ຜູ້ຕິດເຊື້ອຈຸລະໂລກໂຄໂຣນາສາຍພັນໃໝ່ຍັງເພີ່ມຂຶ້ນຢ່າງຕໍ່ເນື່ອງ ຫຼ້າສຸດມີຫຼາຍກວ່າ 17,000 ຄົນແລ້ວ

ລາຍງານ 3 ກຸມພາ 2020, ຄະນະກຳມາທິການສາທາລະນະສຸກແຫ່ງ ສປ.ຈີນ ລາຍງານສະຖານະການຂອງເຊື້ອຈຸລະໂລກໂຄໂຣນາສາຍພັນໃໝ່ ທີ່ແຜ່ລະບາດໃນປະເທດມາຕັ້ງແຕ່ເດືອນທັນວາ ປີທີ່ຜ່ານມາ ຈົນເຖິງວັນທີ 2 ກຸມພາ ທີ່ຜ່ານມາ ວ່າມີຈຳນວນຜູ້ເສຍຊີວິດແລ້ວ 361 ຄົນ ແລະ ສະຖິຕິຜູ້ຕິດເຊື້ອສະສົມມີ 17,205 ຄົນ ແຕ່ຄະນະແພດຮ່ວມກັນປິ່ນປົວຜູ້ຕິດເຊື້ອຈົນປາສະຈາກໂລກ ແລະ ສາມາດກັບບ້ານເຮືອນໄດ້ແລ້ວ 475 ຄົນ.

ຂໍ້ມູນດັ່ງກ່າວໄດ້ທຳລາຍສະຖິຕິໃນຊ່ວງໄລຍະເວລາດຽວກັນຂອງການແຜ່ລະບາດຂອງໂລກຊາ ທີ່ແຜ່ລະບາດໄປທົ່ວໂລກລະຫວ່າງປີ 2002-2003 ທີ່ສະເພາະໃນຈີນມີຜູ້ເສຍຊີວິດ 349 ຄົນ ແລະ ມີຜູ້ຕິດເຊື້ອສະສົມ 5,327 ຄົນ ຕາມຂໍ້ມູນຂອງອົງການອະນາໄມໂລກ (WHO) ໂດຍອັດຕາການເສຍຊີວິດຈາກໂລກຊາສະເພາະໃນຈີນກວມເອົາ 6.6%, ຂະນະທີ່ອັດຕາສະເລ່ຍການເສຍຊີວິດຈາກເຊື້ອຈຸລະໂລກໂຄໂຣນາສາຍພັນໃໝ່ຕາມການປະເມີນຂອງອົງການອະນາໄມໂລກໃນີອນນີ້ ກວມເອົາປະມານ 2%.

ໃນດ້ານສະຖານະການຕິດເຊື້ອໃນຕ່າງປະເທດ ນອກເໜືອຈາກຮົງກົງ, ມາເກົ້າ ແລະ ໄຕ້ຫວັນ ຍັງມີອີກຢ່າງໜ້ອຍ 23 ປະເທດໄດ້ແກ່: ໄທ, ຍີ່ປຸ່ນ, ສິງກະໂປ, ເກົາຫຼີໃຕ້, ອົດສະຕຣາລີ, ມາເລເຊຍ, ເຢຍລະມັນ, ສ.ອາເມຣິກາ, ຝຣັ່ງ, ຫວຽດນາມ, ການາດາ, ສະຫະນະຄອນ ເອເມຣັດ ອາຣັບ, ອິຕາລີ, ລັດເຊຍ, ອັງກິດ, ກຳປູເຈຍ, ແຟງລັງ, ອິນເດຍ, ເນປານ, ຟິລິບປິນ, ແອັດສະປາຍ, ສີລັງກາ ແລະ ຊູແອດ, ເຖິງຢ່າງໃດກໍ່ຕາມ ໃນຟິລິບປິນມີຜູ້ເສຍຊີວິດແລ້ວ 1 ຄົນ ເປັນນັກທ່ອງທ່ຽວຊາວຈີນອາຍຸ 44 ປີ ແລະ ຖືເປັນການເສຍຊີວິດນອກແຜ່ນດິນຈີນຄົນທຳອິດ.

ເຊິ່ງອົງການອະນາໄມໂລກປະກາດເມື່ອວັນພະຫັດທີ່ຜ່ານມາ ໃຫ້ສະຖານະການການແຜ່ລະບາດຂອງເຊື້ອຈຸລະໂລກໂຄໂຣນາສາຍພັນໃໝ່ຈາກເມືອງອູຫັ້ນ ເປັນພາວະສຸກເສີນດ້ານສາທາລະນະສຸກລະຫວ່າງປະເທດ, ໃນດ້ານຂອງລັດຖະບານຈີນກໍ່ໄດ້ໃຊ້ມາດຕະການຄວບຄຸມໂລກຂັ້ນເດັດຂາດ ຕັ້ງແຕ່ທ້າຍເດືອນທີ່ຜ່ານມາ ດ້ວຍການໂຈະໃຫ້ບໍລິການລະບົບຂົນສົ່ງສາທາລະນະເກືອບທັງໝົດໃນມົນທົນຫູເປີຍ.

HTML tutorial