເຊື້ອຈຸລະໂລກຈະຢູ່ໃນໄລຍະການກໍ່ຕົວກ່ອນການເບາະ ເຊິ່ງແຕກຕ່າງຈາກເຊື້ອຈຸລະໂລກທີ່ກໍ່ໃຫ້ເກີດອາກາດທາງເດີນຫາຍໃຈກະທັນຫັນຮຸນແຮງ ຫຼື ໂລກຊາ ທີ່ເຄີຍແຜ່ລະບາດໄປທົ່ວໂລກລະຫວ່າງທ້າຍປີ 2002 ເຖິງກາງປີ 2003.

ຂະນະທີ່ມາດຕະການຄວບຄຸມການແຜ່ລະບາດຂອງເຊື້ອຈຸລະໂລກໂຄໂຣນາສາຍພັນໃໝ່ໃນຈີນ ຕອນນີ້ເນັ້ນໄປທີ່ການໂຈະໃຫ້ບໍລິການລະບົບຂົນສົ່ງສາທາລະນະ, ຈຳກັດການເດີນທາງ ແລະ ການຍົກເລີກຈັດງານ ຫຼື ກິດຈະກຳທີ່ມີຜູ້ຄົນຈຳນວນຫຼາຍລວມຕົວກັນນັ້ນຈະດຳເນີນຕໍ່ໄປ ໂດຍຈະມີການຍົກລະດັບຄວາມເຂັ້ມງວດຫຼາຍຂຶ້ນອີກ ເນື່ອງຈາກເຊື້ອຈຸລະໂລກຍັງມີຄວາມສາມາດສູງທີ່ຈະແຜ່ລະບາດຫຼາຍຂຶ້ນ.

ໃນອີກດ້ານໜຶ່ງ ຜົນການວິໄຈຂອງມະຫາວິທະຍາໄລແລງຄາສເຕີ ໃນອັງກິດລະບຸວ່າ ຜູ້ຕິດເຊື້ອຈຸລະໂລກໂຄໂຣນາສາຍພັນໃໝ່ໃນຈີນ 1 ຄົນສາມາດແຜ່ກະຈາຍເຊື້ອໃຫ້ກັບຄົນອ້ອມຂ້າງສະເລ່ຍ 2.5 ຄົນ ແລະ ຫາກທິດທາງການແຜ່ລະບາດຂອງໂລກຍັງເປັນແບບນີ້ຕໍ່ໄປ, ຄະນະຜູ້ວິໄຈໄດ້ຕັ້ງສົມມຸດຕິຖານວ່າ ສະຖານະການການແຜ່ລະບາດຈະຂະຫຍາຍວົງກວ້າງຂຶ້ນຕື່ມ ໂດຍພາຍໃນວັນທີ 4 ກຸມພາ ທີ່ຈະມາເຖິງນີ້ອາດມີຈຳນວນຜູ້ຕິດເຊື້ອສະສົມ ໂດຍນັບມາຕັ້ງແຕ່ເດືອນທັນວາ 2019 ຈົນເຖິງວັນດັ່ງກ່າວອາດສູງເຖິງ 190,000 ຄົນສະເພາະໃນເມືອງອູຫັ້ນ ທີ່ມີປະຊາກອນປະມານ 11 ລ້ານຄົນ.

ນອກຈາກນີ້, ອີງການລາຍງານຂອງຄະນະກຳມາທິການສາທາລະນະສຸກແຫ່ງ ສປ.ຈີນ ຕົວເລກຜູ້ຕິດເຊື້ອຈຸລະໂລກໂຄໂຣນາສາຍພັນໃໝ່ ໃນທົ່ວປະເທດຈີນມີ 1,975 ຄົນ (ນັບເຖິງວັນທີ 25 ມັງກອນ 2020) ໃນນັ້ນມີຜູ້ປ່ວຍຂັ້ນວິກິດ 324 ຄົນ, ມີຜູ້ເສຍຊີວິດແລ້ວ 56 ຄົນ, ສ່ວນຜູ້ປ່ວຍທີ່ໄດ້ຮັບການປິ່ນປົວຈົນຟື້ນຕົວດີມີ 49 ຄົນ ແລະ ຜູ້ປ່ວຍຕ້ອງສົງໄສວ່າຕິດເຊື້ອມີ 2,684 ຄົນ.

ຂະນະດຽວກັນມີການຕິດຕາມອາກາດ ຜູ້ທີ່ມີປະຫວັດການສຳຜັດໃກ້ຊິດກັບຜູ້ປ່ວຍ ຈຳນວນ 23,431 ຄົນ, ໂດຍມີ 21,556 ຄົນຕ້ອງຢູ່ພາຍໃຕ້ການສັງເກດການຈາກແພດໝໍ, ຂະນະທີ່ 325 ຄົນໄດ້ຮັບການປ່ອຍຕົວແລ້ວ.

ນອກຈາກນັ້ນ ມີການຢືນຢັນຈຳນວນຜູ້ຕິດເຊື້ອຈຸລະໂລກໂຄໂຣນາສາຍພັນໃໝ່ 10 ຄົນ ໃນເຂດບໍລິຫານພິເສດຮົງກົງ ແລະ ມາເກົ້າ ລວມເຖິງເກາະໄຕ້ຫວັນຂອງຈີນ ໂດຍແບ່ງເປັນຮົງກົງ 5 ຄົນ, ມາເກົ້າ 2 ຄົນ ແລະ ໄຕ້ຫວັນ 3 ຄົນ.

ສ່ວນຈຳນວນຜູ້ຕິດພະຍາດປອດອັກເສບຈາກເຊື້ອຈຸລະໂລກໂຄໂຣນາສາຍພັນໃໝ່ໃນຕ່າງປະເທດປະກອບມີ: ໄທ 5 ຄົນ, ຍີ່ປຸ່ນ 3 ຄົນ, ເກົາຫຼີໃຕ້ 2 ຄົນ, .ອາເມຣິກາ 2 ຄົນ, ຫວຽດນາມ 2 ຄົນ, ສິງກະໂປ 4 ຄົນ, ມາເລເຊຍ 4 ຄົນ, ເນປານ 1 ຄົນ, ຝຣັ່ງ 3 ຄົນ, ອົດສະຕຣາລີ 1 ຄົນ ແລະ ການາດາ 1 ຄົນ.